Kwena Timoti, Mwana wama wa Kyedika

Milongi mya Pholu kwena Thimoti wa moya mu diambu dya kuyidika Dibundu amana mu kukengila malongi ma masonga.

Kapitulu 1.

Meni Pholu, thumwa wa Kidisitu Yesu mu muswa wa Tata wetu, Mphulusi wetu, yi wa Kidisitu Yesu kivuvu kyetu, kwena ngeyi Thimoti, wuna mu lukwikilu wenina mwana wama wa kyedika: khenda, kyadi yi ngemba bituka kwena Tata wetu yi Kidisitu Yesu Pfumu wetu.

Kinda Nzu ya Tata

Bwosu yákuzimbwala muna tangwa dyákatuka kwenda ku Mansedoni, zakala ku Efeso hanga wuzimbwala batu bahika ndangu balongaku malongi makaswaswana, amana badihanaku mu phandi yi mu ndonga za butuka zikonda tsuka, zina zisi buta phaka za phamba, kaasi lwesi kiyeka kya Tata wetu kina kyenina mu lukwikilu. Tsuka ya muswa wawu yenina lungongu luna lwisi tuka mu mbundu ya kasemi, yi katsatsa ka mboti, yi lukwikilu lwa masonga. Batu bahika bayekukini mu mamana amana bahukumukini ku ndinga za phamba, bwosu bazodini kukala balongi ba mitsiku, mbatanana bázayaku mana bisi zonza keti mana bisi zonzila yi nziki-nziki.

Buthwena, tuzayini ni mitsiku myenina mya mboti, yuka ni basadila myawu bwa kyedika; yi kuzaya ni mitsiku myeku myasidila batu ba masonga, kaasi myasidila bakwa mitsoki yi bakolami, batu ba mbi yi bakwa masumu, batu bakonda kinzambi yi babana bisi lewula, babana bisi beta batata ba bawu yi bamama ba bawu, bana bisi honda batu, babana bisi vola kindumba, bayakala bisi leka yi bayakala, batu bisi sumbisa batu, bakwa luvunu, bana bisi lefisa ndefi za luvunu, yi kyosu kina kisi tendisa malongi ma bukheti, bwosu bwenina mu Musamu wa Bukheti wa khembu wa Tata wetu wa busakumunu, wuna bámpheka meni.

Kyadi kya Tata Kyákwisila kwena Mubi Yankunina

Yivutula matondu kwena Kidisitu Yesu Pfumu wetu, wuna wángyika kikesa, kikuma kya buna kámona meni hanga mutu wa sila mbundu, amana wáthuma mu kisalu kyandi. Theti yátukwana Nzambi, yáyangisa batu amana yákala mukwa kingolu-ngolu; mbatanana kyadi yimúyukila, kikuma mu kukonda kuzaya yáhangila, mu kukonda lukwikilu. Khenda za Pfumu wetu zavula lawu kwena meni, hakimosi yi lukwikilu yi lungongu luna lwenina mwena Kidisitu Yesu. Yayi yenina ndinga ya kyedika, yina yafwana ni batu boosu bayitambula: Kidisitu Yesu wakwísa mu tsi hanga kahulula bakwa masumu—meni, mutu wa mbi yankunina muna bawu. Kaasi kyadi yimúyukila kikuma kya dyadi: mwena meni, mutu wa mbi yankunina muna bakwa masumu, Kidisitu Yesu wafwana kusongila sipha dyandi dyosu, hanga mbandu kwena babana bakála kwikila mwena yandi mu luzingu lwa mvula yi mvula. Kwena Kyamvu kya matangwa moosu, wuna wisiku fwa, wisiku monika, Nzambi wumosi kaka, kwena yandi lukumu yi khembu za mvula yi mvula! Abwabuna.

Nwana Muzingu wa Bukheti

Thimoti, mwana wama, yikusidini muswa wawu, bwosu bwenina mbikutulu zina zázonzilwa theti kikuma kya ngeyi, ndangu mu zawu wanwana muzingu wa bukheti, amana wasimbidilaka lukwikilu yi katsatsa ka mboti. Mu kulewula mamana, batu bahika bátotisa nzila ya lukwikilu lwa bawu, hanga masuwa mana mafwa, mu kati dya bawu benina Kimeni yi Alekizande, bana yáhana kwena Satana ndangu balonguka konda kutukwana Nzambi.