Dyatilenu mu Ngangu, Lombilenu mu Lukwikilu
Pholu wálomba lombilu ni Tata wetu kayafwadila mwelu kikuma kya ndinga, hamu bwosu kenina mu misinga, wábakebisa mu kuzonza ndinga yi khenda zisidika yi mungwa kwena batu ba ku phenza, amana wátela banduku bandi mosi-mosi — Tisiki, Onezimi, Epafasi wuna kabalombila ngolu, Luka, yi Malaku.
4 1Benu bapfumu, luhanenu bahika benu mana ma masonga yi mana mafwanakani, mukuma benu phi lwenina yi Pfumu mu mazilu.
2Dihanenu mu lombilu, amana lutemuna mesu muna dyawu yi matondu. 3Lombilenu kikuma kya betu phi, hanga Tata wetu katuyafwadila mwelu kikuma kya ndinga, ndangu tusamuna diswekamu dya Kidisitu, kina kikuma kyandi yenina mu miyololu, 4hanga yidimonisa dyambu dyaki bukheti, bwosu buna bufwani yizonzila.
5Dyatilenu mu ngangu kwena batu ba ku phenza, amana lusadila bukheti kosu tangwa. 6Ndinga zenu zikalaka kosu tangwa yi khenda, zisidika yi mungwa, ndangu luzaya buna lufweti vutula kwena kosu mutu. a a v6 Zisidika yi mungwa: ndinga za ngangu amana za kyesi — ndinga zafwanini mu kuyukubwa.
Bakwetu ba Kisalu Batondama
7Tisiki, phangi wetu watondama, musadi walunga, yi muhika mukwetu mwena Pfumu, kaluzimbwala tsangu za meni zoosu. 8Yimuhitiki kwena benu kikuma kyaki: ndangu lwazaya buna thwenina, amana kaluzyamisa mbundu zenu, 9hakimosi yi Onezimi, phangi walunga watondama, mosi mu kati dya benu. Bawu bakúzimbwala mana moosu ma haha.
10Adisitadiki, wuna wenina hakimosi yi meni mu boloku, yi Malaku, mwisi dikanda dya Balanabasi, mboti baluhekini—lwatambula milongi mu kikuma kyandi: yuka ni kakwisa kwena benu, muyambenu, 11yi Yesu, wuna bakala tela Yusitusi—bawu kaka benina Bayuta mu kati dya bakwetu bama ba kisalu kikuma kya Kipfumu kya Tata wetu; bawu bámphana kikesa.
12Ephafwasi, mosi mu kati dya benu, musadi wa Kidisitu Yesu, mboti kaluhekini, wisi nwana kosu tangwa kikuma kya benu mu lombilu, ndangu lwatelama lwenina bakodidila amana yi kikumbwala kya lawu muna moosu mana Tata wetu kazodini. 13Mbati kuluzimbwala ni yandi wádiyangisa lawu kikuma kya benu, kikuma kya babana ba ku Lawodise yi ba ku Yelapodisi. 14Luka, munganga watondama, mboti kaluhekini, hakimosi yi Temasi.
15Bahekenu mboti baphangi ba ku Lawodise, yi Nimfa yi Dibundu dina dyisi khundakana muna nzu yandi. 16Tangwa mukanda wawu wubati tangama hakati dya benu, hangenu ndangu wutangama phi mu Dibundu dya ku Lawodise, amana lutanga phi wuna wutuki ku Lawodise. 17Amana luzimbwala kwena Adisiphi: «Hanga bukheti ndangu wulungisa kisalu kina watambula mwena Pfumu.»
18Meni Pholu, mboti yayi yisonikini yi koku dyama. Lubambuketa miyololu mya meni. Khenda yikala yi benu.
