Masonga ku Mwelu
Mafimbu mafweti kala makumaya, kaasi mahitaku mama, hanga phangi kaleka wa tsoni ku mesu maku. Wamukasaku munwa ngombi tangwa kabati nika ngenza. Khumbu ya mutu wuna wáfwa konda mwana yilundwa kwena phangi wandi, kondilo phangi kaleka wa tsoni ku mwelu. Biteso bya kutesa yi bya kuteka bifweti kala bya masonga.
25 1Yuka ni batu benina yi tendu amana benda ku thwala ya bazusi, bazusi bana bisi fundisa hana kati dya bawu, batabula wuna wakonda sala mbi amana bafundisa wuna wena mukuludi, 2Yuka ni mutu mukuludi kafwani mu kudiphulwa mafimbu, wuna wisi fundisa kamulekika amana kamudiphula ku thwala yandi, mafimbu ma kutanga mafwanana yi mbi yina kahangini. 3Mafimbu makumaya, kaasi ka mahitaku mama; yuka ni kamudiphula kalúta mama, phangi waku kakála wa tsoni ku mesu maku.
4Wamukasaku munwa ngombi tangwa kabati nika ngenza.
5Yuka ni baphangi bazinga kumosi amana mosi kafwa konda mwana, mukhetu wa wuna wáfwa kafwaniku kukituka mukhetu wa muphakanu. Phangi wa bakala wandi kabonga yandi hanga mukhetu wandi, kaleka yi yandi amana kasadila kwena yandi bwabuna bulombi phangi wa bakala. 6Mwana wa tsomi wuna mukhetu kabuta kabonga zina dya phangi wandi wuna wafwa, hanga zina dyandi dyafwaku mu Isayeli.
7Yuka ni bakala kazodiku kubonga mukhetu wa phangi wandi, mukhetu kenda kwena bambuta ku mwelu amana kazimbula: «Phangi wa bakala wama kabwisa kutelimisa zina dya phangi wandi mu Isayeli; kazodiku kuhanga kwena meni mambu ma phangi wa bakala.» 8Amana bambuta ba mbanza yandi bamutela amana bamuzimbwala. Yuka ni katelama ngolu, mu kuzimbula: «Yizodiku kumubonga,» 9mukhetu wa phangi wandi kenda kwena yandi ku thwala ya bambuta, kabotula tsabatu mu kitambi kyandi, kamuhuma metya kuna mbunzu yandi, amana kazimbula: «Bwabuna bulombi musadila mutu wuna kabwisa kutunga nzu ya phangi wandi.» 10Amana kikanda kyandi kyatedwa mu Isayeli: «Nzu ya wuna bábotula tsabatu.»
11Yuka ni batu bodi banwana amana mukhetu wa mosi kwisa mu kutabula bakala wandi mu moku ma wuna wumunwanisa, amana kahulumuna koku kwandi amana kasimba bima byandi bya tsoni, 12buna wabukuna koku kwandi. Wamuyukilaku kiwayi.
13Wakalaku mu dikuta dyaku matadi ma kutesila modi ma mitindu myodi, dimosi dyanene yi dimosi dya khunda. 14Wakalaku mu nzu yaku bitesu byodi bya mitindu myodi, kimosi kyanene yi kimosi kya khunda. 15Kala yi ditadi dya kutesila dyafwana dya masonga; kala yi kitesu kyafwana kya masonga, hanga bilumbu byaku byazinga mu tsi yina Tata waku kabati kuhana kwena ngeyi. 16Mukuma kosu mutu wuna wisi hanga mambu ma mutindu wawu, kosu mutu wuna wisi hanga mu kukonda masonga, wenina nzanzi ku mesu ma Tata waku.
17Bambuka mana Amaleki káhangila kwena ngeyi mu nzila tangwa wákatuka ku Engipite, 18bwabu kákudengana mu nzila, kázenga batu baku boosu bana básala ku manima tangwa wákala walembwa yi lebakani, amana kákonda wonga wa Tata wetu. 19Muna tangwa Tata waku kahana lembusu kwena ngeyi mu bambeni zaku zoosu zikuzyeti, mu tsi yina Tata waku kabati kuhana kwena ngeyi hanga kuvwa kwaku, wavusa mbambukulu ya Amaleki ku tsi ya mazilu. Wazimbakanaku.
