Zatulenu Khumbu Yandi
Lukumu lwina lwátelama hana kimbangi: Tata wetu kisi hanga mana moosu kazola mu yanga yi mu zilu, wábeta Ngiphiti, wáhonda Sihoni yi Ogi amana wáheka tsi ya bawu. Mu kufwanakanisa bwabu, biteki bina byenina yi munwa yi mesu ma phamba bisi sisa bana bábihanga phamba phi hanga byawu.
135 1Aleluya! Muzatulenu khumbu ya Tata wetu; muzatulenu yandi, benu basadi ba Tata wetu, 2benu bana bisi sadila muna nzu ya Tata wetu, muna luphangu lwa nzu ya Tata wetu.
3Muzatulenu Tata wetu, mukuma Tata wetu kenina wa mboti; yimbilenu mikunga mya lukumu kwena khumbu yandi, mukuma yenina ya kyesi. 4Mukuma Tata wetu wásola Yakobi kikuma kya yandi meni, Kiseledi hanga kuvwa kwandi kwa thalu.
5Mukuma meni yizayi ni Tata wetu kenina wa mbuta, amana Tata wetu Pfumu wetu kalúta banzambi boosu. 6Mana moosu Tata wetu kázola, wásala, mu mazilu yi ha tsi, mu mayanga yi madingu mawu moosu. 7Kisi zangula matuti tukidila ku tselu ya tsi; kisi hanga mitsyenzya kikuma kya mvula amana kisi lubula pfunzi tukidila mu bilundulu byandi.
8Wábeta bana ba tsomi ba Ngiphiti, kwakala batu kondilo bambisi. 9Wátuma bidimbu yi bithondu mu kati dya ngeyi, Ngiphiti, kwena Fwalawo yi basadi bandi boosu. 10Wábeta makanda malawu amana wáhonda bakyamvu ba ngolu. 11Sihoni, kyamvu wa Bamoli, amana Ogi, kyamvu wa Basani, amana bipfumu byosu bya Kanana, 12Amana wáheka tsi ya bawu hanga kimvwama, kimvwama kwena Kiseledi, batu bandi.
13Khumbu yaku, A Tata wetu, yisi zinga mvula yi mvula; khululuka yaku, A Tata wetu, muna makula moosu. 14Mukuma Tata wetu kahángila batu bandi masonga amana kayúkila basadi bandi kyadi.
15Biteki bya makanda byenina phalata yi wolu, kisalu kya moku ma batu. 16Byenina yi munwa, kaasi byalendaku zonza; byenina yi mesu, kaasi byalendaku mona; 17byenina yi matu, kaasi byalendaku yuka, amana heku keti mwela mu munwa myawu. 18Bana bisi yidika byawu bakituka hanga byawu, amana boosu bana bisi sya kivuvu kyawu mwena byawu phila mosi.
19Benu nzu ya Kiseledi, sakumunenu Tata wetu; benu nzu ya Loni, sakumunenu Tata wetu; 20Benu nzu ya Lefi, sakumunenu Tata wetu; benu bana bisi tina Tata wetu, sakumunenu Tata wetu. 21Tata wetu kasakumuka tukidila ku Siyoni, yandi wuna wisi zingila mu Yelusalemi. Aleluya!
