Tata Wakatula Tavidi ku Mvita
Batudibeni ba Bafilisiti bazolaku ni Tavidi kalanda ku manima ma bawu, mukuma babanza ni kalenda khituka mbeni wa bawu mu tangwa dya mvita, hanga kanunga hika mamboti ma pfumu wandi wa khulu. Akisi, wuna kámusila mbundu yosu, wámuvutula ku nzu yi ndinga za mboti. Tavidi wávutula ndinga, amana Tata wetu wámukeba mu konda kota mu mvita yi Kiseledi.
29 1Amana Bafilisti bákhokika batu ba bawu boosu ba mvita ku Afeki, hanga batu ba Kiseledi bázinga ku tho ya mamba ku Yizeleli. 2Buna bapfumu ba Bafilisti bákatuka mu bibuka bya khama yi bya mafunda, Tavidi yi batu bandi bákatuka ku manima hakimosi yi Akisi.
3Batudibeni ba Bafilisti báhyula: «Biki bisi hanga Bahebelu baba haha?» Akisi wubazimbwadi: «Yandi wuna Tavidi, musadi wa Sawulu kyamvu wa Kiseledi. Kákala yi meni bilumbu bibi, kondilo, mvula zazi, amana tuka kilumbu kina kábwila kwena meni yi buthwena, mboniku keti kikuma kimosi mwena yandi.»
4Kaasi batudibeni ba Bafilisti bámuyukila khabu amana bazimbudi: «Vutula mutu wuna ku homa hina wámuheka yandi. Kafwaniku kwenda mu mvita hakimosi yi betu, ndangu kalenda khituka mbeni wetu mu tangwa dya mvita. Mu khi phila kalenda nunga mamboti ma pfumu wandi, kuluta ni mitwa mya batu betu meni? 5Ka yandi ku Tavidi wuna báyimbila mu makinu ma bawu, bazimbula: “Sawulu wáhonda mafunda mandi, Tavidi makumi ma mafunda mandi”?»
6Buna Akisi wátela Tavidi amana wuzimbudi: «Nana Pfumu Nzambi kenina mu luzingu, wenina mutu wasungama, amana yakala yi kyesi ni ngeyi wákatuka yi kukota hakimosi yi meni muna nganda ya mvita. Mboniku keti kikuma kimosi mwena ngeyi tuka kilumbu kina wísa kwena meni yi buthwena. Kaasi bapfumu bakusolaku.» 7«Buna, vutuka amana wenda mu ngemba, hanga wahangaku kima kya mbi ku mesu ma bapfumu ba Bafilisti.»
8Kaasi Tavidi wuzimbudi: «Biki yahangidi?» «Khi kima wumonini mwena musadi waku, tuka kilumbu kina yísa kwena ngeyi yi buthwena, ndangu kafwaniku ni yenda nwana bambeni ba pfumu wama kyamvu?»
9Akisi wuzimbudi kwena Tavidi: «Nzayi ni kwena meni wenina wa mboti ku mesu mama nana wanzyo wa Nzambi. Kaasi batudibeni ba Bafilisti bazimbudi: “Kafwaniku kwenda hakimosi yi betu mu mvita.”» 10«Buna tokama muna suka, ngeyi yi basadi ba pfumu waku bana bísa yi ngeyi; tokama muna suka amana wenda bu kwakya kuma.»
11Buna Tavidi yi batu bandi bátokama muna suka mu kuvutuka ku Filisti bu kwakya kuma, hanga Bafilisti bátombuka ku Yizeleli.
