Mmusua Mpanyimfo No Kasa
Manase abusua mu mpanyimfo kyerɛ sɛ, sɛ Selofehad mmabea ware fi abusuakuw no akyi a, wɔde wɔn asase bɛkɔ. Atemmu no: wobetumi aware obiara a wɔpɛ, nanso ɛnyɛ sɛ ɛyɛ wɔn agya abusua no mu, na abusuakuw biara agyapade ankɔ foforo mu komm.
Yɛn Agya kasa wɔ nkyekyɛmu 6
36 1Gilead abusuakuw no mu mmusua ti, a wɔyɛ Manase ba Makir asefo a wofi Yosef mmusua mu no, baa Mose ne ntuanofo no, Israel mmusua mpanyimfo no, anim bɛkasae. 2Wɔkae se, “Yɛn Agya hyɛɛ me wura sɛ ɔmfa ntonto nkyɛ asase no mma Israelfo sɛ wɔn agyapade, na yɛn Agya hyɛɛ me wura nso sɛ ɔmfa yɛn nua Selofehad agyapade mma ne mmabea. 3Sɛ wɔware mmarima a wofi Israel mmusuakuw afoforo mu a, wobeyi wɔn agyapade afi yɛn agyanom agyapade mu, de akɔka abusuakuw foforo a wɔaware akɔ mu no agyapade ho, na ɛno bɛma agyapade a wɔakyekyɛ ama yɛn no so atew. 4Bere a Israel Ahofadi Afe no bɛdu no, wɔn agyapade bɛka abusuakuw a wɔaware akɔ mu no agyapade ho, na wobeyi afi yɛn agyanom abusuakuw agyapade mu.”
5Enti Mose de yɛn Agya asɛm hyɛɛ Israelfo se, “Yosef abusuakuw no reka nea ɛteɛ.
6Eyi ne nea yɛn Agya hyɛ fa Selofehad mmabea ho: wobetumi aware obiara a wɔn ani gye ne ho, nanso ɛsɛ sɛ wɔware wɔ wɔn agya abusuakuw no mmusua mu nko ara.
7Ɛnsɛ sɛ Israelfo agyapade biara fi abusuakuw baako mu kɔ foforo mu; ɛsɛ sɛ Israelni biara kura ne mpanyimfo abusuakuw agyapade mu. 8Ɛsɛ sɛ ɔbabea biara a ɔnya agyapade wɔ Israel abusuakuw bi mu no ware wɔ nʼagya abusuakuw no mmusua mu, sɛnea ɛbɛyɛ a Israelni biara bɛkora nʼagyanom agyapade. 9Ɛnsɛ sɛ agyapade biara fi abusuakuw baako mu kɔ foforo mu; ɛsɛ sɛ Israel abusuakuw biara kura nʼankasa agyapade mu.”
10Sɛnea yɛn Agya hyɛɛ Mose no, saa ara na Selofehad mmabea no yɛe. 11Selofehad mmabea Mahla, Tirsa, Hogla, Milka ne Noa waree wɔn agya nuanom mmabarima. 12Wɔwaree wɔ Yosef ba Manase asefo mmusua mu, na wɔn agyapade kaa wɔn agya abusuakuw no mmusua mu.
13Eyinom ne ahyɛde ne mmara a yɛn Agya nam Mose so de hyɛɛ Israelfo wɔ Moab tataw so, Yordan ho wɔ Yeriko.
