Pholu Wásonika kwena Bisi Khoditu

Pholu wisi zonzila ngyengu, bumvwanzi, yi mvwalangani ya bikalulu muna Dibundu dyapha dina dyenina mu phasi—amana wisi heka Dibundu malongi ma lawu kitadidini lungongu.

Tata wetu kisi zonza mu vese 19

Kapitulu 1.

Meni Pholu, wuna wátedubwa yikala thumwa wa Kidisitu Yesu muna luzolu lwa Tata wetu, yi phangi wetu Sositeni, kwena Dibundu dya Tata wetu dina dyenina ku Khoditu: benu bana bátomisabwa mwena Kidisitu Yesu, batedubwa bakala batu ba Nzambi, ha kimosi yi batu boosu muma mwosu bana bisi tela khumbu ya Pfumu wetu Yesu Kidisitu, Pfumu wa bawu yi Pfumu wetu. Khenda yi ngemba byakala kwena benu, byena byisi tuka kwena Tata wetu yi Pfumu Yesu Kidisitu.

Matondu kikuma kya Khenda ya Tata wetu

Mbala zoosu yisi vutula matondu kwena Tata wama kikuma kya benu, kikuma kya khenda yina Tata wetu káluheka mwena Kidisitu Yesu, mukuma mwena yandi lwakituka bamvwama mu mambu moosu, mu nzonzidi yosu yi mu luzayi lwosu, bwosu kimbangi kikuma kya Kidisitu kyázyamisabwa hana kati dya benu, ndangu lukondaku keti dikabu dimosi, bwosu lwisi hingila yi tsambu ya lawu kumonika kwa Pfumu wetu Yesu Kidisitu, yandi kakwisa phi lusyamisa tii ku tsuka, ndangu lwakala bakonda kifu muna kilumbu kya Pfumu wetu Yesu Kidisitu. Tata wetu kenina wa kwikama, yandi wuna kálutedila mu kithwadi kya lawu yi Mwana wandi, Yesu Kidisitu Pfumu wetu.

Baphangi Bafwana Kukhundakana

Baphangi, yilulombi mu khumbu ya Pfumu wetu Yesu Kidisitu: boosu luyukana; ngyengu zakálaku hana kati dya benu, kaasi lukhundakana mu mbundu yimosi yi mabanza mamosi. Mukuma batu ba Kholowe básongila kwena meni, baphangi bama, ni ngyuma zenina hana kati dya benu. Disongidila: kosu mutu wa benu wisi zonza: «Meni, yenina wa Pholu», «Meni, yenina wa Apholosi», «Meni, yenina wa Sefwasi», «Meni, yenina wa Kidisitu». Kidisitu wadikabisa? Pholu wábakhanabwa ha mukhoka kikuma kya benu? Kondilo lwabótama mu khumbu ya Pholu? Mvutudi matondu kwena Tata wetu mukuma yíbotikaku mutu mu benu, kaka Khisiphusi yi Ngayusi, ndangu ka mutu ku walenda zonza ni lwabótama mu khumbu yama. Yíbotika phi batu ba nzu ya Setufwani; ku manima ma bwabuna, yimuzayiku kana yíbotika mutu wa hika. Kidisitu kánthumaku mu kubotika, kaasi mu kusamuna Musamu wa Bukheti; ka mu ndinga za mudimu wa kimutu lwesi ku, ndangu mukhoka wa Kidisitu wawongumunwaku ngolu zandi.

Ngolu za Mukhoka

Musamu wa mukhoka wenina buzoba kwena babana bisi kwenda mu kutota, kaasi kwena betu bana bisi huluka, wenina ngolu za Tata wetu.

Mukuma básonika: Yikazímbisa mudimu wa batu badimuka, amana yikatula ngangu za batu ba ngangu.

Kweti kenina mutu wadimuka? Kweti kenina mulongi wa mitsiku? Kweti kenina nzonzi wa tangwa dyadi? Keti Tata wetu kákitula mudimu wa tsi yayi hanga kilawu? Mukuma, muna mudimu wa Tata wetu, tsi kámuzayaku mu mudimu wa yawu meni, wásephila mu kuhulula bakwikidi mu nzila ya buzoba bwa mamana tusamuna. Mukuma Bayuta bisi lomba bidimbu, amana bisi Ngeleki bisi sanda mudimu, kaasi betu tubati samuna Kidisitu wuna wábakhanabwa ha mukhoka, kisinza kya kubwila kwena Bayuta amana buzoba kwena baphani, kaasi kwena babana batedubwa, kana Bayuta kana bisi Ngeleki, Kidisitu kenina ngolu za Tata wetu yi mudimu wa Tata wetu. Mukuma buzoba bwa Tata wetu bwenina yi mudimu kuluta batu, amana lebakani kwa Tata wetu kwenina yi ngolu kuluta batu.

Baphangi, lutala buna lwátedubwa: mu benu, batu badimuka mu nzila ya batu bákalaku balawu, batu ba ngolu bákalaku balawu, batu ba kibutuku kya luzitu bákalaku balawu. Kaasi Tata wetu wásola bazoba ba tsi hanga kabakwatisa tsoni batu badimuka, amana wásola batu ba lebakani ba tsi hanga kabakwatisa tsoni batu ba ngolu, amana Tata wetu wásola bima bya tsi bina byakala mu kudikulumuna yi bina byalewulwa, bima bina bisiku kala, hanga kakatula bima bina byenina, ndangu ka mutu ku walenda kudizangula ku thwala ya Tata wetu. Mu yandi lwenina mwena Kidisitu Yesu, wuna wákituka mudimu wetu wisi tuka kwena Tata wetu, masonga metu yi bukheti bwetu yi luhulusu lwetu, ^a ndangu, bwosu básonika: «Wuna wisi kudizangula, kadizangula mwena Pfumu.»