சங்கீதம் 83

83 ¹எங்கள் பிதாவே, மௌனமாயிராதேயும்; பேசாதிருக்காமலும் அமர்ந்திருக்காமலும் இரும், எங்கள் பிதாவே. ²இதோ, உம்முடைய சத்துருக்கள் கொந்தளிக்கிறார்கள்; உம்மைப் பகைக்கிறவர்கள் தங்கள் தலைகளை நிமிர்த்துகிறார்கள். ³உம்முடைய ஜனத்துக்கு விரோதமாய் இரகசியமாய்த் தந்திரம் பண்ணுகிறார்கள்; நீர் பாதுகாக்கிறவர்களுக்கு விரோதமாய் ஒன்றுசேர்ந்து சதி செய்கிறார்கள். ⁴“வாருங்கள், அவர்களை ஒரு ஜாதியாய் இராதபடிக்கு அழித்துப்போடுவோம்; இஸ்ரவேலின் நாமம் இனி நினைக்கப்படாதிருப்பதாக” என்று சொல்லுகிறார்கள். ⁵ஏகமனதாய்ச் சதி செய்கிறார்கள்; உமக்கு விரோதமாய் உடன்படிக்கை பண்ணிக்கொள்ளுகிறார்கள், ⁶ஏதோமியரின் கூடாரங்களும் இஸ்மவேலரும், மோவாபும் ஆகரியரும், ⁷கேபாலும் அம்மோனும் அமலேக்கும், தீரு ஊராரோடேகூட பெலிஸ்தியாவும், ⁸அசீரியரும் அவர்களோடே சேர்ந்துகொண்டார்கள்; அவர்கள் லோத்தின் புத்திரருக்குப் பலத்த புயமானார்கள்.

⁹மீதியானியருக்குச் செய்ததுபோலவும், கீசோன் நதியண்டையில் சிசெராவுக்கும் யாபீனுக்கும் செய்ததுபோலவும், அவர்களுக்கும் செய்யும், ¹⁰அவர்கள் என்தோரில் அழிந்து, தரைக்கு எருவாய்ப்போனார்கள். ¹¹அவர்களுடைய பிரபுக்களை ஓரேபைப்போலவும் சேபைப்போலவும், அவர்களுடைய அதிபதிகளெல்லாரையும் சேபாகைப்போலவும் சல்முனாவைப்போலவும் ஆக்கும், ¹²“தேவனுடைய மேய்ச்சல் நிலங்களை நமக்குச் சொந்தமாய்க் கட்டிக்கொள்வோம்” என்று அவர்கள் சொன்னார்களே. ¹³என் பிதாவே, அவர்களைச் சுழல்கிற தூசியைப்போலவும், காற்றுக்கு முன்பாகப் பறக்கிற பதரைப்போலவும் ஆக்கும். ¹⁴அக்கினி காட்டை எரித்துப்போடுகிறதுபோலவும், நெருப்புச்சுவாலை மலைகளைப் பற்றியெரிக்கிறதுபோலவும், ¹⁵அப்படியே உம்முடைய பெருங்காற்றினால் அவர்களைத் தொடர்ந்து, உம்முடைய புசலினால் அவர்களைக் கலங்கப்பண்ணும். ¹⁶எங்கள் பிதாவே, அவர்கள் உம்முடைய நாமத்தைத் தேடும்படிக்கு, அவர்களுடைய முகங்களை வெட்கத்தினால் மூடும். ¹⁷அவர்கள் என்றென்றைக்கும் வெட்கமும் கலக்கமும் அடைவார்களாக; இலச்சையோடே அழிந்துபோவார்களாக, ¹⁸எங்கள் பிதா என்னும் நாமமுள்ள தேவரீர் ஒருவரே சர்வ பூமியின்மேலும் மகா உன்னதமானவர் என்று அவர்கள் அறியும்படிக்கே இப்படிச் செய்யும்.