வெளிப்படுத்துதல் 2

2 ¹“எபேசுவிலுள்ள சபையின் தூதனுக்கு எழுது: தமது வலதுகரத்தில் ஏழு நட்சத்திரங்களைப் பிடித்துக்கொண்டு, ஏழு பொன் விளக்குத்தண்டுகளின் நடுவே உலாவுகிறவர் சொல்லுகிறதாவது:

²“உன் கிரியைகளையும், உன் பிரயாசத்தையும், உன் பொறுமையையும், நீ பொல்லாதவர்களைச் சகிக்கமாட்டாய் என்பதையும் நான் அறிந்திருக்கிறேன்; அப்போஸ்தலர்கள் அல்லாதிருந்தும் தங்களை அப்போஸ்தலர்கள் என்று சொல்லுகிறவர்களை நீ சோதித்து, அவர்கள் பொய்யர்கள் என்று கண்டறிந்தாய். ³நீ சகித்து, என் நாமத்தினிமித்தம் பொறுமையாயிருந்து, சோர்ந்துபோகவில்லை. ⁴ஆயினும், உனக்கு விரோதமாய் என்னிடத்தில் ஒரு குறை உண்டு; நீ ஆரம்பத்தில் கொண்டிருந்த அன்பைவிட்டு விலகிவிட்டாய். ⁵ஆகையால், நீ எங்கிருந்து விழுந்தாய் என்பதை நினைத்து, மனந்திரும்பி, முந்தின கிரியைகளைச் செய். இல்லாவிட்டால், நீ மனந்திரும்பாதபட்சத்தில், நான் உன்னிடத்தில் வந்து, உன் விளக்குத்தண்டை அதின் இடத்திலிருந்து நீக்கிப்போடுவேன். ⁶ஆனாலும், நிக்கொலாய் மதத்தாருடைய கிரியைகளை நீ வெறுக்கிறாய்; நானும் அவைகளை வெறுக்கிறேன்; இது உன்னிடத்தில் உண்டு. ⁷பரிசுத்த ஆவியானவர் சபைகளுக்குச் சொல்லுகிறதைக் காதுள்ளவன் கேட்கக்கடவன். ஜெயங்கொள்ளுகிறவனுக்கு எங்கள் பிதாவின் பரதீசிலுள்ள ஜீவவிருட்சத்தின் கனியைப் புசிக்கக்கொடுப்பேன்.

முந்தினவரும் பிந்தினவரும்

⁸“சிமிர்னாவிலுள்ள சபையின் தூதனுக்கு எழுது: மரித்திருந்து பின்பு உயிரோடிருக்கிறவரும், முந்தினவரும் பிந்தினவருமாகிய அவர் சொல்லுகிறதாவது:

⁹“உன் உபத்திரவத்தையும், உன் தரித்திரத்தையும் நான் அறிந்திருக்கிறேன், ஆனாலும் நீ ஐசுவரியவான்; யூதரல்லாதிருந்தும் தங்களை யூதர் என்று சொல்லுகிறவர்களுடைய தூஷணத்தையும் அறிந்திருக்கிறேன்; அவர்கள் சாத்தானுடைய ஜெபஆலயமாயிருக்கிறார்கள். ¹⁰நீ படப்போகிற பாடுகளைக்குறித்துப் பயப்படாதே; இதோ, நீங்கள் சோதிக்கப்படும்படி பிசாசு உங்களில் சிலரைக் காவலில் போடப்போகிறான்; பத்து நாள் உபத்திரவப்படுவீர்கள். மரணபரியந்தம் உண்மையாயிரு, அப்பொழுது ஜீவகிரீடத்தை உனக்குத் தருவேன். ¹¹பரிசுத்த ஆவியானவர் சபைகளுக்குச் சொல்லுகிறதைக் காதுள்ளவன் கேட்கக்கடவன். ஜெயங்கொள்ளுகிறவன் இரண்டாம் மரணத்தினால் சேதப்படமாட்டான்.

இருபுறமும் கருக்குள்ள கூர்மையான பட்டயம்

¹²“பெர்கமுவிலுள்ள சபையின் தூதனுக்கு எழுது: இருபுறமும் கருக்குள்ள கூர்மையான பட்டயத்தை உடையவர் சொல்லுகிறதாவது:

¹³“நீ வாசம்பண்ணுகிற இடத்தை நான் அறிந்திருக்கிறேன்; அங்கே சாத்தானுடைய சிங்காசனம் இருக்கிறது. ஆயினும் நீ என் நாமத்தைப் பற்றிக்கொண்டிருக்கிறாய்; சாத்தான் வாசம்பண்ணுகிற இடத்தில் என் உண்மையுள்ள சாட்சியாகிய அந்திப்பா உங்களுக்குள்ளே கொலைசெய்யப்பட்ட நாட்களிலும், நீ என்னைப்பற்றும் விசுவாசத்தை மறுதலிக்கவில்லை. ¹⁴ஆயினும், சில குறைகள் உனக்கு விரோதமாய் என்னிடத்தில் உண்டு; விக்கிரகங்களுக்குப் படைத்தவைகளைப் புசிக்கவும் வேசித்தனம்பண்ணவும், இஸ்ரவேல் புத்திரருக்கு முன்பாக இடறல் வைக்கும்படி பாலாகுக்குப் போதித்த பிலேயாமுடைய போதகத்தைப் பிடித்திருக்கிறவர்கள் அங்கே சிலர் உண்டு. ¹⁵அப்படியே நிக்கொலாய் மதத்தாருடைய போதகத்தைப் பிடித்திருக்கிறவர்களும் உன்னிடத்தில் உண்டு. ¹⁶ஆகையால் மனந்திரும்பு; இல்லாவிட்டால் நான் சீக்கிரமாய் உன்னிடத்தில் வந்து, என் வாயின் பட்டயத்தினால் அவர்களோடு யுத்தம்பண்ணுவேன். ¹⁷பரிசுத்த ஆவியானவர் சபைகளுக்குச் சொல்லுகிறதைக் காதுள்ளவன் கேட்கக்கடவன். ஜெயங்கொள்ளுகிறவனுக்கு மறைவான மன்னாவைப் புசிக்கக்கொடுத்து, ஒரு வெள்ளைக் கல்லையும், அந்தக் கல்லின்மேல் எழுதப்பட்ட புதிய நாமத்தையும் கொடுப்பேன்; அதைப் பெற்றுக்கொள்ளுகிறவனேயன்றி வேறொருவனும் அந்த நாமத்தை அறியான்.

அக்கினிச்சுவாலையைப்போன்ற கண்கள்

¹⁸“தியத்தீராவிலுள்ள சபையின் தூதனுக்கு எழுது: அக்கினிச்சுவாலையைப்போன்ற கண்களையும், பளபளப்பான வெண்கலம்போன்ற பாதங்களையும் உடையவரும், எங்கள் பிதாவின் குமாரனுமாகிய அவர் சொல்லுகிறதாவது:

¹⁹“உன் கிரியைகளையும், உன் அன்பையும், விசுவாசத்தையும், ஊழியத்தையும், உன் பொறுமையையும், நீ செய்த பிந்தின கிரியைகள் முந்தினவைகளிலும் அதிகமாயிருக்கிறதையும் நான் அறிந்திருக்கிறேன். ²⁰ஆயினும், உனக்கு விரோதமாய் என்னிடத்தில் ஒரு குறை உண்டு; தன்னை ஒரு தீர்க்கதரிசி என்று சொல்லுகிற யேசபேல் என்னும் ஸ்திரீ, என் ஊழியக்காரர்களுக்குப் போதித்து, வேசித்தனம்பண்ணவும் விக்கிரகங்களுக்குப் படைத்தவைகளைப் புசிக்கவும் அவர்களை வழிதப்பப்பண்ணுகிறதற்கு நீ அவளுக்கு இடங்கொடுக்கிறாய். ²¹அவள் மனந்திரும்பும்படி நான் அவளுக்குக் காலம் கொடுத்தேன்; ஆனாலும் தன் வேசித்தனத்தைவிட்டு மனந்திரும்ப அவளுக்கு மனதில்லை. ²²இதோ, நான் அவளைப் படுக்கையிலே தள்ளுவேன்; அவளுடன் விபசாரம்பண்ணுகிறவர்கள் தங்கள் கிரியைகளைவிட்டு மனந்திரும்பாவிட்டால், அவர்களையும் மிகுந்த உபத்திரவத்திலே தள்ளுவேன். ²³அவளுடைய பிள்ளைகளையும் கொல்லுவேன்; அப்பொழுது நானே உள்ளிந்திரியங்களையும் இருதயங்களையும் ஆராய்கிறவர் என்று சபைகளெல்லாம் அறிந்துகொள்ளும்; உங்களில் அவனவனுடைய கிரியைகளுக்குத்தக்கதாக உங்களுக்குப் பலனளிப்பேன். ²⁴தியத்தீராவிலே இந்தப் போதகத்தைப் பற்றிக்கொள்ளாமலும், சாத்தானுடைய ஆழங்கள் என்று சொல்லப்படுகிறவைகளை அறியாமலும் இருக்கிற உங்களில் மற்றவர்களுக்கு நான் சொல்லுகிறதாவது: வேறொரு பாரத்தை உங்கள்மேல் நான் சுமத்தமாட்டேன். ²⁵உங்களுக்கு உள்ளதை நான் வருமளவும் பற்றிக்கொண்டிருங்கள். ²⁶ஜெயங்கொண்டு முடிவுபரியந்தம் என் கிரியைகளைக் கைக்கொள்ளுகிறவனெவனோ அவனுக்கு ஜாதிகளின்மேல் அதிகாரம் கொடுப்பேன்; ²⁷நானும் என் பிதாவினிடத்தில் அதிகாரம் பெற்றுக்கொண்டதுபோலவே, அவன் இருப்புக்கோலால் அவர்களை ஆளுவான்; மண்பாண்டங்களைப்போல் அவர்களை நொறுக்கிப்போடுவான். ²⁸விடிவெள்ளி நட்சத்திரத்தையும் அவனுக்குக் கொடுப்பேன். ²⁹பரிசுத்த ஆவியானவர் சபைகளுக்குச் சொல்லுகிறதைக் காதுள்ளவன் கேட்கக்கடவன்.”