Kusyama mu Khenda mu Kwikama
Pholu wuzimbudi kwena Timote ni kabonga ngolu zandi muna khenda, amana kasisa malongi kwena batu ba lukwikilu bana balenda longa bakwawu phi. Phumbulu, mutambi tsaka, mukuni wa kilanga—kosu kifwani kisi songa kukwamina mu phasi. Phaka za mambu zenina za phamba; songila mu buweti, mukuma nanga Tata wetu kaheka lubaluku.
2 1Bwabuna ngeyi, mwana wama, syamisa ngolu zaku muna khenda zina zenina mu Kidisitu Yesu. 2Amana mambu mana wáyuka kwena meni ku thwala ya bambangi babingi, masisa kwena batu ba lukwikilu bana balenda longa bakwawu phi. 3Tambula khabu yaku ya minyanga hanga phumbulu ya mboti ya Kidisitu Yesu. 4Ka phumbulu ku yina yenina mu mvita yitangamaku mu mambu ma luzingu lwa tsi; mukuma yandi zodi kusephidisa wuna wámusola. 5Amana mutambi tsaka kavwataku mukhonzi, kaka yuka ni katambi tsaka bwosu buna mitsiku milombini. 6Mukuni wa kilanga wuna wisi sala ngolu, bulungini kakala wa theti mu kutambula khabu ya mbutu. 7Yindula mana mbati zimbula, mukuma Pfumu kakuhána mbakisilu mu mambu moosu.
8Sungulaka Yesu Kidisitu, wuna wáfutumuka ku bafwa, wa kikanda kya Tavidi, bwosu busamunama mu Musamu wa Bukheti wama, 9Kikuma kyandi yisi nyokuka, bánkasa mu miyololu hanga mukwa mbi. Kaasi ndinga ya Tata wetu yakasamaku mu miyololu! 10Kikuma kya bwabuna, yisi tambwasa mambu moosu kikuma kya batu basola, hanga bawu phi batambula luhulusu luna lwenina mu Kidisitu Yesu, hakimosi yi khembu ya mvula yi mvula. 11Ndinga yayi yenina ya kyedika: Yuka ni twáfwa kumosi yi yandi, tukazínga phi kumosi yi yandi; 12yuka ni tusipha mbundu, tukayala phi kumosi yi yandi; yuka ni tumutuna, yandi phi kakatútuna; 13yuka ni tukondi lukwikilu, yandi kabati kala wa lukwikilu, mukuma kalendaku kudituna yandi-meni.
Musadi wuna watambwasa kwena Tata
14Yubulula bawu mambu meni, amana balwengisa ku thwala ya Tata wetu ni banwanaku phaka za ndinga—zina za phamba amana zisi totisa bana bisi yuka.
15Sya ngolu wakudisongila kwena Tata wetu hanga mutu watambwasa, musadi wukondi tsoni, wuna wisi sungika bufwani ndinga ya kyedika. 16Kaasi tina phandi za phamba yi za masafu, mukuma zisi natina batu ku thwala mu mbi, 17amana ndinga za bawu zikayalangana hanga mputa yina yisi dya nitu. Muna kati dya bawu mwenina Kimeni yi Philatu, 18bana bátota mu kyedika, bisi zimbula ni mfútumuku ya bafwa yábwa kala, amana bisi bwisa lukwikilu lwa batu bahika. 19Kaasi mupfundila wusyama wa Tata wetu wenina watelama, wunamika kidimbu: «Kazaya bana benina ba yandi», amana «Boosu bana bisi tela khumbu yandi bafweti katuka mu mbi.»
20Muna nzu yanene mwenina bilekwa, ka bya wolu yi phalata kaka ku, kaasi phi bya miti yi bya tuma—bihika bya lukumu, bihika bya mafu. 21Bwabuna, yuka ni mutu kadisemisa mu mambu meni, yandi kakituka kilekwa kya lukumu: kyasema, kya mupfunu kwena Pfumu, kiyilama mu kuhanga moosu ma bukheti.
22Tina nzoluka za bumwana; sanda masonga, lukwikilu, lungongu, yi ngemba kumosi yi bana bisi tela khumbu ya Pfumu mu mbundu yasema. 23Tina matendu ma buzoba yi ma konda ngangu; wuzayi ni masi buta ngyuma. 24Musadi wa Pfumu kafwaniku kala mukwa ngyuma, kaasi kakala mutu wa talala kwena boosu, wuna wulenda longa, wuna wisi sipha mbundu tangwa bamuhanga mbi. 25Mu lembami dyosu, kasungika bana babati mutendisa. Ngatu Tata wetu kakabahána tsobuka ya bikalulu ndangu bazaya kyedika, 26amana badikwatikisa, mu kukatuka mu mutambu wa kiphidi-mutu wuna kábakwata hanga bakwa boloku mu kuhanga luzolu lwandi.
