Mathayi 18 FHB Father's Heart Bible™

18 ¹Muna tangwa dina, balonguki bisa kwena Yesu, mu kumuhyula: «Buna, nani wenina mbuta mu Kipfumu kya Tata wetu?»

²Amana Yesu wátedisa muleki mosi kwena yandi, wásya yandi hana kati dya bawu,

³amana wuzimbudi: «Mu kyedika yiluzimbwadi: yuka ni lubaludiku mbundu amana luyikaku nana baleki, lwalendaku kukota mu Kipfumu kya Tata wetu. ⁴Yihakana ni wuna wadíkulumuna nana muleki yandu, kenina mbuta mu Kipfumu kya Tata wetu. ⁵Amana wuna wuyambini muleki yandu mosi mu khumbu yama, meni kayambini.»

Kuhukumuna baleki

⁶«Kaasi wosu wuna wuhukumuni mosi wa baleki baba bisi kwikila mwena meni, bulungi kwena yandi bamuzitikila kalunga tadi dya zitu hana tsingu amana bamudibula muna dingu dya yanga dya mbuta.»

⁷«Disa kwena tsi kikuma kya bima bina bisi nata kisinza kya kubwila! Bifwaniku kwisa, kaasi disa kwena wuna wubinata. ⁸Yukani koku dyaku keti kitambi kyaku kyakusumunaka, bukunadya amana suladya kyana. Bulungi kwena ngeyi wakota mu luzingu wakata keti wafwa malu, ka mboti ku ni wakala yi moku maku modi keti bitambi byaku byodi amana bakulosa ku mbawu ya mvula yi mvula.» ⁹Yukani disu dyaku dyakusumunaka, vusadya amana suladya kyana. Bulungi kwena ngeyi wakota mu luzingu yi disu dimosi, ka mboti ku ni wakala yi mesu maku modi amana bakulosa ku mbawu ya bilungi.

Tata wisi sanda dikoku dimosi dyazímbala

¹⁰«Kebenu ndangu lulewulaku mosi wa baleki baba. Yiluzimbwadi, banzyo ba bawu mu mazilu, mu matangwa moosu bisi mona thwala ya Tata wama wenina mu mazilu.» ^a a v10 Mikanda mya thona myena yi tini kya 11 ku haha; mikanda mya kunima mweti ya buula: «Mukuma Mwana wa mutu wisa mu kuhulusa bana bazímbala.»

¹²«Biki lubati banza? Yuka ni mutu wenina yi mikoku khama, amana wumosi watotisa, keti kasísaku makumi vwa yi vwa mahika ha mina mya khunda, hanga kenda sanda wuna wutotiki? ¹³Yuka ni waséngumuna wawu, mu kyedika yiluzimbwadi: kasi sephila yi wawu kuluta makumi vwa yi vwa mana makonda totisa. ¹⁴Phila mosi, kyeku lwesi luzolu lwa Tata wenu wenina mu mazilu ndangu mosi wa baleki baba kazimbala.»

Tangwa phangi wusumukini kwena ngeyi

¹⁵«Yuka ni phangi waku wusumukini kwena ngeyi, nda musongila kikuma kyandi, ngeyi yi yandi lukwenu mosi. Yuka ni wukuyukidi, wekuvutula phangi waku. ¹⁶Kaasi yuka ni kazodiku kuyukila, bonga mutu mosi keti bodi ndangu kwenda yi ngeyi, hanga dyambu dyosu dyatelama mu nwa ya bimbangi bodi keti bitatu. ¹⁷Yuka ni kazodiku kubayukila, zimbwala kwena kimvuka kya bakwikidi. Amana yuka ni kazodiku kuyukila kimvuka phi, kakala kwena ngeyi nana mutu wa khunda keti kalaki ka phaku. ¹⁸Mu kyedika yiluzimbwadi, byoso bina lwakása ha tsi, byakásama mu mazilu; amana byoso bina lwakútumuna ha tsi, byakútumuka mu mazilu. ¹⁹Yiluzimbwadi hika mu kyedika: yuka ni bodi ha kati dya benu ha tsi bayukana kikuma kya kima kibati lomba, Tata wama wenina mu mazilu kabásadila kyawu. ²⁰Mukuma kuna bodi keti bitatu bakutakani mu khumbu yama, kuna meni yenina hana kati dya bawu.»

Khenda ya Tata yi khenda yetu

²¹Hanga Phetelu wisa kwena Yesu: «Pfumu, ndambu tangwa kwa yifwani kulolula phangi wama wisi sumuka kwena meni? Tii yi tangwa tsambwadi?»

²²Yesu wávutula: «Yikuzimbwadi, ka tangwa tsambwadi ku, kaasi tangwa makumi tsambwadi yi tsambwadi. ²³Yihakana ni, Kipfumu kya Tata wetu kyafwanakana yi kyamvu wuna wázola kutala wolu yi basadi bandi. ²⁴Buna kayandika kutala wolu, bánata kwena yandi mutu mosi wuna wafwana kufuta pfuka ya lawu. ²⁵Mukuma kakala yi kima ku kya kufuta, pfumu wandi wáhana muswa bateka yandi, mukhetu wandi, bana bandi, yi byosu bina kákala byawu, amana bafuta pfuka.

²⁶Hanga musadi wáfukama ku thwala yandi, mu kumubokwadila: “Fwilakenu meni mvibudulu amana yikúvutula byosu.” ²⁷Pfumu wa musadi yandu, mbundu yandi yázala kyadi, wámuyambula amana wámulolula pfuka.»

²⁸«Musadi yandu wálubuka, wámona mukwa kisalu wuna wafwana kumufuta pfuka ya mbongu ya khama za bibendi, wámukwata amana wáyandika kumukama mu tsingu: “Futa kina wufwani kufuta kwena meni!”

²⁹Hanga mukwa kisalu wandi wáfukama amana wámubokwadila: “Fwilakenu meni mvibudulu; yikúvutula.” ³⁰Kaasi kázolaku, wenda wámutimbula mu boloku tii yi kuna kafútila pfuka. ³¹Mu kumona mana mábwa, bakwa kisalu bandi báyuka kiwayi kya lawu, bisa zimbwala kwena pfumu wa bawu mana moosu mábwa.

³²Hanga pfumu wámutedisa. Wuzimbudi: “Musadi wa mbi, yikulolula pfuka yina yosu mukuma wumbokwadila. ³³Kweku lwesi wufwani kufwila mukwa kisalu waku kyadi, bwosu yikufwila meni kyadi?” ³⁴Hanga pfumu wandi, mu khabu, wámuheka kwena bayubukisi tii yi kuna kafútila pfuka yosu. ³⁵Tata wama wenina mu mazilu kalúsadila phila mosi, yuka ni kosu mutu kalolulaku phangi wandi mu mbundu yandi yosu.»