Yowatami Wuyidika Nzila Zandi ku Thwala ya Tata
Yowatami wátunga mwelu wa ku zilu, wásyamisa malondi, amana wánunga bisi Amoni mu mpaku ya lawu. Kikuma kyázimbwama kyenina kya pheti — wáyidika nzila zandi ku thwala ya Tata wandi — amana kavutukilaku masumu ma tata wandi ma kukota mu nzu ya Tata wetu, ata batu kedi bahanga mambu ma mbi.
27 1Yowatami kákala yi mvula makumodi yi tanu tangwa kákituka kyamvu; wáyala mvula kumi yi sambanu ku Yelusalemi. Ngudi wandi yákala Yelusha, mwana wa mukhetu wa Satoki. 2Yandi wáhanga mana masungama mu mesu ma Tata wetu, bwosu káhanga tata wandi Ozyasi, kaasi kákotaku mu nzu ya Tata wetu. Kaasi batu kedi bahanga mambu ma mbi. 3Yandi wátunga mwelu wa ku zilu wa nzu ya Tata wetu, amana wátunga byalawu ha kibaka kya Ofele. a a v3 Ofele yákala mongo wa ngolu kuna sude ya mongo wa nzu ya Nzambi, amana yákala ndambu ya kibaka kya kati kya mbanza ya Yelusalemi. 4Yandi wátunga mbanza mu malondi ma Yuta, amana mu musitu wátunga bibaka bya ngolu yi nzu za kitsungila. 5Yandi wánwana yi kyamvu wa bisi Amoni, amana wánunga bawu. Mu mvula yina, bisi Amoni báhana kwena yandi kilo ma fwalanga mafunda matsambwadi yi khama tanu, yi bitunga bya bule mafunda makumatanu, yi bitunga bya odizi mafunda makumatanu. Phila mosi mu mvula ya zodi yi ya tatu. 6Buna Yowatami wákituka ngolu, mukuma wáyidika nzila zandi ku thwala ya Tata wandi. 7Mambu mahika ma Yowatami, mvita zandi zoosu yi mihangu myandi, másonama mu mukanda wa bakyamvu ba Kiseledi yi Yuta. 8Yandi kákala yi mvula makumodi yi tanu tangwa kákituka kyamvu, amana wáyala mvula kumi yi sambanu ku Yelusalemi. 9Yowatami wálembwa kumosi yi batata bandi; bámuzika mu mbanza ya Tavidi, amana mwana wandi Akhazi wáyala mu kiyeka kyandi.
