Diswekamu Dina Báheka Kwena Pholu
Pholu wusonga kikuma kya kenina mu boloku: báheka yandi diswekamu dya Tata wetu, ni bana bakondi kala Bayuta benina baswana hakimosi, kebawu banzenza. Wukudizimbula ni yandi wa khunda kuluta bakwikidi boosu. Buna wuyambula kudibata amana wufukamina kwena Tata wetu, mu kulomba ngolu za kubakisa lungongu luna luluta nzayilu.
3 1Kikuma kya bwabuna, meni Pholu, mutu wa boloku wa Kidisitu Yesu kikuma kya benu bana bakondi kala Bayuta, a a v1 Ndinga ya Pholu yibati zenguka hana amana yibati yandika hika mu «Kikuma kya bwabuna» muna tini 14. 2yuka ni lwáyuka kuzonzila kisalu kya khenda za Tata wetu kina báheka meni kikuma kya benu, 3phila diswekamu dyázayikiswa kwena meni mu nzila ya tsengumuka, bwosu yisónika mu khufi ku thwala. 4Muna kutanga mama, lwalenda mona ngangu zama mu diswekamu dya Kidisitu, 5dina dyázayakanaku kwena batu muna makula máluta, kaasi buthwena dimonikini mu nzila ya Kitembu kwena bathumwa bandi batoma yi bambikudi, 6ni bana bakondi kala Bayuta benina baswana hakimosi, bitini bya lutu lumosi, amana batu ba kimvuka mu kilangi, mwena Kidisitu Yesu, mu nzila ya Musamu wa Bukheti. 7Yákitwakila musadi wa Musamu meni wa Bukheti mu nzila ya kabu dya khenda za Tata wetu, dina báheka meni mu ngolu zandi zisi sala. 8Ata yenina kwama kima kya phamba hana kati dya bakwikidi boosu, khenda zazi záheka meni: mu kusamuna kimvwama kya Kidisitu kyakonda tsuka kwena bana bakondi kala Bayuta, 9amana mu kusongila batu boosu dibanza dya diswekamu, dina dyáswekama muna makula moosu mwena Tata wetu wuna wásema bima byosu, 10hanga mu nzila ya Dibundu, mudimu wa Tata wetu wuna wa mphila-mphila wazayikiswa buthwena kwena bipfumu yi luyalu bina bisi muna mazilu, 11Mama máluta bwosu buna bwenina dibanza dya mvula yi mvula dina kálungisa mwena Kidisitu Yesu, Pfumu wetu, 12mwena yandi twenina kikumbwala yi muswa wa kutelama mu kikesa mu nzila ya lukwikilu mwena yandi. 13Buna yiluzimbwala: lukatulaku nana kikesa ku kikuma kya mphasi zama zina yisi mona kikuma kya benu, mukuma zenina khembu yenu.
Pholu Wisi Lombila Kuvwa kwa Tata
14Kikuma kya bwabuna, yibati fukama makungulu mama ku thwala ya Tata, 15wuna kwena yandi kosu kikanda kina kyenina mu zilu yi ha tsi kibati tambula khumbu yandi, b b v15 Kosu kikanda kina kyenina mu zilu yi ha tsi kibati tambula khumbu yandi kwena Tata wetu — yandi kenina sina dya kutata kosu, amana ka kikanda ku kilenda monika konda yandi. 16ni mu kimvwama kya khembu yandi kalúsyamisa mu ngolu mu nzila ya Kitembu kyandi, mu mutu wenu wa mwena kati, 17hanga Kidisitu kazingila muna mbundu zenu mu nzila ya lukwikilu, amana benu, bana luzikidi misodi amana lutungidi mu lungongu, 18lwalenda, hakimosi yi bakwikidi boosu ba Nzambi, kala yi ngolu za kubakula buneni yi lengu yi kuleya yi nzinda, 19amana lwazaya lungongu lwa Kidisitu, luna lulutini mazaya, hanga lwazala ni kuvwa kwosu kwa Tata wetu.
20Kwena Tata wetu, wuna wulendi hanga mana malutini kuhiti moosu mana tulombila kondilo mana tubánza, mu ngolu zina zisi sala mwena betu. 21Khembu yakala kwena yandi mu Dibundu amana mwena Kidisitu Yesu, mu makula moosu, mvula muna mvula! Abwabuna.
