Mambu ma kuzimbula kikuma kya Nzambi
Elihu wisi zonza mu dyambu dya Nzambi: phasi yenina milongi, kutu dyakangulwa, amana Yobi wadi kwilwa ku fulu kya kuyalumuka. Amana mbembu yandi yisi balula ku kuyituka: mvula yitukidi mu matuti, thungidi, yi lusemu lwa kwenda ku fulu kyalu. Nzambi wenina wambuta, amana betu tuzayiku yandi.
36 1Amana Elihu wákwamina amana wuzimbudi: 2«Sipha mbundu yi meni ndambu, amana yikúsongila ngeyi, mukuma mbati mambu makala ma kuzimbula kikuma kya Nzambi. 3Yibónga mazaya mama tuka kyana, amana yihána masonga kwena Muhangi wama. 4Mukuma mu kyedika, mambu mama meku ma luvunu; mutu wafwana mu mazaya wenina yi ngeyi. 5Tala, Nzambi kenina mukwa ngolu, kaasi kalewulaku; kenina mukwa ngolu mu ngolu za ngangu. 6Kazingisaku batu ba mbi, kaasi wisi hana masonga kwena bana benina mu kiwayi. 7Kakatulaku mesu mandi kwena batu ba masonga; wisi bazakalisa yi kinga hana biti bya kipfumu mu kimakulu, amana babatombula. 8Amana ho ni bazitikama mu boloku, basimbakana mu misinga mya kiwayi, 9buna wisi bazimbwala mihangu mya bawu yi bunkolami bwa bawu, ni badyatidikini mu lulendu. 10Wisi kangula kutu dya bawu kwena milongi, amana wisi tuma ni bavutuka tuka mu masumu. 11Yuka ni bayuka amana bamusadila, bamanisa bilumbu bya bawu mu mamboti, amana mvula za bawu zaluta mu kyesi. 12Kaasi ho ni bayukaku, bafwa mu mbedi, amana bafwa konda mazaya. 13Batu ba mbundu zikondi Nzambi balunda khabu; bakalungaku mu kulomba lusadisu tangwa wisi bazitika. 14Moya wa bawu wafwa mu kileki, amana luzingu lwa bawu lumanina ha kati dya bandumba ba biteki. 15Wisi hulula batu ba phasi mu phasi za bawu, amana wisi kangula kutu dya bawu mu kiwayi. 16Yandi phi kakúkatula ngeyi mu munwa wa kiwayi, kuna kifulu kyayalumuka kyakonda kufitakana, amana mesa maku makala mabasa mu madya ma mafuta. 17Kaasi ngeyi wenina wabasa mu pfundusu yina yifwanini kwena batu ba mbi; pfundusu yi masonga bikúkwatini. 18Dikenga ni khabu yikulotisaku mu museya, amana bika thuka yimbuta yikulundikaku. 19Kweku ndinga yaku ya kulomba lusadisu yifwanini kukukatula mu kiwayi, holo ngolu zoosu zaku? 20Wuzolaku pfuku, tangwa batu bakatulama mu bifulu bya bawu. 21Keba; wuvutukaku ku masumu, mukuma wásola mambu mama kuluta kiwayi. 22Tala, Nzambi kenina watombuka mu ngolu zandi; nati mulongi wafwanana yandi?
23«Nati wáyidika kwena yandi nzila yandi, holo nati walenda kuzimbula: “Wásala mbi”? 24Banza mu kuzatula kisalu kyandi, kina batu basephidi mu kuyimbila. 25Batu boosu bátala kyawu; batu bisi mona kyawu tuka kyana. 26Tala, Nzambi kenina mbuta, amana betu tumuzayiku; thalu ya mvula zandi yihitini kusanda. 27Mukuma yandi wisi tombula matonzi ma mamba; manoka hanga mvula tuka mu mbuki yandi, 28mana matuti malubula amana mabwa lawu-lawu hana batu. 29Kweku mutu walenda kubakula kuyalangana kwa matuti, thungidi ya nzu yandi? 30Tala, wisi mwanga mutsyenzya wandi zingidila yandi, amana wisi fuka dingu dya yanga dya mbuta. 31Mukuma mu mambu mama wisi yala batu; wisi hana madya lawu-lawu. 32Wubasisa moku mandi ni mutsyenzya, amana wukutuma ndangu wubula ha kifulu kina kafweti bula. 33Mubandanu wandi wisi muzimbwala; ata bangombi bisi zaya ni pfunzi yikwísa.»
