Kitembu Kyama Kibebisini
Kitembu kya Yobi kibebisini, amana kalunga dyayidikama hanga thangi. Wisi yula nani wafwana kala tsikiningi yandi, mukuma ka nduku mosi ku wena yi ngangu ya kuheka. Yuka ni kafwana tela kalunga tata wandi amana mimvidya ngudi wandi, kweti kwenina kivuvu kyandi?
17 1«Kitembu kyama kibebisini, bilumbu byama bizimini, kalunga dyayilamini kikuma kya meni. 2Kyedika, baseya bakunzinga, amana mesu mama mafwaniku kukatuka mu luseya lwa bawu.
3«Sya kilangi kikuma kya meni kwena ngeyi meni; nani wankaka wakhana ndinga yandi hanga wisi tsikiningi yama? 4Mukuma ngeyi wázibika mabanza ma bawu ndangu babakulaku; yihana kuyámbulaku ni bawu bazangama. 5Wuna wisi funda banduku bandi kikuma kya ndandu yandi, mesu ma bana bandi mazima.
6«Yandi wákhitula meni kingana hana kati kya batu ba tsi, mutu wuna bisi huma metya kuna mbunzu. 7Disu dyama dizimini kikuma kya kyadi, amana bitini byama byosu bina hanga kininga. 8Batu basungama bisi yituka mu diambu dyadi, amana mutu wakonda sala mbi wisi telama kwena bana bakonda kinzambi. 9Kaasi mutu wa masonga wisi simba nzila yandi, amana wuna wenina yi moku ma kasemi wisi yekuka mu ngolu.
10«Kaasi vutukenu, benu boosu, luiza buthwena—yiwananaku keti mutu mosi wadimuka hana kati kya benu. 11Bilumbu byama byáluta, makanu mama mahawulamini, amana kumosi yi mawu, tsatu za mbundu yama. 12Bisi khitula phipha mu mwini; “Mwini,” bawu bisi zimbula, “wukwisa,”—kuna thwala ya phipha. 13Yuka ni yisya kivuvu kya kalunga hanga nzu yama, yuka ni yiyala thangi yama muna phipha, 14yuka ni yitela kwena dibulu: “Ngeyi wena tata wama,” amana kwena muvidya: “Ngudi wama” amana “Phangi wama wa mukhetu,” 15buna, kivuvu kyama kweti kyenina? Nani walenda mona kivuvu kikuma kya meni? 16Kyakulumuka ku mielu mya kalunga? Twakulumuka kumosi mu fusyangeni dya mafu?»
