சங்கீதம் 96

96 ¹எங்கள் பிதாவைப் பாடி, புதுப்பாடல் பாடுங்கள்; பூமியனைத்துமே, எங்கள் பிதாவைப் பாடுங்கள்.

²எங்கள் பிதாவைப் பாடி, அவருடைய நாமத்தை ஸ்தோத்தரியுங்கள்; அவருடைய இரட்சிப்பை நாளுக்குநாள் அறிவியுங்கள். ³அவருடைய மகிமையான செயல்களை ஜாதிகளுக்குள்ளும், அவருடைய அற்புதமான கிரியைகளை எல்லா ஜனங்களுக்குள்ளும் பிரசித்தப்படுத்துங்கள். ⁴எங்கள் பிதா பெரியவரும், மிகவும் துதிக்கப்படத்தக்கவருமாயிருக்கிறார்; எல்லா தேவர்களைப்பார்க்கிலும் அவருக்கே பயப்படவேண்டும். ⁵ஜனங்களுடைய தேவர்கள் யாவும் விக்கிரகங்களே, ஆனால் எங்கள் பிதா வானங்களை உண்டாக்கினார். ⁶மகிமையும் மேன்மையும் அவர் சமுகத்தில் இருக்கிறது; வல்லமையும் அழகும் அவருடைய பரிசுத்த ஸ்தலத்தில் இருக்கிறது.

⁷ஜனங்களின் வம்சங்களே, எல்லாரும் எங்கள் பிதாவுக்குச் செலுத்துங்கள்; மகிமையையும் வல்லமையையும் எங்கள் பிதாவுக்குச் செலுத்துங்கள். ⁸எங்கள் பிதாவின் நாமத்திற்கு ஏற்ற மகிமையை அவருக்குச் செலுத்துங்கள்; காணிக்கையைக் கொண்டுவந்து, அவருடைய பிராகாரங்களில் பிரவேசியுங்கள். ⁹பரிசுத்தத்தின் மகிமையில் எங்கள் பிதாவைத் தொழுதுகொள்ளுங்கள்; பூமியனைத்துமே, அவர் சமுகத்தில் நடுங்குங்கள். ¹⁰“எங்கள் பிதா ராஜ்யபாரம்பண்ணுகிறார்! பூலோகம் அசையாதபடி உறுதியாய் ஸ்தாபிக்கப்பட்டிருக்கிறது; அது ஒருபோதும் அசைக்கப்படாது. அவர் ஜனங்களை நியாயமாய் நியாயந்தீர்ப்பார்” என்று ஜாதிகளுக்குள்ளே சொல்லுங்கள்.

¹¹வானங்கள் மகிழ்வதாக, பூமி களிகூருவதாக; சமுத்திரமும் அதின் நிறைவும் முழங்குவதாக. ¹²வயலும் அதிலுள்ள யாவும் ஆனந்தித்துக் களிகூருவதாக; அப்பொழுது காட்டின் மரங்களெல்லாம் கெம்பீரமாய்ப் பாடும். ¹³எங்கள் பிதாவின் சமுகத்தில் பாடுங்கள், அவர் வருகிறார், பூமியை நியாயந்தீர்க்க அவர் வருகிறார். அவர் பூலோகத்தை நீதியாயும், ஜனங்களைத் தமது உண்மையின்படியும் நியாயந்தீர்ப்பார்.