Khi kyadi kwena batu ba luvundu yi ba kuyimona bakengama
Khi kyadi kwena bana bisi yalumuka ha bisasa bya menu ma nzawu, bisi dya bana ba mikoku ba kitoku, bisi sunga mikunga, amana bisiku yuka kiwayi kikuma kya kuzanga kwa Yozefu. Luvundu lwa bawu lwenina lufundu. Tata wetu wádya ndefi mu yandi-meni: bakwenda mu kinzenza ku thwala ya boosu, amana katedisa kanda mu kubasuna.
Tata wetu kisi zonza mu mavese 8, 14
6 1Khi kyadi kwena bana benina mu luvundu ku Siyoni, yi kwena bana bisi kudimona bakangama ha mongu wa Samadiya— batu ba mbuta ba kikanda kitekila, kwena bawu kanda dya Kiseledi disi kwisa! 2Hyokenu ku Kalune amana talenu; tukidila kuna, lwendenu ku Hamati dyambuta; buna kulumukenu ku Ngati dya Bafilisi. Benu luluti bipfumu byabi? Holo milambu mya bawu milutidi mya benu? 3Benu lwisi tula kuna thama kilumbu kya phasi, kaasi lwisi bwesuka luyalu lwa kingolu-ngolu. 4Bawu bisi leka ha bisasa bya menu ma nzawu amana bisi yalumuka ha bithangi bya bawu, bisi dya bana ba mikoku ba kibuka yi bana ba bangombi ba senga. 5Bisi sika nsambi, amana, hanga Tavidi, bisi sunga bimbila bya miziki kikuma kya bawu-meni. 6Bisi nwa vinu mu makopu ma mbuta amana bisi kudisita masi ma kitoku, kaasi bisi yukaku kiwayi kikuma kya kuzanga kwa Yozefu. 7Buna bakwenda buthwena mu kinzenza ku thwala ya banzenza, amana kyesi kya bana bisi yalumuka mu luvundu kyátota.
8Tata, Pfumu, wádya ndefi mu yandi-meni—kazimbudini Tata, Pfumu mukwa ngolu zoosu: Meni yisi lewula lulendu lwa Yakobi amana yisi menga bizika byandi byakengama, amana yikálambula mbanza yi byosu bina byenina mu kati.
9Amana yuka ni batu kumi basala mu nzu yimosi, bawu phi bakáfwa.
10Amana muna tangwa kiwutu kya mutu, wuna wisi yoka bamvumbi, kabati mutombula mu kunata mifufwa ku phenza ya nzu, amana kabati tela kwena wuna wenina mu kati-kati dya nzu: «Mutu mosi wenina hika yi ngeyi?» amana kabati vutula: «Ka mutu ku,» buna kabati zimbula: «Kala dyadi! Ka tufwaniku tela khumbu ya Tata wetu.»
11Mukuma, tala, Tata wetu wuhani muswa, amana nzu yambuta yakábudika mu bitini amana nzu yakeni mu bima bya koma. 12Baphunda bisi zawuka ha londi dya mongu? Mutu kisi bundula yanga ni bangombi? Kaasi benu lwákhitula masonga mu ndikila amana mbutu wa masonga mu ndikila ya khadi. 13Benu bana bisi yuka kyesi kikuma kya Lo-debadi amana bisi zimbula: «Ka mu ngolu zetu-zetu ku twábonga Kadinayimi kikuma kya betu-meni?» a a v13 Mbanza zodi zina Kiseledi kisi kudisanisina mu kuzibonga, zina yi mazina ma museva: Lo-debadi disi yukala hanga «kima kya mpamba,» amana Kadinayimi disongidila «meseke» —kidimbu kya ngolu. Lusanu lwa bawu lwa lulendu lusongidila ni basi kudisanisina mu kima kya mpamba kaka.
14Kaasi tala—Meni yisi vumbisa kikanda mu kunwanisa benu, kanda dya Kiseledi, kazimbudini Tata, Pfumu mukwa ngolu zoosu, amana bakálusuna tukidila ku Lebo-hamati tii yi kuna Nzadi ya Alaba.
