Thimoti Wukhundakani mu Kisalu

Tata wetu wábabokila mu lumonu lwa yakala mwisi Masetwani. Didya wáyafwadila nzu yandi; musadi wa mukhetu wa kubikula wálubuka mukisi wandi, amana bapfumu bandi bakondi mbongu ya bawu. Bwosu bábetwa amana bákangwa ni misinga, Pholu yi Silasi báyimbila muna phipa, tsi yánikana amana myelu myáyafwadila, amana nsinzidi wa boloku wábotikwa.

Kapitulu 16.

Pholu wénda ku Delebi yi ku Lisiti. Kwákala kwakuna mulonguki mosi bakala tela Thimoti, mwana wa mukhetu mosi mwisi Bayuta wuna wakála yi lukwikilu, kaasi tata wandi mwisi Ngeleti kákala. Baphangi ba ku Lisiti yi ku Kikonyumi bakala mubanza mboti. Pholu wázola ni Thimoti kenda yi yandi, buna wámubonga amana wámuyotisa, kikuma kya Bayuta bana bakála mu mahata mana, mukuma bawu boosu bázaya ni tata wandi mwisi Ngeleti kákala. Muna kuluta mu mbanza, bábasongila malukanu mana bábonga bathumwa yi bambuta ba ku Yelusalemi, hanga balunda mawu. Buna Mabundu máyuka ngolu mu lukwikilu amana máyika balawu kosu kilumbu.

Tata Wababokidi ku Masetwani

Bawu báhitila muna nzunga ya Filingiya yi ya Ngalatiya, mukuma Kitembu Kyatoma kyábakandika mu kuzonza ndinga mu Aziya. Kunima dya kutula ku Misiya, básanda ni bakota mu Bithundu, kaasi Kitembu kya Yesu kibayambulaku. Buna, kunima dya kuluta ku Misiya, bákulumuka ku Thowasi. Muna phipha, Pholu wámona lumonu: yakala mosi mwisi Masetwani watelama, wukala kulombila: «Lutila ku Masetwani amana watusadisa.» Kunima dya kumona lumonu, muna mbala mosi, twásanda ni twenda ku Masetwani, bwosu twabánza ni Tata wetu wátubokila mu kubasamwana Musamu wa Bukheti.

Lidiya Wuyafudi Mbundu Yandi ku Fidiphu

Buna twálabuka tukidila ku Thowasi, twátadisa ku Samothalasi, amana kilumbu kyalanda ku Neyapodisi, amana ha twákatuka kwakuna, thwénda ku Fidiphu, mbanza yimbuta mu nzunga yina ya Masetwani, mbanza yimosi ya bisi Loma. Twánanga kwakuna hika ndambu ya bilumbu.

Muna kilumbu kya Saba, twálubuka ku phenza ya luphangu, thwénda ku nzadi, bwosu twabánza ni henina homa ha kulombila. Twázakama amana twázonza yi bakhetu bana bákhokama kwakuna. Mukhetu mosi bakala tela Lidiya, mwisi Thiyatila, wuna wakala tekisa miledi mya kabengi amana wakala kumisa Tata wetu, kakala yuka. Pfumu wáyafulula mbundu yandi ndangu kahinikina ndinga za Pholu. Kunima dya kubotika yandi yi batu ba nzu yandi, wátulomba: «Yuka ni lwambanza ni yikwikila kwena Pfumu, lwakwísa ku nzu yama amana lwananga kwakuna.» Amana wátukwikisa.

Básya mu Boloku kikuma kya Musamu wa Bukheti

Muna kwenda kwetu ku homa ha kulombila, twáwana mvika mosi wa mukhetu wuna kákala yi kitembu kya bungombu; kakala vwisa bakwa yandi mbongu ya lawu mu kungula mambu. Kakala landa Pholu yi betu, mu kukalunga: «Batu baba basadi ba Nzambi wuluti zangama, bisi lusamwana nzila ya luhulusu.» Kakala sala bwabu bilumbu bya lawu. Pholu, bwosu kásidika mu mbundu, wábaluka amana wázimbula kitembu: «Yikútuma mu khumbu ya Yesu Kidisitu ni walubuka mwena yandi.» Muna mbala mosi, kyálubuka.

Tangwa bakwa yandi bámona ni kivuvu kya bawu kya mbongu kízimbala, bámukwata Pholu yi Sila, bababulumuna ku zandu ku thwala ya bapfumu. Kunima dya kubanata kwena bapfumu, bazimbudi: «Batu baba Bayuta bakála, bawu bisi kotisa mvwalangani mu mbanza yetu. Bawu bisi longa mikuku mina mafwaniku kwena betu bisi Loma mu kutambula holo mu kusadila.»

Milumba-lumba mya batu myátambwasa mu kubahanga, amana bapfumu bábasutula miledi mya Pholu yi mya Sila, báhana muswa ni babeta bawu ni misyangina. Kunima dya kubabeta ngolu, bábalosa mu boloku, báhana muswa kwena nkengi wa boloku ni kabakengila buna bwa bukheti. Bwosu kátambula muswa meni, wábazika mu suku kyahedila dya mukati amana wákanga malu ma bawu mu misinga.

Bela-bela yi kati kya phipha, Pholu yi Sila bakala lomba amana bakala yimbila mikunga mya khembu kwena Tata wetu, buna bakwa boloku bakala babayukila. Muna mbala mosi, mafu mánikana ngolu, mátekitisa mipfundila mya boloku; muna mbala mosi, mwelu myosu myáyafuka amana miyololu mya boosu myáwongumuka. Nkengi wa boloku wátokama, wámona mwelu mya boloku miyafuki, wábonga phoku yandi bwosu kázola kudihonda, wabánza ni bakwa boloku báhuluka. Kaasi Pholu wákalunga ngolu: «Kukihangaku kima, mukuma betu boosu haha thwenina!»

Nkengi wa boloku wálomba mwinda, wákota sangu-sangu, amana wábwa muna malu ma Pholu yi Sila, wukala zakazaka ni bweya. Amana wábalubula ku phenza, wabazimbudi: «Bapfumu bama, biki bufwani yisala ndangu yihuluka?»

Bawu bavutudi: «Kwikila kwena Pfumu Yesu, amana ngeyi kahúluka, ngeyi yi batu ba nzu yaku.» Bawu bázonza ndinga ya Pfumu kwena yandi yi kwena batu boosu bana bakála mu nzu yandi. Muna tangwa meni dya phipha, wábabonga amana wásukula phuta za bawu; kunima, yandi yi batu ba nzu yandi boosu bábotika muna mbala mosi. Wábanata ku nzu yandi, wábasya madya ku thwala ya bawu, amana wáyuka kyesi, yandi yi batu ba nzu yandi boosu, kikuma kya kukwikila kwena Tata wetu.

Kaasi muna suka, bapfumu bátuma bambambala, bazimbudi: «Luyambula batu bana.»

Nkengi wa boloku wázimbula Pholu: «Bapfumu bátuma muswa ni baluyambula benu. Buthwena, lubuka amana wenda mu ngemba.»

Kaasi Pholu wábazimbwala: «Bawu bátubeta ha mesu ma batu boosu, konda kutusambisa, betu phi bisi Loma thwenina, amana bátulosa mu boloku. Buthwena bawu bazola ni batulubula mu kitsweki? Hana ni! Yambula bawu benikini bakwisa amana batulubula ku phenza.»

Bambambala básamuna mambu mana kwena bapfumu, bawu báyuka bweya tangwa bábakula ni bisi Loma bakála. Bakwísa, bábalomba nlemvu, bábalubula ku phenza, amana bábalomba ni bakatuka mu mbanza. Buna bákatuka mu boloku amana bénda ku nzu ya Lidiya. Kwakuna, bámona baphangi, bábahana kikesa, amana bénda.