Tata Wisi Tuma Dimbu dya Kinzenza
Ezekiele wáyidika bima byandi bya kinzenza amana wálubuka mu mabwa ma nzu yandi-meni mu masika, wáfidinga luse lwandi, mu kusonga kwenda mu kinzenza ku mesu ma bakwandi bana bisi muhyula biki kisi hanga. Kwena kingana kya batu kina kisi zimbula ni mbona mesu yilunganaku, Tata wetu wavutula ni tangwa dyatula.
Tata wetu kisi zonza mu mavese 2–6, 9–16, 18–20, 22–25, 27–28
12 1Ndinga ya Tata wetu yísa kwena meni:
2«Mwana wa mutu, ngeyi wenina zinga hana kati dya kanda dya bakolami. Benina yi mesu ma kumona kaasi bisiku mona, matu ma kuyuka kaasi bisiku yuka, mukuma bawu kanda dya bakolami benina.
3«Buna ngeyi, mwana wa mutu, yidika bima byaku bya kinzenza, amana kota mu kinzenza mu mwini ku mesu ma bawu. Katuka ha homa yaku, wenda kuna homa hakwawu, ku mesu ma bawu. Ngatu bamona, kinga bawu kanda dya bakolami benina.
4«Lubula bima byaku mu mwini ku mesu ma bawu, hanga bima bya kinzenza; amana ngeyi-meni lubuka mu mabwa masikidika ku mesu ma bawu, hanga bana bisi kota mu kinzenza.
5«Ku mesu ma bawu, sima kibaka, amana natina bima byaku muna.
6«Ku mesu ma bawu, zangula byawu ha dihembu dyaku amana natina byawu mu phipha. Fidinga luse lwaku hanga ngeyi kumonaku tsi, mukuma yíkukhitudi ngeyi dimbu kwena kanda dya Kiseledi.»
7Buna yíhanga bwana bálomba. Mu mwini yílubula bima byama, bima bya kinzenza, amana mu mabwa masikidika yásima kibaka mu koku. Mu phipha yánatina byawu ha dihembu dyama, ku mesu ma batu boosu.
8Mu suka, ndinga ya Tata wetu yísa kwena meni:
9«Mwana wa mutu, kanda dya Kiseledi, kanda dyadina dya bakolami, kakuhyudiku: “Biki wisi hanga?” 10Zimbula kwena bawu: «Pfumu Tata wisi zimbula: Mambu mama masi tadila pfumu wenina mu Yelusalemi yi kanda dyosu dya Kiseledi bana bena muna.»
11Zimbula: «Meni yenina dimbu dyenu. Bwana yíhanga, buna bwawu kákitukila kwena bawu; bákota mu kinzenza, mu boloku. 12Pfumu wuna wenina hana kati dya bawu kazangula bima byandi ha dihembu dyandi mu phipha amana kalubuka. Bawu bakasima kibaka hanga bámulubula muna. Kadifidinga luse lwandi hanga kámonaku tsi ni mesu mandi. 13Yiyálumuna wanda dyama ha thandu yandi; yandi kakwáta mu mutambu wama. Yímunata ku Babiloni, tsi ya bisi Babiloni, kaasi kamónaku dyawu—amana kwakuna kafwa. a a v13 Pfumu yina yenina Zedekiya, kyamvu wa tsuka wa Yuta. Bámukwata buna kakala tina ku Yelusalemi, amana bámufwakisa mesu. Buna bámunata ku Babiloni, wátula ku mbanza kaasi kámonaku dyawu, bwana bwásamunwa. 14Yíbamwanga ku nzunga zoosu, boosu bana bamuzyungidi—basadisi bandi yi baphumbulu bandi boosu—amana yikátula mbedi ya phoku ku manima ma bawu.
15«Bawu bázaya ni meni yenina Tata wa bawu, tangwa yíbamwanga hana kati dya makanda amana yíbamwanga muna tsi zoosu.
16«Kaasi yíhawula ba khunda mu mbedi ya phoku, mu nzala yi mu mbefu, hanga básamuna mambu mawu moosu ma nzanzi hana kati dya makanda kuna benda. Buna bázaya ni meni yenina Tata wa bawu.»
17Buna ndinga ya Tata wetu yísa kwena meni:
18«Mwana wa mutu, dya mapha maku ni kutekita, amana nwa mamba maku ni bweya yi mayindu.
19«Zimbula kwena batu ba tsi: Mambu mama masi zimbula Pfumu Tata kikuma kya bana bazinga mu Yelusalemi mu tsi ya Kiseledi: Bakadya mapha mawu ni mayindu amana bakanwa mamba mawu ni kitswi, mukuma tsi ya bawu yakawomunwa kuvula kwandi kwosu, kikuma kya mvwalangani ya boosu bana bazinga muna.
20«Mbanza zina batu basi zinga muna zakazaluka, amana tsi yákituka zumbu. Buna lwázaya ni meni yenina Tata wenu.»
Tata Wisi Manisa Kingana kya Phamba
21Buna ndinga ya Tata wetu yísa kwena meni:
22«Mwana wa mutu, biki kyenina kingana kyaki mu Kiseledi: “Bilumbu bisi zyeta, amana mbona mesu yosu yisi zimbala”?
23«Buna zimbula kwena bawu: “Mambu mama masi zimbula Pfumu Tata: Yikamanisa kingana kyaki; basiku kyawu thila dyaka mu Kiseledi.” Kaasi zimbula kwena bawu: “Bilumbu bibwesukini, yi kulungisa kwa mbona mesu yosu. 24Mukuma mu kanda dya Kiseledi mwakasalaku dyaka mbona mesu ya bukamvi yosu keti kubikula kwa lengu ndinga.
25Mukuma meni yenina Tata wenu; yízimbula ndinga yina yisi zimbula, amana yakasalama. Yakazyetaku dyaka—mukuma mu bilumbu byenu, benu kanda dya bakolami, yízimbula ndinga amana yísala yawu, kazimbudini Pfumu Tata.”»
26Buna ndinga ya Tata wetu yísa kwena meni:
27«Mwana wa mutu, kanda dya Kiseledi disi zimbula: “Mbona mesu yina kisi mona yandi yenina kikuma kya mvula lawu mina misi kwisa; yandi kisi bikula mu bilumbu bya kyana.”
28«Buna zimbula kwena bawu: Mambu mama masi zimbula Pfumu Tata: Ka ndinga yama yimosi ku yakazyeta dyaka. Mana yisi zimbula másalama, kazimbudini Pfumu Tata.»
