சங்கீதம் 148

148 ¹அல்லேலூயா! வானங்களிலிருந்து எங்கள் பிதாவைத் துதியுங்கள்; உன்னதங்களில் அவரைத் துதியுங்கள். ²அவருடைய தூதர்களே, நீங்கள் யாவரும் அவரைத் துதியுங்கள்; அவருடைய சேனைகளே, நீங்கள் யாவரும் அவரைத் துதியுங்கள். ³சூரியனே, சந்திரனே, அவரைத் துதியுங்கள்; பிரகாசிக்கும் நட்சத்திரங்களே, நீங்கள் யாவரும் அவரைத் துதியுங்கள். ⁴உன்னதமான வானங்களே, வானங்களுக்கு மேலான தண்ணீர்களே, அவரைத் துதியுங்கள். ⁵அவர்கள் எங்கள் பிதாவின் நாமத்தைத் துதிப்பார்களாக, ஏனெனில் அவர் கட்டளையிட, அவைகள் சிருஷ்டிக்கப்பட்டன. ⁶அவர் அவைகளை என்றென்றைக்கும் நிலைநிறுத்தினார்; ஒழிந்துபோகாத ஒரு கட்டளையை அவர் கொடுத்தார்.

⁷பூமியிலிருந்து எங்கள் பிதாவைத் துதியுங்கள்; கடல் ஜந்துக்களே, சகல ஆழங்களே, ⁸அக்கினியே, கல்மழையே, உறைந்த மழையே, பனிமூட்டமே, அவருடைய வார்த்தையை நிறைவேற்றும் புசல்காற்றே, ⁹மலைகளே, சகல குன்றுகளே, கனிதரும் மரங்களே, சகல கேதுருக்களே, ¹⁰காட்டு மிருகங்களே, சகல நாட்டு மிருகங்களே, ஊரும் பிராணிகளே, பறக்கும் பட்சிகளே, ¹¹பூமியின் ராஜாக்களே, சகல ஜனங்களே, பிரபுக்களே, பூமியின் சகல அதிபதிகளே, ¹²வாலிபரே, கன்னிகைகளே, முதியோரே, பிள்ளைகளே, நீங்கள் யாவரும்,

¹³அவர்கள் எங்கள் பிதாவின் நாமத்தைத் துதிப்பார்களாக, ஏனெனில் அவருடைய நாமம் மாத்திரமே உன்னதமானது; அவருடைய மகிமை பூமிக்கும் வானத்திற்கும் மேலானது. ¹⁴அவர் தம்முடைய ஜனத்திற்குப் பெலனை உயர்த்தினார், தம்முடைய பக்தர்கள் யாவருக்கும், தமக்குச் சமீபமாயிருக்கிற இஸ்ரவேல் ஜனத்திற்கும் துதியை உயர்த்தினார். அல்லேலூயா!