Phetelu Wásonika kwena Batu Bámwangana

Kikesa kwena bakidisitu bana bisi nyokwama kikuma kya lukwikilu lwa bawu, mu kubayubulula kivuvu kya bawu kya moya amana ni bawu benina batu ba Tata wetu bana básola.

Tata wetu kisi zonza mu vese 16

Kapitulu 1.

Meni Phetelu, muthumwa wa Yesu Kidisitu, kwena bakangadi babana básola, bana bámwangana muna Phoni, Ngalatiya, Kaphatosi, Aziya yi Bitini. Básola bwosu Tata wetu kátekila zaya, basemisa mu Kitembu Kyatoma, ndangu lulemvukila kwena Yesu Kidisitu amana lusophulwa menga mandi: khenda yi ngemba byavula kwena benu.

Butuka mu Kivuvu kya Moya

Khembu yakala kwena Tata wetu, yandi Tata wa Pfumu wetu Yesu Kidisitu: mu kyadi kyandi kya lawu, wátubutisa mu mbala yikwawu mu kivuvu kya moya, mu nzila ya lufutumuku lwa Yesu Kidisitu mu mvumbi, mu kimvwama kina kyisiku fwa, kina kyisiku bola, kina kyisiku hwa, kina kyasweku mu mazilu kikuma kya benu, Benu lwatsinzudwa mu lukwikilu mu ngolu za Tata wetu, kikuma kya luhulusu luna lwena lukubama mu kumonika mu tangwa dya tsuka. Mu mamana lwena mu kyesi kya lawu, kaasi buthwena, mu tangwa dya khunda, bulombi ni lwayuka kiwayi mu phasi za mutindu wosu. Mamana máhangama ndangu lukwikilu lwenu, luna bámeka amana lwamonika lwa kyedika—luhitini wolu mu thalu, wolu wuna wusemwa mu mbawu amana wuna wakwisa fwa—lwanata nkembulu, khembu yi luzitu, tangwa kakwisa monika Yesu Kidisitu. Lumumweniku meni, kaasi lwena muzola; kana lumumonaku buthwena, lwena mukwikila, lwena sangwala yi kyesi kina kyisiku lenda kuzonzwa amana kyenina yi khembu, mukuma lwena tambula kisina kya lukwikilu lwenu, luhulusu lwa moya myenu.

Bambikudi bana bázonzila khenda yina yenina kikuma kya benu, basanda amana batala bukheti-bukheti kikuma kya luhulusu meni, mu kusosa tangwa yi mambu mana Kitembu kya Kidisitu kina kyakala mwena bawu kyasóngila, tangwa kátekila samuna phasi za Kidisitu yi khembu zina zakwísa landa kunima, Bázayiswa ni basadilaku bawu-meni, kaasi benu basadila, tangwa bázonzila mambu mana, mana buthwena basamwana kwena benu mu nzila ya batu bana bálulonga Musamu wa Bukheti mu ngolu za Kitembu Kyatoma kina kyatuma tuka ku zilu. Kana bambasi bazodini kutala mambu mana.

Bátelwa mu Kukala Batoma

Yi hakana, kubikenu mabanza menu mu kisalu amana lukala ha tambu mboti-mboti, tulenu kivuvu kyenu kyosu ha khenda yina yakwisa kwena benu tangwa kakwisa monika Yesu Kidisitu. Hanga bana ba bulemvu, lulandukilaku tsambu zina lwalanda muna tangwa dya kukonda kwenu mazaya. Kaasi bwosu wuna wulutela kenina watoma, buna benu phi lukala batoma mu byosu lwahanga;

mukuma básonika: «Lukala batoma, mukuma meni yena watoma.»

Bwosu lwena tela Tata wuna wuzenga mambu ma kosu mutu konda kuswasisa batu, zingilenu tangwa dyenu dya kinzenza hana tsi yayi mu bweya. Luzayi ni phalata yi wolu, bina bisi fwa, byalutabwadiku mu luzingu lwa mpamba luna bakhulu benu bálutambika, kaasi mu menga ma thalu ma Kidisitu, hanga mukoku wukondi kifu, wukondi mvindu. Básola ku thwala dya luyandiku lwa tsi, amana wámonika mu bilumbu bya tsuka kikuma kya benu. Mu nzila ya yandi, lwena kwikila mwena Tata wetu, wuna wámufutumuna mu mvumbi amana wámuheka khembu, ndangu lukwikilu lwenu yi kivuvu kyenu bikala mwena Tata wetu.

Bwosu lwasemisa moya myenu mu kulemvuka ku kyedika kikuma kya lungongu lwa kyedika lwa baphangi, luzodilana lawu mu mbundu ya kasemi. Mukuma lwabutuka mu mbala yikwawu, heku mu khuna wuna wusi fwa, kaasi mu khuna wuna wisiku fwa, mu nzila ya ndinga ya moya yi yina yisi zinga ya Tata wetu. Mukuma, «Batu boosu bafwanani yi mwangu, amana khembu ya bawu yosu yifwanani yi bifulu bya bilanga; mwangu wuyumukini amana bifulu bibwini, kaasi ndinga ya Tata wetu yakwamina mvula yi mvula.» Amana ndinga meni yina yalusamwana kwena benu.