Mukabi wa kyesi
Pholu wákala zimbula kedi kwena bisi Masetwani ni Akayi dyakala dyayilama, buna wátuma bayakala batéka kwenda. Wazodi ni kabu dyahanama mu luzolu, ka mu kingolu ko, mukuma Tata wetu kisi zola wuna wisi kaba yi kyesi, amana mukuma mbongu zikituka matondu hakati dya batu bana bisi Khoditu balendaku kudimona.
9 1Mu mambu matadidini kusadila batu ba Pfumu, yeku yi mupfunu wa kulusonikina. 2Mukuma yizayi luzolu lwenu lwa mboti, amana yisi ditsikisa kikuma kya benu kwena bisi Masetwani, ni Akayi dyakala dyayilama tuka mvula yáluta, amana tsambu yenu yávwadingisa balawu ba bawu. 3Buna, yisi tuma baphangi, ndangu lulendu lwetu lwa kuditsikisa kikuma kya benu lwalembwa kala lwa phamba muna dyambu dyadi, ndangu lukala bayilama, bwosu yázimbula. 4Kondilo, yuka ni bisi Masetwani bakwísa yi meni amana báwana lukondi yilama, betu—nzodiku yikuyubulula ni benu—twáyuka tsoni kikuma kya kikumbwala kyakina. 5Buna, mboni ni bwenina bukheti mu kubokwadila baphangi ndangu bateka kwenda kwena benu amana bateka yilama kabu dya khenda dina lwásila, ndangu dyakala dyayilama hanga kabu dya luzolu lwa mboti, ka hanga kima kya kuheka mu kingolu ku.
6Yubukenu dyadi: wuna wisi kuna fyoti, kahéla phi fyoti, amana wuna wisi kuna byalawu, kahéla phi byalawu. 7Mutu wosu kahana bwosu kabonga lukanu mu mbundu yandi, ka mu munyanga ku holo mu kingolu, mukuma Tata wetu kisi zola wuna wisi kaba yi kyesi. 8Tata wetu kenina yi hamu dya kuvúdisa khenda zoosu kwena benu, ndangu, muna kukala kosu tangwa yi byosu bina luvwini mupfunu muna mambu moosu, lwavulaka muna mihangu myosu mya bukheti. 9Bwosu básonika: «Wámwanga makabu mandi kwena ba phutu; masonga mandi makwámina kyamakulu.»
10Wuna wisi hana mbutu kwena mukuni yi dipha dya kudya, kahána phi amana kavúdisa mbutu yenu, amana kayíka mbongu ya masonga menu. 11Lukakítuka bamvwama mu byosu, kikuma kya kukaba kwosu, kuna kwisi buta kuvutula matondu kwena Tata wetu muna nzila yetu. 12Kisalu kyaki lufweti sala heku ni kusadisa batu ba Pfumu mu bima bibavwini mupfunu lwesi, kaasi kyisi vudisa phi makabu ma lawu ma kuvutula matondu kwena Tata wetu. 13Mu kusongila kwa kisalu kyaki, batu bakazátula Tata wetu kikuma kya kulemvuka kwenu mu kufunguna Musamu wa Bukheti wa Kidisitu, amana kikuma kya kukaba kwenu kwa khenda kwena bawu yi kwena batu boosu bahika. 14Muna bisambu byawu kikuma kya benu, bakála yi luzolu lwalawu lwa kulumona, kikuma kya khenda yina yilutini byosu yina Tata wetu káluheka. 15Matondu makala kwena Tata wetu kikuma kya kabu dyandi dina dilembana zonzabwa!
