Kuzyama mu Kiphwanza mwena Kidisitu
Kiphwanza kyenina kina Kidisitu kásumba, buna Pholu wákebisa ni kukota mukhanda kwábavutula ku tsi ya mutsiku wosu. Kaasi kiphwanza kisiku nzila ya kuhanga mana wazodi: luzolu lusi sadila, amana bisalu bya lutu bisi vwadingisa dibundu amana bisi kaka batu ku Kipfumu kya Tata wetu, bwosu Kitembu Kyatoma kisi kodisa luzolu, kyesi, ngemba yi luvibudulu.
Tata wetu kisi zonza mu vese 14
5 1Kidisitu wátukutumuna mu kiphwanza. Buna, zyamenu; lukitukaku hika mu kangama kwa kihika.
2Luyuka: meni Pholu, yiluzimbwadini: yuka ni lwakota mukhanda, Kidisitu kalusadisaku ni kima. 3Yituki kimbangi hika: kosu yakala wuna wisi yamba kukota mukhanda, kafwana kulemvuka ku mutsiku wosu. 4Benu bana luzodi kukituka batu ba masonga mu nzila ya mutsiku, lwávambana yi Kidisitu; lwabwa phi mu khenda. 5Mukuma, muna Kitembu Kyatoma, mu lukwikilu, tubati hingila kivuvu kya masonga. 6Mukuma, mwena Kidisitu Yesu, kukota mukhanda kyeku mupfunu, kondilo kukonda kota mukhanda; kaasi lukwikilu luna lwisi sala mu nzila ya lungongu.
7Lwákala dyata mboti. Nani wulukandikisi hanga lwabika kulemvuka ku kyedika? 8Kukwikisa kwakuna kutukiku kwena Tata wetu, wuna wulutedini. 9Koma ka muvimbu kisi ndundumuna kithoba kyosu. 10Yenina yi kikumbwala, mwena Pfumu, ni lwábongaku dibanza dyahika; wuna wisi luyangisa, katámbula pfundusu.
11Kaasi, baphangi, yuka ni kedi yílonga kukota mukhanda, mukuma biki kedi yinyokuka? Buna, kisinza kya kitakani kyakatuka. 12Nzodi ni babana bisi luvwadingisa mabanza, badizenga bawu meni! a a v12 Pholu wubalula mbedi mu ngolu: yuka ni kuzenga kwenina kyenina mupfunu, buna balongi ba kukota mukhanda bahanga tii ku tsuka.
13Benu, Nzambi kálutedila mu kiphwanza, baphangi. Kaasi, lusisaku kiphwanza kyakina kituka nzila ya kulanda tsatu za lutu; kaasi, lusadilananga benu yi benu mu nzila ya lungongu.
14Mukuma, mutsiku wosu wulungiswa mu mambu mamosi: «Ngeyi kazola mutu wa bela yaku bwosu ngeyi mosi.»
15Kaasi, yuka ni lwadilumana amana lwadidyana benu yi benu, dikengenu ni lubika kumanisa benu yi benu.
16Kaasi, yiluzimbwadini: ludyatanga mu Kitembu, buna lulungisaku tsatu za lutu. 17Mukuma, lutu lwisi zola mana mabati kakidila Kitembu, amana Kitembu kisi zola mana mabati kakidila lutu; byabi byabyodi bisi tendana, buna lulendaku kuhanga mana luzodini. 18Kaasi, yuka ni Kitembu kisi lutwadisa, lwenina ku tsi ya mutsiku ku. 19Mihangu mya lutu myazayakana wengele: mbongi, mambu ma mvindu, tsambu za mvwalangani. 20Kufukamina kwa nzambi za biteki, kusadila mikisi, bumbeni, matendu, kiphala, makasi, kitembu kya kudimonikisa, ngyengu, mabuka, 21nzoluka, kuzela kwa malafu, mazandu ma mvwalangani, yi mambu ma mutindu wawuna. Yilulwengisi buthwena, bwosu bwenina theti: babana bisi hanga mambu ma mutindu wawuna, kabatámbulaku Kipfumu kya Tata wetu.
22Kaasi, Kitembu kisi butanga kibundu kyaki: lungongu, kyesi, ngemba, sipha dya mbundu, buweti, mamboti, kwikama, 23lembami, kudiyala. Ku mambu ma mutindu wawuna, mutsiku wenina ku. 24Amana babana ba Kidisitu Yesu bákoma lutu lwawu ha kitakani, kumosi yi tsatu zandi yi nzoluka zandi. 25Yuka ni tuzingila mu Kitembu, buna tudyatanga phi mu Kitembu. 26Tukalaku bakwa lulendu, konda kudivundumuna benu yi benu, konda kudimonina kiphala benu yi benu.
