Yosafati Wukangala yi Tata
Tata wetu kákala yi Yosafati mukuma wásanda yandi, kaasi ka banzambi ba Baali ku. Kisalu kyandi kya lukumu kyákala mu kuthuma bapfumu yi balefi ni mukanda wa milongi mya Tata wetu ndangu balonga muna mbanza zoosu za Yuta, amana Kipfumu kyandi kyázyama, kyákituka ngolu, kimvwama yi kibwene ni bima bilawu.
17 1Mwana wandi Yosafati wákituka kyamvu mu fulu kyandi, amana wádisyamisa mu kunwanisa Kiseledi. 2Wásya baphumbulu muna mbanza zoosu za ngolu za Yuta, yi batu ba lukengelu muna tsi ya Yuta yi muna mbanza za Efwayimi zina tata wandi Azafu kábonga. 3Tata wetu kákala yi Yosafati, mukuma wákangala muna nzila za theti za tata wandi Tavidi, kákonda sanda banzambi ba Baali. 4Kaasi, wásanda Tata wuna tata wandi kasadila, wálemvwakila mitsiku myandi, amana ka walanda mihangu mya Kiseledi ku. 5Buna Tata wetu wásyamisa Kipfumu mu koku kyandi; Yuta dyosu dyánata makabu kwena Yosafati, amana wákala yi kimvwama kya lawu yi luzitu. 6Mbundu yandi yákala muna nzila za Tata wetu; wákatula bifulu bya zulu yi miti mya Ashela muna Yuta. a a v6 Bifulu bya zulu byakala bibuangu bya nganda hana malondi bina bakala sadila mu kusambilila biteki; miti mya Ashela myakala biteki bya miti bina básema kikuma kya nzambi mukhetu wa Bisi Kanana, Ashela.
7Muna mvula ya tatu ya kipfumu kyandi, wáthuma bapfumu bandi Beni-hali, Obadiya, Zakadiya, Netaneli, yi Mikaya mu kulonga muna mbanza za Yuta, 8amana balefi ha kimosi yi bawu: Shemaya, Netaniya, Zebadiya, Asaheli, Shemilamoti, Yehonatani, Adoniya, Tobiya, Tobi-adoniya; amana ha kimosi yi bawu banganga Nzambi Elishama, Yeholami. 9Bálonga muna Yuta dyosu, mu kunata mukanda wa milongi mya Tata wetu, mu kwenda muna mbanza zoosu za Yuta, mu kulonga batu.
10Bweya bwa Tata wetu bwábwila hana thandu ya bipfumu byosu bina byákala nzunga za Yuta, buna byanwanaku mvita yi Yosafati ku. 11Ndambu ya Bafilisiti bánata makabu kwena Yosafati yi phaku ya mbongu; Bisi Alabiya bánata bibuka: mikoku mafunda matsambwadi yi nkama tsambwadi, yi bakhombu ba bayakala mafunda matsambwadi yi nkama tsambwadi. 12Yosafati wákwamina mu kukola ngolu, amana wátunga mbanza za ngolu yi mbanza za kulundila bima muna Yuta. 13Wákala yi bima bya lawu muna mbanza za Yuta, yi baphumbulu ba ngolu muna Yelusalemi. 14Tanga ya bawu ku mbandu ya makanda ma batata: muna Yuta, bapfumu ba mafunda—Adina pfumu, ha kimosi yi yandi baphumbulu ba ngolu nkama tatu ya mafunda; 15ha nima yandi wakadi Yehohanani pfumu, ha kimosi yi yandi nkama zodi yi makumi nana ma mafunda; 16ha nima Amasiya mwana wa Zikili, wuna wádihana yi luzolu kwena Tata wetu, ha kimosi yi yandi baphumbulu ba ngolu nkama zodi ya mafunda. 17Muna Benzyame: Eliyada, phumbulu wa ngolu, ha kimosi yi yandi nkama zodi ya mafunda ma batu bana bávwata matá yi bibalaka; 18ha nima yandi Yehozabadi, ha kimosi yi yandi nkama mosi yi makumi nana ma mafunda ma batu bana báyilama mu mvita. 19Batu bana basadila kyamvu, konda kutanga babana kásya muna mbanza za ngolu muna Yuta dyosu.
