சங்கீதம் 36

36 ¹கலகம் துன்மார்க்கனுடைய இருதயத்தின் ஆழத்தில் அவனோடு பேசுகிறது; அவனுடைய கண்களுக்கு முன்பாக எங்கள் பிதாவைப்பற்றிய பயம் இல்லை.

²ஏனெனில் அவன் தன் சொந்தக் கண்களில் தன்னைத்தானே மிகவும் புகழ்ந்துகொள்கிறான்; அதனால் தன் பாவத்தைக் கண்டுபிடிக்கவோ அதை வெறுக்கவோ அவனால் முடியாது. ³அவனுடைய வாயின் வார்த்தைகள் அக்கிரமமும் வஞ்சகமுமாயிருக்கின்றன; ஞானமாய் நடப்பதையும் நன்மை செய்வதையும் அவன் நிறுத்திவிட்டான். ⁴தன் படுக்கையிலும் அவன் அக்கிரமத்தை நினைத்துச் சூழ்ச்சி செய்கிறான்; நல்லதல்லாத வழியில் அவன் தன்னை நிறுத்திக்கொள்கிறான்; தீமையானதை அவன் புறக்கணிக்கிறதில்லை.

⁵எங்கள் பிதாவே, உம்முடைய உடன்படிக்கை அன்பு வானங்கள்வரை எட்டுகிறது, உம்முடைய உண்மை மேகங்கள்வரை எட்டுகிறது. ⁶உம்முடைய நீதி மகா பர்வதங்களைப்போலிருக்கிறது, உம்முடைய நியாயத்தீர்ப்புகள் மகா ஆழத்தைப்போலிருக்கின்றன; எங்கள் பிதாவே, மனுஷரையும் மிருகங்களையும் நீர் இரட்சிக்கிறீர். ⁷எங்கள் பிதாவே, உம்முடைய உடன்படிக்கை அன்பு எவ்வளவு அருமையானது! எல்லா மனுஷரும் உம்முடைய செட்டைகளின் நிழலிலே அடைக்கலம் புகுகிறார்கள். ⁸உம்முடைய வீட்டின் சம்பூரணத்தினால் அவர்கள் திருப்தியடைகிறார்கள், உம்முடைய இன்பங்களின் நதியிலிருந்து நீர் அவர்களுக்குக் குடிக்கத் தருகிறீர். ⁹ஏனெனில் ஜீவ ஊற்று உம்மிடத்தில் இருக்கிறது; உம்முடைய வெளிச்சத்திலே நாங்கள் வெளிச்சத்தைக் காண்கிறோம்.

¹⁰உம்மை அறிந்தவர்களுக்கு உம்முடைய உடன்படிக்கை அன்பையும், இருதயத்தில் செம்மையானவர்களுக்கு உம்முடைய நீதியையும் தொடர்ந்து அருளும். ¹¹அகந்தையுள்ளவனுடைய கால் என்னை மிதிக்க விடாதேயும், துன்மார்க்கனுடைய கை என்னைத் துரத்திவிடவும் விடாதேயும். ¹²அங்கே அக்கிரமக்காரர் விழுந்துபோனார்கள்; அவர்கள் தள்ளப்பட்டு எழுந்திருக்கமாட்டாதிருக்கிறார்கள்.