வெளிப்படுத்துதல் 21

21 ¹பின்பு, நான் புதிய வானத்தையும் புதிய பூமியையும் கண்டேன்; முந்தின வானமும் முந்தின பூமியும் ஒழிந்துபோயின, சமுத்திரமும் இல்லாமற்போயிற்று. ²பரிசுத்த நகரமாகிய புதிய எருசலேம் பரலோகத்திலிருந்து எங்கள் பிதாவினிடத்திலிருந்து இறங்கிவருகிறதை நான் கண்டேன்; அது தன் மணவாளனுக்காக அலங்கரிக்கப்பட்ட மணவாட்டியைப்போல ஆயத்தமாயிருந்தது.

³அப்பொழுது, சிங்காசனத்திலிருந்து உண்டான ஒரு பெருஞ்சத்தம்: “இதோ, எங்கள் பிதாவின் வாசஸ்தலம் மனுஷரோடிருக்கிறது; அவர் அவர்களோடே வாசம்பண்ணுவார்; அவர்கள் அவருடைய ஜனங்களாயிருப்பார்கள்; அவர்களுடைய பிதாவாகிய அவர்தாமே அவர்களோடிருப்பார்.

⁴எங்கள் பிதா அவர்களுடைய கண்ணீர் யாவையும் அவர்களுடைய கண்களைவிட்டுத் துடைத்துவிடுவார்; இனி மரணமுமில்லை, துக்கமுமில்லை, அழுகையுமில்லை, வேதனையுமில்லை; முந்தினவைகள் ஒழிந்துபோயின.”

⁵சிங்காசனத்தின்மேல் வீற்றிருந்தவர்: “இதோ, நான் சகலத்தையும் புதிதாக்குகிறேன்” என்றார். மேலும் அவர்: “இவைகளை எழுது; இந்த வார்த்தைகள் சத்தியமும் உண்மையுமானவைகள்” என்றார். ⁶பின்னும் அவர் என்னை நோக்கி: “ஆயிற்று. நான் அல்பாவும் ஓமெகாவும், ஆதியும் அந்தமுமாயிருக்கிறேன். தாகமாயிருக்கிறவனுக்கு நான் ஜீவத்தண்ணீரின் ஊற்றிலிருந்து இலவசமாய்க் கொடுப்பேன். ⁷ஜெயங்கொள்ளுகிறவன் இவைகளைச் சுதந்தரித்துக்கொள்ளுவான்; நான் அவனுக்குப் பிதாவாயிருப்பேன், அவன் எனக்கு மகனாயிருப்பான். ⁸ஆனால், பயப்படுகிறவர்களும், அவிசுவாசிகளும், அருவருப்பானவர்களும், கொலைபாதகரும், விபசாரக்காரரும், சூனியக்காரரும், விக்கிரகாராதனைக்காரரும், பொய்யர் அனைவரும் அடையும் பங்கு, அக்கினியும் கந்தகமும் எரிகிற கடலிலே கிடைக்கும்; அதுவே இரண்டாம் மரணம்.”

⁹கடைசியான ஏழு வாதைகளால் நிறைந்த ஏழு கலசங்களை வைத்திருந்த ஏழு தூதர்களில் ஒருவன் வந்து, என்னை நோக்கி: “வா, ஆட்டுக்குட்டியாகிய இயேசுவின் மனைவியாகிய மணவாட்டியை உனக்குக் காண்பிப்பேன்” என்று சொல்லி, ¹⁰ஆவிக்குள் என்னை உயர்ந்த பெரிய மலையின்மேல் கொண்டுபோய், பரலோகத்திலிருந்து எங்கள் பிதாவினிடத்திலிருந்து இறங்கிவருகிற பரிசுத்த நகரமாகிய எருசலேமை எனக்குக் காண்பித்தான்; ¹¹அது எங்கள் பிதாவின் மகிமையை வெளிப்படுத்திற்று; அதின் பிரகாசம் மகா விலையேறப்பெற்ற இரத்தினத்தைப்போலவும், படிகம்போல் தெளிவான வச்சிரக்கல்லைப்போலவும் இருந்தது. ¹²அதற்கு உயரமான பெரிய மதிலும், பன்னிரண்டு வாசல்களும் இருந்தன; அந்த வாசல்களில் பன்னிரண்டு தூதர்கள் நின்றார்கள்; இஸ்ரவேல் புத்திரரின் பன்னிரண்டு கோத்திரங்களின் நாமங்களும் அவைகளின்மேல் எழுதப்பட்டிருந்தன. ¹³கிழக்கே மூன்று வாசல்கள், வடக்கே மூன்று வாசல்கள், தெற்கே மூன்று வாசல்கள், மேற்கே மூன்று வாசல்கள் இருந்தன. ¹⁴நகரத்தின் மதிலுக்குப் பன்னிரண்டு அஸ்திபாரங்கள் இருந்தன; அவைகளின்மேல் ஆட்டுக்குட்டியாகிய இயேசுவினுடைய பன்னிரண்டு அப்போஸ்தலரின் பன்னிரண்டு நாமங்களும் இருந்தன.

¹⁵என்னுடனே பேசினவன் நகரத்தையும் அதின் வாசல்களையும் அதின் மதில்களையும் அளக்கும்படி பொன்னால் செய்த ஒரு அளவுகோலைப் பிடித்திருந்தான். ¹⁶அந்த நகரம் சதுரமாயிருந்தது; அதின் நீளமும் அகலமும் சமமாயிருந்தது. அவன் தன் கோலினால் நகரத்தை அளந்தான்; அது சுமார் 1,400 மைல்; அதின் நீளமும் அகலமும் உயரமும் சமமாயிருந்தன. ¹⁷அவன் அதின் மதிலை அளந்தான்; தூதனுடைய அளவாகிய மனுஷ அளவின்படி அது சுமார் 216 அடியாயிருந்தது. ¹⁸அதின் மதில் வச்சிரக்கல்லால் கட்டப்பட்டிருந்தது; நகரமோ கண்ணாடிபோல் தெளிவான சுத்தப்பொன்னாயிருந்தது. ¹⁹நகரத்து மதிலின் அஸ்திபாரங்கள் சகலவித இரத்தினங்களாலும் அலங்கரிக்கப்பட்டிருந்தன: முதலாவது வச்சிரக்கல், இரண்டாவது நீலரத்தினம், மூன்றாவது வைடூரியம், நான்காவது மரகதம், ²⁰ஐந்தாவது கோமேதகம், ஆறாவது பதுமராகம், ஏழாவது படிகப்பச்சை, எட்டாவது படிகவைடூரியம், ஒன்பதாவது புஷ்பராகம், பத்தாவது சுவர்ணரத்தினம், பதினொன்றாவது சுநீரம், பன்னிரண்டாவது சுகந்தி. ²¹பன்னிரண்டு வாசல்களும் பன்னிரண்டு முத்துக்களாயிருந்தன; ஒவ்வொரு வாசலும் ஒவ்வொரு முத்தினால் செய்யப்பட்டிருந்தது. நகரத்தின் வீதி கண்ணாடிபோல் தெளிவான சுத்தப்பொன்னாயிருந்தது.

²²அந்த நகரத்தில் ஆலயத்தை நான் காணவில்லை; சர்வவல்லமையுள்ள கர்த்தராகிய பிதாவும், ஆட்டுக்குட்டியாகிய இயேசுவுமே அதின் ஆலயமாயிருக்கிறார்கள். ²³அந்த நகரத்திற்கு வெளிச்சம் தரச் சூரியனும் சந்திரனும் தேவையில்லை; எங்கள் பிதாவின் மகிமையே அதைப் பிரகாசிப்பிக்கிறது, ஆட்டுக்குட்டியாகிய இயேசுவே அதற்கு விளக்காயிருக்கிறார். ²⁴ஜாதிகள் அதின் வெளிச்சத்திலே நடப்பார்கள்; பூமியின் ராஜாக்கள் தங்கள் மகிமையை அதற்குள்ளே கொண்டுவருவார்கள். ²⁵அதின் வாசல்கள் பகலில் ஒருபோதும் அடைக்கப்படுவதில்லை; அங்கே இரவே இராது. ²⁶ஜாதிகளின் மகிமையையும் கனத்தையும் அதற்குள்ளே கொண்டுவருவார்கள். ²⁷தீட்டுள்ள எதுவும், அருவருப்பானதையும் பொய்யானதையும் செய்கிற எவனும் ஒருபோதும் அதற்குள் பிரவேசிப்பதில்லை; ஆட்டுக்குட்டியாகிய இயேசுவின் ஜீவபுஸ்தகத்தில் எழுதப்பட்டிருக்கிறவர்கள் மாத்திரமே பிரவேசிப்பார்கள்.