Yizenu kuna mamba
Mbokolo yisi kwenda kwena batu bana bakonda mbongu: yizenu ludya amana lunwa konda kufuta, luyambulenu kufuta mu kima kina kyisiku sephidisa. Mabanza ma Tata wetu menina ha zulu kuluta ma bawu, buna ndoloko yandi yenina ya phamba kuluta buna bisi banza. Ndinga yandi, hanga mvula, yisi vutukaku ya mpamba.
Tata wetu kisi zonza mu mavese 1–5, 8–13
55 1«Yukenu! Benu boosu bana benina yi kihwinya, yizenu kuna mamba; benu bana bakonda mbongu, yizenu, lusumba bima bya kudya amana ludya! Yizenu, lusumba vinu yi midiki konda thalu—konda kufuta. 2Kikuma kya biki lusadila mbongu mu kima kina kyisiku dipha, amana kisalu kyenu mu kima kina kyisiku sephidisa? Luyuka meni bukheti-bukheti, amana ludya kina kyenina kya mboti, amana moya wenu wakála yi kyesi mu madya ma mboti ya lawu. 3Lukangula matu menu amana yizenu kwena meni; luyuka, hanga moya wenu wazínga. Yíta bulunda bwa mvula yi mvula yi benu, khenda zama za kwikama zina yásila kwena Tavidi. a a v3 Pholu wázonza ndinga yayi mu Bisalu bya Bantumwa 13:34 mu kikuma kya lufutumuku lwa Yesu — bulunda bwa mvula yi mvula bwa Tata wetu yi Tavidi bwisi lunga bwabwo mwena Kidisitu wuna wáfutumuka. 4Tala, yámutsikununa kakala mbangi kwena makanda, pfumu yi tudibeni wa makanda. 5Mu kyedika, wátedisa kanda dina wudizayaku, amana kanda dina dikuzayaku dyatyákila kwena ngeyi, kikuma kya Tata waku, Watoma wa Kiseledi, mukuma wákuzatula.»
6Sandenu Tata wetu bwosu kalenda monika; lumubokila bwosu kenina bela-bela. 7Mutu wa mbi kasisa nzila yandi, amana mutu wakonda masonga kasisa mabanza mandi. Kavutuka kwena Tata wetu, amana mbundu ya Tata wetu yakála yi kyadi kikuma kya yandi; kavutuka kwena Tata wetu, mukuma kamúloloka mu khatu kwandi.
8«Mukuma mabanza mama masiku mabanza menu, amana nzila zenu zasiku nzila zama,» kazimbudini Tata wetu. 9«Mukuma bonga mazilu menina ku zulu kuluta tsi, phila mosi nzila zama zenina ku zulu kuluta nzila zenu, amana mabanza mama kuluta mabanza menu.
10Mukuma bonga mvula yi mamba ma phembi bisi kuluka tuka ku zilu amana bisiku vutuka kuna, kaasi bisi tyakila mafu, bisi makitula mafu mabuta amana malubula khaya, bisi hana mbutu kwena mukuni amana dipha kwena bana bisi dya, 11phila mosi bwakála ndinga yama yina yisi tuka mu munwa wama: yaléndaku vutuka kwena meni yi moku ma khatu, kaasi yalungila kina yisi zola amana yalungila mana yátumina yawu. 12Lwalúbuka mu kyesi amana lwatwádiswa mu ngemba; myongu yi mina mya khunda myayándika kuyimbila ku thwala yenu, amana miti myosu mya kilanga myabúla moku. 13Mu kifulu kya nti wa minga, nti wa mbuta wamena, amana mu kifulu kya minga, nti wa kitoku wamena. Mama makála kikuma kya khumbu ya Tata wetu, kidimbu kya mvula yi mvula kina kyalendaku kwángawa.»
