Tata Wázonza kwena Moyize
Kunima dya kubuta, ngudi kenina wa mvindu bilumbu tsambwadi kikuma kya mwana wa yakala, amana bilumbu kumi yi biya kikuma kya mwana wa mukhetu, kunima kalungisa kudisemisa kwalawu ku thwala ya kubwesuka kwena kima kyatoma. Kanata mwana mukoku yi nuni, holo banuni bodi yuka ni kalendaku baka mwana mukoku.
Tata wetu kisi zonza mu mavese 2–8
12 1Tata wetu wázonza kwena Moyize, wuzimbudi:
2«Zimbula kwena bisi Kiseledi: Yuka ni mukhetu kakodidili amana kabuta mwana wa yakala, kenina wásumuka bilumbu tsambwadi, bwosu bwenina mu bilumbu bya maladi mandi ma ngonda. 3Amana mu kilumbu kya nana, mwana kakóta mukhanda. 4Mukuma bilumbu makumatatu yi bitatu, kakala mu menga ma kudisemisa kwandi. Kasimbaku kima kyatoma keti kimosi, kondilo kukota mu kikumbu, tii bilumbu bya kudisemisa kwandi bilungi. 5Yuka ni kabuta mwana wa mukhetu, kenina wásumuka bilumbu kumi yi biya, bwosu bwenina mu bilumbu bya maladi mandi ma ngonda; amana kakala mu menga ma kudisemisa kwandi bilumbu makumasambanu yi bisambanu.
6«Tangwa bilumbu bya kudisemisa kwandi kikuma kya mwana wa yakala holo mwana wa mukhetu bilungi, kafweti nata kwena nganga Nzambi, kuna mwelu wa sombolu ya lukutakanu, mwana mukoku wa mvula mosi kikuma kya kimenga kya kuyoka, amana phombu ya matuku holo mbwela kikuma kya kimenga kya ndoluka ya masumu. 7Yandi katámbika kyawu ku mesu ma Tata wetu amana kasadila mukhayilu wa ndoluka ya masumu mandi; amana kakála wásema mu kutekuna kwa menga mandi. Wawu mutsiku wa mukhetu wuna wisi buta, kaba mwana wa yakala kaba mwana wa mukhetu.
8«Yuka ni kalendaku kusumba mwana mukoku, kalenda bonga mbwela boodi holo phombu boodi ba matuku—yimosi kikuma kya kimenga kya kuyoka, yikwawu kikuma kya kimenga kya ndoluka ya masumu. Nganga Nzambi kasadila mukhayilu wa ndoluka ya masumu mandi, amana kakála wásema.» a a v8 Tangwa bibuti byalendaku kusumba mwana mukoku, Tata wetu wáhana nzila kwena basukami mu kabu dyadi dyafyoti — amana kyaki kyawu kimenga kina Madiya kánata tangwa kátambika Yesu ku nzu ya Nzambi.
