Tangwa dya Pfundusu ya Ninive
Mvita yisi tula: bibalaka bya kabengi, makalu ma mvita masi monikina hanga minda mya mbweta, mielu mya nzadi misi zibulwa, nzu ya kipfumu yisi wulumuka, amana kyamvu wa mukhetu wanatwa bwosu basadi bandi ba bakhetu bisi dibunda thulu. Asidiya kákala hanga khosi yina yázadisa nzu yayo ni musuni wa kuzengwa; Tata, Mukwa ngolu zoosu, wisi zimbula ni Muzangi kenina kwena yawu.
Tata wetu kisi zonza mu vese 13
2 1Muzangi wisini kwena ngeyi mu mvita, Ninive. Kengila luphangu, tala nzila, zyamisa mbundu yaku, kutikisa ngolu zaku zoosu!
2Mukuma Tata wetu wisi vutula kineni kya Yakobi, hanga kineni kya Kiseledi, kaasi babotudi bábawomuna byosu amana bázanga mihandi mya bawu. a a v2 Ata muna mukanda wa pfundusu ya Ninive, dyambu dya mupfunu dyenina Tata wetu wisi vutula luzitu lwa bana bandi bana bábetwa.
3Bibalaka bya basuta ba yandi byenina ya kabengi, batu ba kikesa bavwata miledi mya kabengi; makalu ma mvita masi kenya hanga mbawu mu kilumbu kina mayidikilwa, amana madyonga ma miti masi tombulwa. 4Makalu ma mvita masi tina ni ngolu mu mabala-bala, masi tina koku yi koku muna bizika bya mbanza; masi monikina hanga minda mya mbweta, masi lubuka hanga mutsyenzya. 5Yandi wisi bokila batsinzidi ba yandi; bisi bwa-bwa bwosu bisi dyata; bisi tina tswatsu kuna kibaka, amana kibalaka kya lutaninu kisi telamiswa. 6Mielu mya nzadi misi zibulwa, amana nzu ya kipfumu yisi wulumuka. 7Dyazengwa bwabu: yandi wawomunwa byosu amana wanatwa, bwosu basadi ba yandi ba bakhetu bisi dila hanga mayembi, bisi dibunda thulu. 8Ninive yenina hanga kiziba kina mamba mandi masi lubuka. Bisi kalunga: «Telamenu! Telamenu!» Kaasi ka mutu ku wisi vutuka. 9Botulenu phalata! Botulenu wolu! Kimvwama kikondi tsuka, bima byosu bya thalu byenina lawu-lawu. 10Phamba, yi kuzangana, yi kuzanga! Mbundu zisi bula, makungulu masi tekita, kiwayi kisi kwata batu boosu, amana bizizi byosu bisi kituka phembi.
11Kweti kwenina bwabu saka dya bathambu, homa hana bisi dya bana ba bathambu, hana bisi dyata thambu yi thambu ya mukhetu, yi bana ba thambu, konda mutu wa kubayangisa? 12Thambu wáyata mbisi yina yifwana kikuma kya bana ba yandi, amana wázeka tsingu za bambisi kikuma kya bathambu ba bakhetu; wázadisa mazamba ma yandi ni bambisi bina káhonda, amana masaka ma yandi ni mbisi yina kayata.
13«Tala, meni yenina mbeni waku,» kazimbudini Tata, Mukwa ngolu zoosu. «Yiyóka makalu maku, makituka kyungila kya mwisi, amana mbedi ya phoku yidya bana ba bathambu baku. Yizénga mbisi yaku mu tsi, amana ndinga za bambambala baku zayukwaku hika.»
