Muzanga wa mwinda
Loni wásya mwinda nsambwadi, amana balefi básukulwa, bákuludwa tsuki, amana bánikiswa ku thwala ya Tata wetu hanga kimenga kya moya kya Kiseledi — báhekwa ha homa ha bana batheti ndangu batu balenga kwisa ku thwala konda mvwanzi. Kisalu kyawu kisi yandika tuka mvula makumole yi tanu yi kuna makumatanu.
Tata wetu kisi zonza mu mavese 2, 6–19, 24–26
8 1Tata wetu wázonza kwena Moyize, wuzimbudi:
2«Zimbula kwena Loni: Tangwa wubati tula mwinda, mwinda nsambwadi myafweti lema ku thwala ya muzanga wa mwinda.»
3Loni wásala bwabuna, walemisa mwinda myandi hanga myalema ku thwala ya muzanga wa mwinda, bwosu Tata wetu kázimbula kwena Moyize. 4Muzanga wa mwinda wáyidika mu wolu wa kubula, tuka ha sina tii yi ku biteka byandi. Bayidika kyawu bwosu kyedika Tata wetu kásongila Moyize.
Basolama kwena Tata wetu
5Tata wetu wázonza kwena Moyize, wuzimbudi:
6«Bonga balefi muna kati dya bana ba Kiseledi amana wasemisa bawu. 7Mu kusemisa bawu, sala bwabu: sophula mamba ma kudisemisa hana bawu, hita mbedi ha lutu lwawu lwosu, basukula miledi mya bawu, amana básema. a a v7 Mamba ma kudisemisa makala mamba ma kusemisa mana bakala sadila mu kusola balefi, mu kusonga ni básema hanga balenda sadila ku thwala ya Tata wetu. 8Babonga mwana ngombi muna kibuka, ni mukhayilu wandi wa pfuba yibundikisa yi masi; amana ngeyi wabonga mwana ngombi wa modi muna kibuka kikuma kya kimenga kya masumu. 9Nata balefi ku thwala ya sombolu dya lukutakanu, amana kutikisa kibuka kyosu kya bana ba Kiseledi. 10Tangwa wubati tambika balefi ku thwala yama, bisi Kiseledi batula moku hana balefi, 11Loni wanikisa balefi ku thwala yama, hanga kimenga kya kunikisa kituka kwena bisi Kiseledi, ndangu basadila kisalu kyama. 12Balefi batula moku ha mitwa mya bangombi; tambika mosi hanga kimenga kya masumu, mukwawu hanga kimenga kya kuyoka kwena meni, mu kukatula masumu ma balefi. 13Sya balefi ku thwala ya Loni yi bana bandi, amana tambika bawu kwena meni hanga kimenga kya kunikisa. 14Yekula balefi muna kati dya bana ba Kiseledi; balefi benina bama. 15Buna balefi bakóta mu kusadila sombolu dya lukutakanu, kunima dya kusemisa bawu amana kunikisa bawu hanga kimenga kya kunikisa. 16Mukuma báhana bawu kwena meni mu bufwani, muna kati dya bana ba Kiseledi; babonga kisiku kya kosu mwana wuna wisi zibula vumu, batsomi ba bana boosu ba Kiseledi. Yábabonga bawu kikuma kya meni-meni. 17Bana ba batsomi boosu ba Kiseledi, keti batu keti bibulu, benina bama; muna kilumbu kina yábeti bana ba batsomi boosu ba Ngiphiti, yábasya mu kingenga kikuma kya meni-meni. 18Amana yábonga balefi mu kisiku kya bana ba batsomi boosu muna kati dya bana ba Kiseledi. 19Yáhana balefi kwena Loni yi bana bandi, hanga kabu kya kutuka kwena bana ba Kiseledi, ndangu basadila bana ba Kiseledi ku sombolu dya lukutakanu, mu kukatula masumu ma bana ba Kiseledi, ndangu mvwanzi kabetaku bana ba Kiseledi, tangwa babati bwesuka yi kikumbu.»
20Moyize, Loni, yi kibuka kyosu kya bana ba Kiseledi básala kwena balefi mana moosu Tata wetu kázimbula kwena Moyize kikuma kya balefi; bana ba Kiseledi básala kwena bawu bwabuna. 21Balefi bádisemisa mu masumu, básukula miledi mya bawu; Loni wábanikisa hanga kimenga kya kunikisa ku thwala ya Tata wetu, amana wákatula masumu mawu mu kusemisa bawu. 22Kunima dya bwabuna, balefi bakwisa mu kusadila mu sombolu dya lukutakanu ku thwala ya Loni yi bana bandi; básala kwena balefi bwosu Tata wetu kázimbula kwena Moyize.
23Tata wetu wázonza kwena Moyize, wuzimbudi:
24«Mama matadidini balefi: tuka mu mvula makumodi yi tanu, bafweti kwisa mu kusadila kisalu ku sombolu dya lukutakanu. 25Tuka mu mvula makumatanu bafweti katuka mu kisalu kya kusadila amana basadilaku hika. 26Balenda sadisa baphangi bawu ku sombolu dya lukutakanu mu kukengila, kaasi basalaku kisalu. Bwabu bwosu wásongila balefi kisalu kya bawu.»
