Nowa Wukota mu Nzasa

Kuvinga kwamana. Nzu ya Nowa yi bambisi bákota, amana Tata wetu wufika mwelu, amana mamba makwísa tuka ku tsi yi tuka ku zilu bilumbu makumaya. Kitini kyisi tanga bafwa mboti-mboti—byosu bina byákala yi mwela ha tseki ya mafu—amana nzasa yimosi kaka yisyala hana thandu ya mamba.

Tata wetu kisi zonza mu mavese 1–4

Kapitulu 7.

Amana Tata wetu wázimbula kwena Nowa: «Kota mu nzasa, ngeyi yi nzu yaku yosu, mukuma yákumona wenina mutu wa masonga ku mesu mama muna mbandu yayi. Bonga kwena ngeyi meni tubati nsambwadi twa kosu mbisi wa sema, yakala yi mukhetu, amana luhati lumosi lwa mbisi wa konda sema, yakala yi mukhetu, amana phi tubati nsambwadi twa banuni ba ku zilu, yakala yi mukhetu, hanga butuka dyakala mu luzingu ha thandu ya tsi yosu. Mukuma, kunima dya bilumbu nsambwadi, yinókisa mvula ha tsi, bilumbu makumaya bya mwini yi phipha makumaya, amana yítotisa bima byosu bya moya bina yáhanga, ha tseki ya mafu.»

Nowa wáhanga mambu moosu mana kámuta Tata wetu.

Nowa kákala yi mvula makama masambanu mu tangwa dina mamba ma kithombu mákwisa ha thandu ya tsi. Yandi, bana bandi, mukhetu wandi, yi bakhetu ba bana bandi, bákota mu nzasa, hanga bátina mamba ma kithombu. Mu bambisi ba sema yi bambisi ba konda sema, mu banuni yi byosu bina bisi landanda ha mafu, boodi-boodi, yakala yi mukhetu, byísa kwena Nowa mu nzasa, bwosu buna káta Tata wetu kwena Nowa. Kunima dya bilumbu nsambwadi, mamba ma kithombu mákwisa ha thandu ya tsi. Muna mvula ya makama masambanu ya luzingu lwa Nowa, muna ngonda ya boodi, muna kilumbu kya kumi yi nsambwadi, muna kilumbu kina kimosi, mabulu moosu ma dingu dya mbuta mábudika, amana mielu mya mamba ma ku zilu myázibuka. Mvula wánoka ha tsi bilumbu makumaya bya mwini yi phipha makumaya.

Muna kilumbu kina, Nowa wákota mu nzasa, yandi, bana bandi Semi, Hami, Yafeti, mukhetu wandi, yi bakhetu batatu ba bana bandi. Bawu yi kosu mbisi wa mu tseki mu mbandu yawu, yi kosu kibulu mu mbandu kyawu, yi kosu kina kisi landanda ha mafu mu mbandu yawu, yi kosu nuni mu mbandu yawu, kosu kima kyena yi mavavi. Byísa kwena Nowa, mu nzasa, boodi-boodi, bima byosu byena yi mwela wa luzingu. Yakala yi mukhetu bya bima byosu bákota, bwosu buna kámuta Tata wetu; amana Tata wetu wámufikila. Kithombu kyánanga bilumbu makumaya ha tsi; mamba mátombuka, mátombula nzasa, amana yázangama ha thandu ya tsi. Mamba mátombuka yi kuvula lawu ha thandu ya tsi, amana nzasa yázangama ha thandu ya mamba. Mamba mátombuka lawu-lawu ha thandu ya tsi, hanga máfidinga myongu myosu mya banda myena ku tsi ya zilu dyosu. Mamba mátombuka, kitesu kya bitambi makumodi yi biodi ha thandu ya myongu, amana máyifidinga. Bima byosu bina byakala kwenda-kwenda ha tsi byáfwa: banuni, bibulu, bambisi ba mu tseki, bihangwa byosu bina byazala ha tsi, yi batu boosu. Byosu bina byakala ha mafu máyumuka, bina byakala yi mwela wa luzingu mu mazunu mawu, byáfwa. Tata wetu watótisa bima byosu bya moya bina byakala ha tseki ya mafu: batu, bambisi, bihangwa bina bisi landanda, yi banuni ba ku zilu, amana wábikatula ha tsi. Nowa kaka yi bana bakala yi yandi mu nzasa bánanga. Amana mamba mánunga ha thandu ya tsi, bilumbu khama yi makumatanu.