சங்கீதம் 115

115 ¹எங்களுக்கல்ல, எங்கள் பிதாவே, எங்களுக்கல்ல, உம்முடைய நாமத்திற்கே மகிமையைத் தாரும், உம்முடைய உடன்படிக்கை அன்பினிமித்தமும் உம்முடைய உண்மையினிமித்தமும்.

²“இப்பொழுது அவர்களுடைய தேவன் எங்கே?” என்று ஜாதிகள் ஏன் சொல்லவேண்டும்? ³எங்கள் பிதா வானங்களில் இருக்கிறார்; தமக்குச் சித்தமானதையெல்லாம் செய்கிறார். ⁴அவர்களுடைய விக்கிரகங்கள் வெள்ளியும் பொன்னுமாய், மனுஷர் கைவேலையாயிருக்கிறது. ⁵அவைகளுக்கு வாய் உண்டு, ஆனாலும் பேசாது; கண்கள் உண்டு, ஆனாலும் காணாது; ⁶அவைகளுக்கு காதுகள் உண்டு, ஆனாலும் கேளாது; மூக்கு உண்டு, ஆனாலும் முகராது; ⁷அவைகளுக்கு கைகள் உண்டு, ஆனாலும் தொடாது; கால்கள் உண்டு, ஆனாலும் நடவாது; தங்கள் தொண்டையால் சத்தமும் எழுப்பாது. ⁸அவைகளை உண்டாக்குகிறவர்களும், அவைகளை நம்புகிற யாவரும் அவைகளைப் போலாவார்கள்.

⁹இஸ்ரவேலே, எங்கள் பிதாவை நம்பு! அவரே அவர்களுடைய துணையும் அவர்களுடைய கேடகமுமாயிருக்கிறார். ¹⁰ஆரோனின் வம்சத்தாரே, எங்கள் பிதாவை நம்புங்கள்! அவரே அவர்களுடைய துணையும் கேடகமுமாயிருக்கிறார். ¹¹எங்கள் பிதாவுக்குப் பயப்படுகிறவர்களே, அவரை நம்புங்கள்! அவரே அவர்களுடைய துணையும் கேடகமுமாயிருக்கிறார்.

¹²எங்கள் பிதா எங்களை நினைத்திருக்கிறார்; அவர் எங்களை ஆசீர்வதிப்பார். இஸ்ரவேல் வம்சத்தை ஆசீர்வதிப்பார்; ஆரோனின் வம்சத்தை ஆசீர்வதிப்பார்; ¹³எங்கள் பிதாவுக்குப் பயப்படுகிறவர்களாகிய சிறியோரையும் பெரியோரையும் ஆசீர்வதிப்பார்.

¹⁴எங்கள் பிதா உங்களையும் உங்கள் பிள்ளைகளையும் மென்மேலும் பெருகப்பண்ணுவாராக. ¹⁵வானத்தையும் பூமியையும் உண்டாக்கின எங்கள் பிதாவினால் நீங்கள் ஆசீர்வதிக்கப்படுவீர்களாக.

¹⁶வானங்கள் எங்கள் பிதாவின் வானங்களே, ஆனாலும் பூமியை அவர் மனுஷருக்குக் கொடுத்தார். ¹⁷மரித்தோர் எங்கள் பிதாவைத் துதிக்கமாட்டார்கள், மௌனத்தில் இறங்குகிற ஒருவரும் துதிக்கமாட்டார்கள். ¹⁸நாமோ இதுமுதற்கொண்டு என்றென்றைக்கும் எங்கள் பிதாவை ஸ்தோத்திரிப்போம். அல்லேலூயா!