Samisoni Wunata Mwelu mya Ngaza
Samisoni wakwata mwelu mya Ngaza, amana wazola Delila, wuna bámuheka mbongu ndangu kawana kweku ngolu zandi zenina. Kunima dya luvunu lutatu, wazimbula kwena yandi mbundu yandi yosu, watokama ni tsuki zandi zibakulu, amana kazaya ku ni Tata wetu wámusisa. Buna bakatula mesu mandi ku yanda, tsuki zandi zayandulula kukula, amana walomba ngolu hika.
16 1Samisoni wénda ku Ngaza, amana kwakuna wámona ndumba-leta mosi, amana wákota mwena yandi. 2Muna tangwa batu ba Ngaza báyuka: «Samisoni wisidi kwaku», bázyeta buala, beka mumuyukana phipha yosu kuna mwelu wa mbanza. Bákala talala phipha yosu, beka muzimbwala: «Mu suka tukamúhonda.» 3Samisoni wáleka kwakuna tii yi kuna kisuku. Muna kisuku wátokama, wákwata mwelu mya mbanza yi makunzi modi ma mwelu, wázakudini mawu ha kimosi yi kikokolu, wásya mawu ha mahembu mandi, amana wánata mawu ku londi dya mongu wuna watála Eboloni.
4Kunima dya bwabuna, wázola mukhetu mosi muna beti dya Soleki, khumbu yandi Delila. 5Bapfumu ba Bafilisiti bisa kwena yandi, beka muzimbwala: «Muleya amana wazaya kweku ngolu zandi za lawu zenina, yi phila yina tulenda mukúhanga yi mukúkasa ndangu tumulembika. Kosu mutu wa betu kakúheka mbongu za palata funda yimosi yi nkama mosi.»
6Delila wuzimbudi kwena Samisoni: «Nzimbwala kweku ngolu zaku za lawu zenina, yi phila ngeyi walenda kukasama yi kulembika.»
7Samisoni wumuzimbwadini: «Yuka ni bakhasa yi misinga mya pha sambwadi mina mimbisi, mina mikondi yuma kedi, yikála wazoka, yikála hanga yakala dyosu.»
8Amana bapfumu ba Bafilisiti bámunatina misinga mya pha sambwadi, mina mikondi yuma kedi, amana wámukasa mu mawu. 9Buthwena, yákala yi bayakala bana bakala leya mu suku dya mu kati. Wumuzimbwadini: «Bafilisiti bakwisidi kwena ngeyi, Samisoni!» Kaasi wátabula misinga hanga nsinga wa lino wutabukanga tangwa wusimbi mbawu. Hanga diswekamu dya ngolu zandi dyázayakanaku.
10Delila wuzimbudi kwena Samisoni: «Wunsevila amana wunzimbwadi mambu ma luvunu. Buthwena, nzimbwala phila ngeyi walenda kukasama.»
11Wumuzimbwadini: «Yuka ni bakhasa mboti yi misinga mya pha mina mikondi sadila kedi, yikála wazoka, hanga yakala dyosu.»
12Delila wábonga misinga mya pha amana wámukasa mu mawu, beka muzimbwala: «Samisoni, Bafilisiti bakwisidi kwena ngeyi!» Bayakala bakala leya mu suku dya mu kati. Kaasi wátabula misinga mu moku mandi hanga nsinga wa nledi.
13Delila wuzimbudi kwena Samisoni: «Wunsevila amana wunzimbwadi luvunu tangwa dyodyosu. Nzimbwala phila ngeyi walenda kukasama.» Wumuzimbwadini: «Yuka ni wazínga bitsuki sambwadi bya mutwa wama mu nledi wa kutungila amana wazyamisabyo yi khoba, yikála wazoka hanga yakala dyosu.»
14Wázyamisa yi khoba amana wumuzimbwadini: «Samisoni, Bafilisiti bakwisidi kwena ngeyi!» Kaasi wátokama mu tulu lwandi amana wázakudini khoba, nti wa kutungila, yi nledi.
15Wuzimbudi: «Khi phila walenda zonza “Ngeyi yikuzolani” buna mbundu yaku yeku yi meni? Mbala tatu wunsevila amana wunzimbwadiniku kweku ngolu zaku za lawu zenina.»
16Muna tangwa wámukakidikisa ni ndinga zandi kosu kilumbu amana beka mubokwadila, wálembwa lawu tii kázola kafwa. 17Hanga wumuzimbwadini mbundu yandi yosu: «Mbedi yisimba mutwa wama kedi, mukuma yenina mwisi Nazili wa Tata wetu tuka mu vumu dya ngudi wama. Yuka ni bankulula, ngolu zama zankatuka, amana yikála wazoka, hanga yakala dyosu.»
18Muna tangwa Delila kámona ni wunzimbwadi mbundu yandi yosu, wátuma kwena bapfumu ba Bafilisiti: «Luzanza hika mbala yimosi, mukuma wunzimbwadi mbundu yandi yosu.» Hanga bazanza kwena yandi yi palata mu moku mawu. 19Wámulekisa tulu hana makungulu mandi, wátela yakala mosi, amana wámukulwisa bitsuki sambwadi bya mutwa wandi. Wáyandika mukulembika, amana ngolu zandi zákatuka. 20Wuzimbudi: «Bafilisiti bakwisidi kwena ngeyi, Samisoni!» Wátokama mu tulu lwandi, beka mubanza: «Yikalubuka hanga kutheka amana yikádikutumuna.» Kaasi kázayaku ni Tata wetu wámusisa.
21Bafilisiti bámukwata, bátobula mesu mandi, amana bámunata ku Ngaza. Bámukasa mu bisengu bya mbengi, amana wánika bule ku boloku. 22Kaasi tsuki za mutwa wandi záyandika kumena hika kunima dya kukulula.
Tata Wupheka Samisoni Ngolu Hika Mbala Yimosi
23Bapfumu ba Bafilisiti bálundakana ndangu batambika kimenga kineni kwena Dangoni nzambi wawu amana ndangu bata mukinzi, beka muzimbwala: «Nzambi wetu wutuyekidi Samisoni mbeni wetu mu moku metu.» 24Muna tangwa batu bámumona, bázitisa nzambi wawu, beka muzimbwala: «Nzambi wetu wuyekidi mbeni wetu, wuna wábunga tsi yetu amana wávudisa bafwa betu.»
25Muna tangwa mimbundu myawu myákala mu kyesi, bazimbudi: «Telenu Samisoni ndangu katusakisa.» Hanga bánata Samisoni tuka ku boloku, amana wábasakisa. Bámutelamisa hana kati dya makunzi. 26Samisoni wuzimbudi kwena mwana yakala wuna wásimba koku dyandi: «Yambula yisimba makunzi mana nzu yitelamini, ndangu yilenda kuzyamina.» 27Nzu yákala yibasi ni bayakala yi bakhetu; bapfumu boosu ba Bafilisiti bákala kwakuna, amana hana mudilu wa nzu, kitesu kya bayakala yi bakhetu funda tatu bakala tala Samisoni buna kakala saka. 28Amana Samisoni wátela kwena Tata wetu: «A Tata, Pfumu, utebukila meni, yikulombi. Umpheka ngolu mbala yayi kaka, ndangu mu mbambu mosi yivutula mbasu kwena Bafilisiti kikuma kya mesu mama modi.» 29Samisoni wásimba makunzi modi ma kati mana makala zyamisa nzu amana wázyamina kwena mawu, koku dyandi dya kibakala hana dimosi, dya lumoso hana dyankaka. 30Samisoni wuzimbudi: «Bika yifwa yi Bafilisiti.» Wátindika yi ngolu zandi zoosu, amana nzu yábwila bapfumu yi batu boosu bana bákala mu kati. Hanga wáhonda batu bawombo mu lufwa lwandi kuluta bana káhonda mu luzingu lwandi.
31Baphangi bandi yi batu boosu ba nzu ya tata wandi bákulumuka, bámubonga, bámuzangula, amana bámuzika hana kati dya Zola yi Esetawoli muna dizyamu dya tata wandi Manowa. Wákala wazusa Kiseledi mvula makumodi.
