Awisenu Bayilama mu Kumekwa
Mbala ya tatu ya ngisa yísikidika, amana mbala yayi Pholu kabasisaku bana bakwamina mu kusala masumu. Bazodi kidimbu ni Kidisitu kisi zonza mu yandi, buna wávutula kimeka kwena bawu: ditezenu benu-benu. Kazodi kumonika kondi ngolu muna ngolu za Tata wetu amana kubawana bazínga, kuluta kwisa mu kubwisa.
13 1Yayi mbala ya tatu yisi kwisa kwena benu. «Kosu dyambu difweti zyama mu kimbangi kya bambangi bodi ho batatu.» 2Yábazimbwala ku ntheti babana básumuka, yi batu boosu bahika—bwosu yázimbula tangwa yákala meni-meni kwena benu mu mbala yama ya zodi—amana yibazimbwala buthwena bwosu yenina ha thama: Yuka ni yikwisa hika, yikabasisaku, 3kikuma lwisi zola kidimbu ni Kidisitu kisi zonza mu meni. Yandi kenina kondi ngolu kwena benu, kaasi kenina yi ngolu hana kati dya benu. 4Kikuma yandi wákhoka ha kitakani mu lebakani, kaasi wisi zinga mu ngolu za Tata wetu. Kikuma betu phi twenina kondi ngolu mwena yandi, kaasi kwena benu tukazínga hakimosi yi yandi mu ngolu za Tata wetu.
5Dizyaminenu benu-benu, kana lwenina mu lukwikilu. Ditezenu benu-benu. Lwazayiku ni Yesu Kidisitu kenina mwena benu, kondilo lwalembana mu kimeka? 6Amana yenina yi kivuvu ni lukamona ti betu-betu tulembanaku mu kimeka.
7Tusi lomba kwena Tata wetu hanga lubasalaku kima kya mbi—heku kikuma kya kudisongila ni twenina ba tambwasama, kaasi hanga lwavanga mana mena masonga, mbatanana twamonika hanga batu bakonda tambwasama. 8Kikuma tuléndaku tendana yi kyedika, kaasi kaka kikuma kya kyedika. 9Tusi sangwala tangwa twenina kondi ngolu amana benu lwenina yi ngolu; amana tusi lomba phi kikuma kya kulunga kwenu kwosu. 10Kikuma kya bwabuna yisi sonika mambu mama bwosu yenina ha thama, hanga tangwa yikala kwena benu, yikalaku yi mupfunu wa kusadila mathata, mu kusadila hamu dina káphana Pfumu—kikuma kya kutunga, heku kya kumwanga.
Lungongu yi Ngemba bya Tata
11Ku tsuka, baphangi bama, sangwalenu, syenu ngolu mu kulunga, dihekakenu kikesa benu yi benu, yukananu mu mabanza, zinganu mu ngemba—amana Tata wetu wa lungongu yi ngemba kakála hakimosi yi benu. 12Dihekakenu mboti benu yi benu mu mbumbakani yatoma.
13Batu batoma boosu baluhekini mboti.
14Khenda ya Pfumu wetu Yesu Kidisitu, lungongu lwa Tata wetu, yi kithwadi kya Kitembu Kyatoma byakala hakimosi yi benu boosu. a a v14 Lusakumunu lwalu lwa ku tsuka lusi tela batu batatu boosu ha kimosi—Mwana, Tata, yi Kitembu Kyatoma—kyakala mbembu ya bathumwa ya lusakumunu lwa banganga Nzambi luna lwásya khumbu ya Tata wetu ha batu bandi.
