Yobi Wuvutudi
Yobi wisi vutula kiseya mu kiseya, ni ngangu zakála fwa kumosi yi benu, amana wisi zimbula ni ata bambisi yi banuni bazayi ni koku dya Tata wetu kwáhanga dyadi. Nkunga wandi ka luvundu ku: Nzambi wisi katula bandwandwa, bazusi, banganga Nzambi yi bakyamvu, amana wisi yambula bamutwadisi ba tsi babati kangala mu phipha.
12 1Amana Yobi wuvutudi: 2«Kyedika benu lwenina batu, amana ngangu zafwá kumosi yi benu. 3Kaasi meni phi yenina yi dibanza bwosu benu; meni yeku khunda kwena benu. Nani kisiku zaya mambu ma phila yayi? 4Yíkituka kima kya kuseya kwena banduku bama—meni, wuna yátela kwena Nzambi amana wávutula kwena meni; mutu wa masonga amana konda kifu, buthwena kima kya kuseya. 5Batu bana benina mu luvundu bisi lewula phasi— kulewula kwayilama kwena bana malu ma bawu masi bwa. 6Masombolu ma bandwandwa menina mu ngemba, amana bana bisi vundumuna Nzambi benina mu luvundu—bana bisi nata nzambi wa bawu mu koku kwa bawu meni. a a v6 Bana bisi nata nzambi wa bawu mu koku kwa bawu meni: batu bana bisi kwikila kaka mu ngolu za bawu meni, ka mu Nzambi ku. 7Kaasi hyula bambisi, amana bálonga kwena ngeyi; banuni ba ku zilu, amana bázimbula kwena ngeyi; 8ho zonza kwena tsi, amana yakúlonga ngeyi; amana batsema ba yanga bakúbangwamina dyawu. 9Nani mu kati dya byosu byabi kisiku zaya ni koku dya Tata wetu kwáhanga dyadi? b b v9 Mu kuzonzasana kwa lawu yi banduku bandi batatu, haha kaka Yobi wisi tela Tata wetu mu khumbu — khumbu ya kikundi yina banduku bandi bakála sadila ku. Mbundu yandi, mbatanana mu khuba, yisi sanda Tata wuna kázaya thama. 10Mu koku kwandi mwenina luzingu lwa kima kyosu kya moya amana mwela wa batu boosu. 11Kutu kisiku zyama ndinga bwosu lulaka lwisi meka madya mandi? 12Ngangu yisi monika kwena bambuta, amana mbakisilu mu dingu dya bilumbu. 13Kwena yandi kwenina ngangu yi ngolu; dibanza yi mbakisilu bya yandi. 14Kina kazánga, kilendaku tungulula hika; wuna kafiki, kalendaku lubula. 15Yuka ni wasimbidila mamba, masi yumuka; yuka ni wálubula mawu, masi fidinga tsi. 16Kwena yandi kwenina ngolu yi ngangu ya bukheti; wuna wáhunakana yi mukwa bukamvi, boosu bodi ba yandi. 17Wisi natisa batu ba mabanza bawomuka, amana wisi kitula bazusi bilawu. 18Wisi kutumuna misinga mina bakyamvu basya, amana wisi kanga nledi mu luketu lwa bawu meni. 19Wisi natisa banganga Nzambi bawomuka, amana wisi bula bana basíkila thama. 20Wisi zibika malebu ma bana bakwikama, amana wisi katula bambuta mbakisilu. 21Wisi tyakila tsoni ha bapfumu, amana wisi katula batu ba kikesa ngolu za bawu. 22Wisi songa mambu ma dingu mátuka mu phipa, amana wisi natisa kininga kya lufwa mu mwini. 23Wisi kitula makanda ma mbuta, amana wisi zanga mawu; wisi yika makanda, amana wisi natisa mawu. 24Wisi katula ngangu za bapfumu ba tsi, amana wisi bahitika badiata mu tseki yakonda nzila. 25Bisi diata mu phipa konda mwini, amana wisi batengisa bwosu mutu wa kolwa.»
