Tata Wutúma Mbambala Wandi

Musamu wa Bukheti wunkufi yi wa tswalu lawu, wuna wisi songila Yesu hanga Musadi wa phasi, wuna wakwísa «ka ndangu bamusadila ku, kaasi mu kusadila, amana mu kulambula luzingu lwandi hanga thuka kikuma kya batu balawu.»

Tata wetu kisi zonza mu vese 11

Kapitulu 1.

Luyandiku lwa Musamu wa Bukheti wuna wa Yesu Kidisitu, wuna wenina Mwana wa Tata wetu. ^a Bwabuna másonama mu mukanda wa mbikudi Yesaya: «Tala, meni thumini mbambala wama ha thwala ya ngeyi, yandi kakuyidikila nzila yaku. Ndinga mosi yibati kalunga muna tseki: “Yidikenu nzila ya Pfumu, sungikenu mikinda myandi.”»

Yowani wámonika, kábotika muna nganga yi kásamuna mbotika ya kuvilukila kikuma kya ndoluka ya masumu. Batu boosu ba tsi ya Yuteya yi boosu ba Yelusalemi bákala kwisa kwena yandi, amana wubabotika muna nzadi Yolutani, bwabuna bákala funguna masumu ma bawu. Yowani wávwata mwika mya kamela, amana muna mbunda wákasa mukaba wa tsibu; bidya byandi byákala baphasu yi bwiki bwa tseki. Wásamuna: «Hana manima ma meni, wuna wuphiti meni mu ngolu wisi kwisa; yeku walunga mu kufukama yi kukutumuna misinga mya tsabatu zandi. Meni yálubotika mu mamba, kaasi yandi kalubotika mu Kitembu Kyatoma.»

Tata Wuzonzi mu Dyambu dya Mwana Wandi

Muna bilumbu bina, Yesu wákatuka ku Nazaleti ya Ngadidi, amana wabótika kwena Yowani muna Yolutani. Muna mbala mosi, bwosu kazanza mu mamba, wámona mazilu máyatuka amana Kitembu Kyatoma kukulumuka kwena yandi hanga yembi.

Amana ndinga yimosi yátuka ku zilu: «Ngeyi wenina Mwana wama, wuna watondama; mwena ngeyi tsidini kyesi kyama.»

Amana muna mbala mosi, Kitembu Kyatoma kimúfila mu nganga. Wákala muna nganga bilumbu makumaya, kakala totwa kwena Satana; kákala kumosi yi bibulu bya mu tseki, amana bambasi bamusadila.

Kunima dya kukwata Yowani, Yesu wakwísa ku Ngadidi, kásamuna Musamu wa Bukheti wa Tata wetu,

amana kazimbula: «Tangwa dilungidini, amana Kipfumu kya Tata wetu kyenina bela-bela; vilukenu amana kwikilenu Musamu wa Bukheti.»

Yesu Wutela Balonguki Bandi ba Theti

Bwosu Yesu kákala kangala ha khungu ya yanga dya Ngadidi, wámona Simoni yi myaki wandi Andele; bawu bákala losa wanda muna mamba, mukuma bákala balobi.

Amana Yesu wubazimbwadini: «Alwisa ndanda, amana meni yilukitula balobi ba batu.»

Amana muna mbala mosi, básisa mawanda ma bawu, benda mulanda.

Wáhaluka koma, wámona baphangi bodi, Zyaki yi Yowani phangi wandi, bana ba Zebeteya; bawu bákala muna mudimba wa bawu, bakala yilulula mawanda. Muna mbala mosi, wábatela; amana básisa tata wa bawu Zebeteya muna mudimba kumosi yi basadi ba kisalu, benda mulanda.

Lulendu hana Tombe

Benda ku Kapelenawumi. Muna mbala mosi, Yesu wákota muna nzu ya kimvuka ya Bayuta mu kilumbu kya sabata, amana wáyandika kulonga. Báyituka mu malongi mandi, mukuma kakala balonga yi lulendu, ka hanga balongi ba mitsiku ku. Amana muna mbala mosi, muna nzu ya kimvuka ya bawu, mwákala mutu mosi wákala yi kitembu kya mbi, amana wákalunga. Biki dyenina hakati dya betu yi ngeyi, Yesu mwisi Nazaleti? Wisidi mu kutubunga? Nzayi wuna ngeyi wenina: Watoma wa Nzambi!

Kaasi Yesu wámukaya: «Dibata, amana katuka mwena yandi!»

Amana kitembu kya mbi, mu kukonya kwa lawu yi mu kukalunga ni ndinga ya ngolu, kyákatuka mwena yandi. Boosu báyituka, amana bakala dihyula bimosi yi bikwawu: «Biki byabi? Malongi ma pha yi lulendu! Kabati tumina phi bitembu bya mbi, amana bikuntendisa!» Amana muna mbala mosi, khululuka yandi yámwangana kwosu muna binzunga byosu bya Ngadidi.

Mbukulu Yisa ku Nzu ya Simoni

Muna mbala mosi, wákatuka muna nzu ya kimvuka ya Bayuta, wenda ku nzu ya Simoni yi Andele, kumosi yi Zyaki yi Yowani. Buko bwa mukhetu wa Simoni wákala landalala yi kikhafuma, amana muna mbala mosi, bámuzimbwala kikuma kya yandi. Wisi, wámusimba koku, wámutelamisa. Kikhafuma kimuhwini, amana wubasadila.

Muna masikidika mana, bwosu tangwa dyákulumuka, bámunatina boosu bana bákala bela yi bana bákala yi bitembu bya mbi. Amana mbanza yosu yátakana kuna mwelu. Wábuka bambefu ba lawu bana bákala yi khonzu za phila zoosu, amana wákukwasa bitembu bya mbi bya lawu; kayambulaku bitembu bizonza, mukuma byázaya yandi.

Yesu Wukatuka mu Kulombila

Mu suku-suku, bwosu kuma kikala phipha, wátelama, wenda ku fulu kya tseki, amana wálombila kwakuna. Amana Simoni yi bana bákala kumosi yi yandi bamusanda, amana bámuwana, bamuzimbwadi: «Batu boosu babati kusanda.»

Wuzimbudi: «Twenda mwahika, ku mbanza za kinzunga, ndangu yisamuna kwakuna phi, mukuma kikuma kyaki yisila.»

Amana wenda muna Ngadidi yosu, kásamuna muna nzu za kimvuka za Bayuta amana kakukwasa bitembu bya mbi.

Mukwa Bwasi Wusemiswa

Mukwa bwasi mosi wisi, wámufukamina, amana wámulomba: «Yuka ni wuzodibwa, fwani watsemisa.»

Mu kuyuka kyadi dya lawu, Yesu wáyuna koku dyandi, wámusimba, amana wuzimbudini: «Nzodibwa, sema!»

Amana muna mbala mosi, bwasi bwámukatuka, amana wásema. Yesu wámukebisa ni ngolu, amana muna mbala mosi wámusula,

amana wuzimbudi: «Keba, wuzimbulaku kima kwena mutu; kaasi ndawenda kwena nganga Nzambi, disongila ngeyi mosi, amana lambula makabu mana kásila Moyize kikuma kya kudisemisa kwaku, hanga kyakala kimbangi kwena batu.»

Kaasi yandi wálubuka, wáyandika kusamuna dyambu dina wengele yi kudimwanga, muna phila ni Yesu káyambwala mu kukota mu mbanza wengele, kaasi wánanga mu tseki. Kaasi batu bakala kwisa kwena yandi tuka mu bifulu byosu.