Luka 5 FHB Father's Heart Bible™

5 ¹Da bi, bere a nnipadɔm no kyere ne ho hyiaa no sɛ wɔbɛte yɛn Agya asɛm no, na Yesu gyina Genesaret Ɔtare no ho. ^a a v1 Genesaret Ɔtare no yɛ Galilea Po no din foforo. ²Ohuu ahyɛn abien a ɛgyina ɔtare no ho; apofofo no agyaw mu, na wɔrehoro wɔn asau. ³Ɔforoo ahyɛn no mu baako a ɛyɛ Simon dea, na ɔsrɛɛ no sɛ ɔntwe no nkɔ nsu no mu kakra mfi mpoano; afei ɔtenaa ase de hyɛn no mu kyerɛkyerɛɛ nnipadɔm no.

⁴Bere a owiee kasa no, ɔka kyerɛɛ Simon se, “Twe hyɛn no kɔ nsu a emu dɔ mu, na montow mo asau ngu nsu mu nkyere mpataa.”

⁵Simon buaa no se, “Owura, yɛayɛ adwuma anadwo mu nyinaa a yɛankyere hwee. Nanso esiane wʼasɛm nti, mɛtow asau no agu.” ⁶Bere a wɔyɛɛ saa no, wɔkyeree mpataa bebree ara ma wɔn asau no fii ase tetew. ⁷Wɔbɔɔ wɔn hokafo a wɔwɔ hyɛn baako a aka no mu no nsa sɛ wɔmmɛboa wɔn; wɔbae, na wɔhyɛɛ ahyɛn abien no nyinaa ma araa ma ɛfii ase mem. ⁸Bere a Simon Petro huu eyi no, ɔhwee Yesu nkotodwe ase kae se, “Awurade, fi me ho kɔ, efisɛ meyɛ onipa bɔnefo!” ⁹Efisɛ mpataa dodow a wɔkyeree no yɛɛ ɔno ne wɔn a na wɔka ne ho nyinaa nwonwa,

¹⁰na saa ara na ɛyɛɛ Yakobo ne Yohane, Sebedeo mma a wɔne Simon yɛ hokafo no nso nwonwa. Yesu ka kyerɛɛ Simon se, “Nsuro; efi nnɛ rekɔ no, wobɛkyere nnipa.”

¹¹Enti wɔtwee wɔn ahyɛn no kɔɔ mpoano, gyaw biribiara, na wodii nʼakyi.

Ɔbarima Bi Ho Tew

¹²Bere a Yesu wɔ nkurow no mu baako mu no, ɔbarima bi a honam ani yare a emu yɛ den aka ne mu nyinaa baa hɔ. Bere a ohuu Yesu no, ɔde nʼanim butuw fam srɛɛ no se, “Awurade, sɛ wopɛ a, wubetumi ama me ho atew.”

¹³Yesu teɛɛ ne nsa sɔɔ ne mu kae se, “Mepɛ. Wo ho ntew.” Amonom hɔ ara, honam ani yare no fii ne ho.

¹⁴Yesu hyɛɛ no sɛ ɔnka nkyerɛ obiara, “na mmom kɔ na kɔda wo ho adi kyerɛ ɔsɔfo no, na fa nea Mose hyɛe no bɔ afɔre wɔ wo ho tew ho, sɛ adanse ma nnipa no.”

¹⁵Nanso ne ho asɛm trɛw kɔɔ akyiri koraa; nnipadɔm kɛse boaboaa wɔn ho ano sɛ wɔbɛtie no, na wɔanya ayaresa afi wɔn nyarewa ho. ¹⁶Nanso mpɛn pii na Yesu twe ne ho kɔ sare so mmeae kɔbɔ mpae.

Agya no Tumi a Ɔde Fa Bɔne Firi

¹⁷Da bi a na ɔrekyerɛkyerɛ no, Farisifo ne mmara kyerɛkyerɛfo a wofi Galilea nkuraa nyinaa ne Yudea ne Yerusalem aba no tenaa hɔ. Na yɛn Agya tumi wɔ hɔ ma no sɛ ɔnsa ayarefo. ¹⁸Saa bere no ara, mmarima bi soaa ɔbarima bi a wabubu wɔ kɛtɛ so baa hɔ, na wɔpɛɛ sɛ wɔde no kɔ mu kɔto Yesu anim. ¹⁹Bere a wɔanhu ɔkwan a wɔbɛfa nnipadɔm no mu de no akɔ mu no, wɔforoo kɔɔ ɔdan no atifi, faa nkyɛmfɛre no mu de no ne ne kɛtɛ no sianee kɔɔ nnipa no mfinimfini, pɛɛ Yesu anim.

²⁰Bere a Yesu huu wɔn gyidi no, ɔkae se, “Adamfo, wɔde wo bɔne afiri wo.”

²¹Akyerɛwfo ne Farisifo no fii ase ne wɔn ho dii akyinnye se, “Hena ne onipa yi a ɔreyaw Onyankopɔn yi? Hena na obetumi de bɔne afiri, gye Onyankopɔn nko ara?”

²²Esiane sɛ Yesu nim nea wosusuw nti, ɔbuaa wɔn se, “Adɛn nti na moresusuw saa wɔ mo koma mu? ²³Ɛhe na ɛyɛ mmerɛw: sɛ wobɛka se, ‘Wɔde wo bɔne afiri wo,’ anaa sɛ wobɛka se, ‘Sɔre na nantew’? ²⁴Nanso sɛnea mobehu sɛ Onipa Ba no wɔ tumi wɔ asase so sɛ ɔde bɔne firi no”—ɔka kyerɛɛ ɔbarima a wabubu no se—“Mereka akyerɛ wo se, sɔre, fa wo kɛtɛ, na kɔ wo fi.”

²⁵Amonom hɔ ara ɔsɔre gyinaa wɔn anim, faa ne kɛtɛ, na ɔkɔɔ ne fi rehyɛ yɛn Agya anuonyam. ²⁶Ɛyɛɛ wɔn nyinaa nwonwa; ehu hyɛɛ wɔn ma, na wɔhyɛɛ yɛn Agya anuonyam kae se, “Yɛahu anwonwade nnɛ.”

Yesu Frɛ Lewi

²⁷Eyi akyi no, Yesu fii adi huu towgyefo bi a ne din de Lewi a ɔte towgyedan mu. “Di mʼakyi,” ɔka kyerɛɛ no.

²⁸Enti Lewi sɔre, gyaw biribiara hɔ, na odii nʼakyi. ²⁹Afei Lewi too pon kɛse maa Yesu wɔ ne fi, na towgyefo ne afoforo dodow bi ne wɔn tenaa didii. ³⁰Nanso Farisifo no ne wɔn akyerɛwfo no nwiinwii kyerɛɛ nʼasuafo no se, “Adɛn nti na mo ne towgyefo ne nnebɔneyɛfo didi na monom?”

³¹Yesu buaa wɔn se, “Ɛnyɛ wɔn a wɔn ho yɛ den na wohia ɔyaresafo, na mmom ayarefo. ³²Mamma sɛ merebɛfrɛ atreneefo, na mmom nnebɔneyɛfo sɛ wɔnsakra wɔn adwene.”

Asɛmmisa Bi a Ɛfa Mmuadadi Ho

³³Wɔka kyerɛɛ no se, “Yohane asuafo di mmuada mpɛn pii na wɔbɔ mpae, na saa ara na Farisifo asuafo nso yɛ, nanso wʼasuafo no di na wɔnom.”

³⁴Yesu kae se, “Bere a ayeforokunu no ka ne nnamfo ho no, mobetumi ama wɔadi mmuada anaa? ³⁵Nanso nna bi bɛba a wobeyi ayeforokunu no afi wɔn mu, na afei saa nna no mu na wɔbɛdi mmuada.”

³⁶Ɔbɔɔ wɔn bɛ yi nso se, “Obiara ntetew ntama foforo mu asinasin mfa mpam ntama dedaw. Sɛ ɔyɛ saa a, ɔbɛtetew foforo no, na asinasin foforo no remfata dedaw no. ³⁷Obiara nngu nsa foforo nwoma kotoku dedaw mu; sɛ ɔyɛ saa a, nsa foforo no bɛpaapae nwoma kotoku no, ahwie agu, na nwoma kotoku no nso bɛsɛe. ³⁸Dabi, ɛsɛ sɛ wɔhwie nsa foforo gu nwoma kotoku foforo mu. ³⁹Na obiara a wanom nsa dedaw wie no mpɛ foforo no, efisɛ ɔka se, ‘Dedaw no yɛ.’”