Kitembu kya Tata Kisi Tsita Meni Masi
Muzonzi watsitwa masi wisi tela babana katumwa kwena bawu: baphutu, babana ba mbundu zabwa, batu ba boloku, babana bisi sya khondu mu Siyoni. Mbombi yabalulwa mu mukhonzi, buwayi mu mukunga wa luzitu. Tata wetu wuzimbudi ni kazola masonga amana kamenga kuyiba, amana mbanza zabwa zitungululu ni bana bakwata tsoni.
Tata wetu kisi zonza mu mavese 8–9
61 1Kitembu kya Tata wa Lulendu kyenina ha thandu yama, mukuma Tata wetu wátsita meni masi ndangu yinata Musamu wa Bukheti kwena baphutu. Wáthuma meni ndangu yikasa babana ba mbundu zábwa, ndangu yisamuna kiphwanza kwena batu ba boloku amana lulubuki kwena babana bákasama mu phipha, a a v1 Yesu wátekila kisalu kyandi ku mesu ma batu mu kutanga ndinga zazi meni muna nzu ya kimvuka ya Nazaleti, amana wuzimbudi: «Buthwena, Masonuku mama malungidini mu matu menu» (Luke 4:18-21). Musadi wuna wisi zonza haha, kenina Yesu — wátsitwa masi mu Kitembu, wáthumwa kwena Tata wetu. 2ndangu yisamuna mvula ya mamboti ma Tata wetu amana kilumbu kya mukanu wa Tata wetu, ndangu yindembika mbundu za boosu bana bisi sya khondu, 3ndangu yiheka bima kwena babana bisi sya khondu mu Siyoni— yíbaheka mukhonzi wa phisi mu kizika kya mbombi, mafuta ma tsambu mu kizika kya khondu, muledi wa khembu mu kizika kya kitembu kya buwayi; buna bakatélwa miti mya masonga, bikunu bya Tata wetu, hanga kazatulwa.
4Bakatúngulula bima byabwa bya khulu, amana bakatélamisa buma buna bwazíluka tuka thama; bakavútulula mbanza zina zazíluka, zina zakitukidi zumbu mu makula malawu. 5Banzenza bakakébila bibulu byenu; batu bátuka kuma kwahika bakála basadi ba bilanga byenu yi ba masamba ma vinu. 6Kaasi lukatélama banganga ba Tata wetu; lukatélwa basadi ba Tata wetu. Lukadya kimvwama kya makanda, amana mu bimvwama bya bawu lukasangwala. 7Mu kizika kya tsoni yenu lukatámbula ndambu zodi, amana mu kizika kya kulewuka lukasangwala mu kuvwa kwenu; buna lukavwa ndambu zodi mu tsi yenu, amana kyesi kya mvula yi mvula kyakála kyenu.
8«Mukuma meni, Tata wenu, yisi zola masonga; yisi menga kuyiba yi kukonda kwa masonga. Mu kwikama kwama yikafúta batu bama lufutu amana yikazénga bulunda bwa mvula yi mvula ni bawu. 9Bana ba bawu bakazáyakana hana kati dya makanda amana batekulu ba bawu hana kati dya bikanda; boosu bana bakababamona bakatámbwasa ni bawu bena bana basakumuka kwena Tata wetu.»
10Yikasángwala lawu mwena Tata wetu; moya wama wukakína makinu ma muzandu mwena Tata wetu. Mukuma wámvwatisa miledi mya luhulusu amana wámfukidila muzaka wa masonga, bwosu mukwedi kisi divwatisa mukhonzi ku mutwa bwana nganga Nzambi, amana bwosu mukhetu wa longu kisi diyidika ni bitoni byandi. b b v10 Muna makula ma khulu ku Kiseledi, bakwedi bakala vwata mukhonzi wa phisi ku mutwa mu kilumbu kya makwela ma bawu, bwana banganga Nzambi bakala sala mu kisalu kya nzu ya Nzambi. 11Mukuma bwosu mafu mamenisanga ngwalengi mandi, amana bwosu kilanga kisi menisa bina bakunini mwawu, buna Tata wa Lulendu kakaménisa masonga yi khembu ku mesu ma makanda moosu.
