Batwadisi muna nzu ya Tata
Bikalulu, ka kuvwa ku, bisi sola batwadisi. Mutwadisi kafweti kala wakonda kifu, mutu wa buweti, wisi zola mbongu ku, amana wulenda twadisa bukheti nzu yandi-meni; basyelu bamekwa theti. Pholu wásonika hanga Timote kazaya mutindu wa kudibatila muna nzu ya Tata wetu, amana wátanga nkunga wa Kidisitu.
3 1Ndinga yayi yenina ya kyedika: mutu wuna wuzodi kala mutwadisi, wuzodi kisalu kya mboti. 2Yihana, bulungi ni mutwadisi kakala wakonda kifu: mutu wa mukhetu mosi, mutu wa kudilunda mboti-mboti, mutu wa kukanga mbundu, mutu wa ndonga, mutu wisi yamba batu, mutu walunga mu kulonga. 3Kakalaku kinwa malafu, kakalaku lwasa kaasi kakala mutu wa buweti, kayumanaka, amana kakalaku wisi zola mbongu. 4Kafweti twadisa bukheti nzu yandi, amana bana bandi balemvukaka kwena yandi ni luzitu lwosu, 5mukuma yuka ni mutu kazaya ku kutwadisa nzu yandi, khi mutindu kalunda Dibundu dya Tata wetu? 6Kakalaku mutu wa pha mu lukwikilu, ndangu kalenga zakama yi lulendu amana kabwa mu pfundusu yimosi yi kiphidi-mutu. 7Kafweti phi kala yi khumbu ya mboti kwena batu ba ku phenza, ndangu kabwaku mu tsoni yi mu mutambu wa kiphidi-mutu.
8Basyelu phi bulungi bakala batu ba luzitu, bakalaku ba ludimi lodi, bakalaku ba malafu ma lawu, basandakaku lufutu lwa tsoni. 9Bafweti simbidila diswekamu dya lukwikilu ni katsasa ka kasemi. 10Bawu phi bulungi bamekwa theti; buna yuka ni bámonika bakonda kifu, basala kisalu kya basyelu. 11Bakhetu phila mosi phi bulungi bakala batu ba luzitu, bakalaku bakwa nzonzidi yambi, kaasi bakala ba kudilunda mboti-mboti amana ba kwikama mu mambu moosu. 12Musyelu kakala mutu wa mukhetu mosi, amana katwadisa bukheti bana bandi yi nzu yandi. 13Basyelu bana basadila kisalu bukheti, babonga kifulu kya mboti yi kikumbwala kya mbuta mu lukwikilu lwa mwena Kidisitu Yesu.
Diswekamu dina dyenina mu mbundu ya lukwikilu lwetu
14Yilusonikina mikuku myami mama, ketibwe tsini kivuvu ni ka thama ku yikwisa lutala benu. 15Kaasi yuka ni yizingidila, lwazaya mutindu bufwani mu kudyatila muna nzu ya Tata wetu, Dibundu dya Tata wa moyu, kunzi yi mupfundila wa kyedika. 16Mu kyedika, diswekamu dya kuyekamina kwena Nzambi dyenina dya mbuta: wámonika mu kimutu, wámonika wa masonga mu Kitembu Kyatoma, banzyo bámumona, bámusamuna kwena makanda, bákwikila mwena yandi mu tsi yosu, bámubonga ku zilu mu khembu. a a v16 Lukwikilu lwa theti lwaku lwisi yimbila Yesu—yandi wuna wakwísa mu kimutu, wáfutumuka wa masonga, amana wábongwa ku zilu mu khembu; «yandi» wisi songila yandi mu moosu mama.
