Sawulu yi Bana Bandi Babwa mu Mvita
Mvita ha mongu wa Ngiluboa yáyenda mbi. Yonatani yi baphangi bandi báhondwa, Sawulu wálwekama kwa bana bisi losa misongi, amana munati wa binwaninu byandi kázola kumuzanga ku, buna wábwa hana mbedi yandi mosi ya phoku. Bafilisiti bákangika lutu lwandi ha kibaka; bayakala ba Yabeshi-ngaladi bákatula dyawu.
31 1Amana Bafilisiti bánwana yi bisi Kiseledi; bayakala ba Kiseledi bátina amana bábwa bafwa ha mongu wa Ngiluboa. 2Bafilisiti bálanda Sawulu yi bana bandi tii bábakwata, amana Bafilisiti báhonda Yonatani, Abinatabi yi Malikisuwa, bana ba Sawulu. 3Mvita yámukakidikisa ngolu Sawulu. Bana bisi losa misongi bámuwana, amana wálwekama ngolu kwena bawu. 4Sawulu wuzimbudi kwena munati wa binwaninu byandi: «Katula mbedi yaku ya phoku amana wuntubula, holo bangulungu baba kabisa, kantubula, amana kangyangisa.» Kaasi munati wa binwaninu byandi kázolaku, mukuma bweya bwámukwata. Buna Sawulu wábonga mbedi yandi mosi ya phoku amana wábwa hana yawu. 5Bwosu munati wa binwaninu byandi kámona ni Sawulu wufini, yandi phi wábwa hana mbedi yandi ya phoku amana wáfwa hakimosi yi yandi. 6Buna Sawulu wáfwa muna kilumbu kina, hakimosi yi bana bandi batatu, munati wa binwaninu byandi, yi bayakala bandi boosu.
7Bwosu bayakala ba Kiseledi bana bakala ku sambwa dikwawu dya beti yi ku sambwa dikwawu dya Yolutani bámona ni baphumbulu ba Kiseledi bámana tina amana ni Sawulu yi bana bandi bámana fwa, básisa mavula ma bawu amana bátina. Amana Bafilisiti bisa bázinga mwamuna. 8Kilumbu kyálanda, Bafilisiti bisa ndangu bawomuna bafwa, amana bámona Sawulu yi bana bandi batatu babwa ha mongu wa Ngiluboa. 9Bátabudi mutwa wandi, bámuwomuna binwaninu byandi, amana bátuma bambambala muna tsi yosu ya Bafilisiti ndangu basamuna tsangu muna nzu za nzambi za biteki bya bawu yi hana kati dya batu ba bawu. 10Básya binwaninu byandi muna nzu ya nzambi Asitaloti amana bánamika mvumbi yandi ku kibaka kya Beti-sani. a a v10 Asitaloti kákala nzambi mukhetu wa bisi Kanani; kusya binwaninu bya Sawulu muna nzu yandi kwákala nzila ya Bafilisiti mu kuhana banzambi ba bawu lunungu.
11Bwosu bisi Yabesi-ngiliyadi báyuka mana Bafilisiti bahanga kwena Sawulu, 12bayakala boosu ba mvita ba bawu bákangala mu phipha yosu, bábonga mvumbi ya Sawulu yi bamvumbi ba bana bandi ku kibaka kya Beti-sani, bábanata ku Yabesi amana bábayokila kwakuna. 13Bábonga bifufwa bya bawu, bázika byawu ku sina dya nti tamasi ku Yabesi, amana bazíla madya bilumbu tsambwadi.
