Buthwena Dyenina Kilumbu kya Luhulusu
Pholu wáheka bisongidi byandi, amana byenina mabetu, boloku, phipha za konda tulu, yi ngusi. Buna wáyambula ntendani amana wábokwadila kaka: mbundu yandi yikanguki yosu, kaasi ya bawu yikangama. Wubalomba ni balubuka mu biteki amana bazínga hanga bana ba bayakala yi bana ba bakhetu ba Tata wetu meni.
Tata wetu kisi zonza mu mavese 2, 16–18
6 1Bwosu twenina basindikidi bandi ba kisalu, yiluhekini kikesa ndangu lutambulaku khenda za Tata wetu mu phamba.
2Mukuma wuzimbudi: «Muna tangwa dyafwana, yákuyuka ngeyi; muna kilumbu kya luhulusu, yákusadisa.» Tala, buthwena dyenina tangwa dyafwana; tala, buthwena dyenina kilumbu kya luhulusu.
3Thwisi syaku kisinza kwena mutu wosu mu nzila, ndangu ka kikuma kimosi ku kyamonika mu kisalu kyetu. 4Kaasi, tudisikisini mu byosu hanga basadi ba Tata wetu: mu kikwamina kwa mbuta, mu minyanga, mu biwayi, mu phasi, 5mu mabetu, mu miyololu, mu ngyuma, mu kisalu, mu phipha za konda tulu, mu nzala; 6mu kasemi, mu nzayilu, mu sipha dya mbundu, mu buweti, mu Kitembu Kyatoma, mu lungongu lwa kyedika, 7mu ndinga ya kyedika, mu ngolu za Tata wetu, ni binwaninu bya masonga mu koku kwa lubakala yi mu koku kwa lumonso, 8mu zitu yi mu mafu, mu ngusi yi mu khembu. Bisi tumona hanga bakwa bikwaki, kaasi twenina ba kyedika; 9hanga bana bazayakaniku, kaasi tuzayakana mboti; hanga bana bafwa, kaasi tala, twenina ba moya; hanga babati tunyokuna, kaasi batutuhondaku; 10hanga bana ba kyadi, kaasi kosu tangwa tusangwala; hanga batsukami, kaasi tukhitula batu balawu bamvwama; hanga batu bakonda kima, kaasi twenina yi byosu.
11Twázonza kwena benu yi tsikiningi, benu bisi Khoditu; mbundu yetu yakanguki lawu kwena benu. 12Lwisi fitakanaku kwena betu, kaasi mu mbundu zenu benu-benu lwafitakana. 13Mu kuvutula—yisi zonza kwena benu hanga kwena bana bama—yambulenu mbundu zenu phi zakanguka lawu.
Luvutuka ku Kikanda kya Tata wetu
14Lukalaku mu kithwadi yi bana bakondi kala bakwikidi. Mukuma khi kithwadi kyenina ha kati dya masonga yi kutendisa mutsiku? Ho mwini, khi kithwadi kenina kyawu yi tombi? 15Khi kuyukana kwenina ha kati dya Kidisitu yi kiphidi-mutu? Khi kima mukwikidi kenina kyawu yi mutu wukondi kala mukwikidi?
16Khi kithwadi nzu ya Tata wetu yenina kyawu yi nzambi za biteki? Mukuma betu twenina nzu ya Tata wa moya, bwosu kázimbula: «Yikazíngila ha kati dya bawu, amana yikadyáta ha kati dya bawu; yikála Tata wa bawu, amana bawu bakála bana bama.» 17Disongidila, «Lubuka ha kati dya bawu amana luswaswana, kázimbula Tata wetu, amana lusimbaku kima kya mvindu; buna yikaluyámba, 18amana yikála Tata kwena benu, amana benu lukála bana ba bayakala yi bana ba bakhetu kwena meni, kázimbula Tata wetu, Mukwa ngolu zoosu.» a a v18 Lusilu luna Tata wetu kásila mu khambu kwena mwana wa kipfumu wa Tavidi, hahana wulukangulini kwena kosu mukwikidi — yandi wukituka Tata kwena boosu bana bakwísa kwena yandi, amana betu tukituka bana bandi ba bayakala yi ba bakhetu.
