Tsengumuka 14 FHB Father's Heart Bible™

14 ¹Yímona Mwana wa mukoku, Yesu, watelama hana mongu wa Siyoni, ha kimosi yi batu 144.000, bana bakála yi khumbu yandi yi khumbu ya Tata wandi básonika ha mbunzu za bawu. ²Yáyuka ndinga yátuka ku zilu, yafwanana yi malokosi ma mamba malawu mabati budumuka, yi hanga thungidi ya ngolu; amana ndinga yina yáyuka yafwanana yi batu bisi sika bisikwa bya bawu. ³Básangwala dikana dya pha ku thwala ya kiti kya luyalu, yi ku thwala ya bihangwa biya bya moya, yi bambuta. Kaka batu 144.000 bana báhuluka mu tsi bawu balenda longuka dikana dina. ⁴Bawu baba benina batu bana bakondi sumuka yi bakhetu, mukuma bawu benina bandumba. Bawu bisi landa Yesu, Mwana wa mukoku, kwosu kuma kuna kakwenda. Básumbwa ha kati dya batu, bawu batheti kwena Tata wetu yi kwena Mwana wa mukoku, ⁵amana luvunu lwámonwaku mu munwa mya bawu; bawu benina konda kifu.

Musamu wa Bukheti wa Mvula yi Mvula Wisi Yalangana

⁶Yímona nzyo wa hika kabati zula mu londi dya zilu, wukala yi Musamu wa Bukheti wa mvula yi mvula, ndangu kásamwana kwena bisi zinga mu tsi, kwena kosu kanda, yi kosu butuka, yi yosu ndinga, yi kwena batu boosu. ⁷Wákalunga mu ndinga ya ngolu: «Luyuka bweya Tata wetu, luheka yandi khembu, mukuma tangwa dya lufundusu lwandi dilungidini. Lufukamina Muhangi wa zilu, yi tsi, yi yanga, yi matho ma mamba.»

⁸Nzyo wa zodi wálanda: «Dyabwa, dyabwa Babiloni dya mbuta, dina dyánwisa makanda moosu vinu dya tsatu za kitsuza kyandi.»

⁹Nzyo wa tatu wálanda, kabati kalunga: «Wosu wuna wisi fukamina mbisi yi kifwani kyandi, amana watambula kidimbu ha mbunzu yandi keti ha koku kwandi, ¹⁰yandi phi kanwádya vinu dya nganzi ya Tata wetu, vinu dina dikondi vwangwa, mu mbungu wa khabu yandi; amana kanyokuka mu mbawu yi mu bupfundu ku thwala ya banzyo batoma yi ku thwala ya Mwana wa mukoku. ¹¹Mwisi wa minyanga mya bawu wisi tombuka mvula yi mvula; bawu bakálaku kuvunda mwini keti phipha, bawu babana bisi fukamina mbisi yi kifwani kyandi, keti babana bisi tambula kidimbu kya khumbu yandi.»

¹²Haha hena kikwamina kya bakwikidi: bawu babana bisi lunda mitsiku mya Tata wetu, amana bisi simba lukwikilu lwa bawu mwena Yesu.

¹³Yáyuka ndinga yátuka ku zilu, yizimbula: «Sonika: Kyesi kwena bafwa babana bisi fwa mwena Pfumu, tuka buthwena.» Kitembu Kyatoma kizimbudi: «Eeh, bawu bisi vunda mu bisalu bya bawu, mukuma mihangu mya bawu misi landa bawu.»

Wuna Wafwanana yi Mwana wa Mutu

¹⁴Yátala: tuti dya phembi, amana hana thandu ya tuti dina wazakala mutu wafwanana yi Mwana wa mutu, disongidila Yesu; mukhonzi wa wolu kuna mutwa wandi, yi mbedi ya kuloma mu koku kwandi. ¹⁵Nzyo wa hika wálubuka mu nzu ya Nzambi, kabati kalunga mu ndinga ya ngolu kwena wuna wazakala hana tuti: «Tula mbedi yaku amana wuhela, mukuma tangwa dya kuhela dilungidini, mbongu ya tsi yábenga kyedika.» ¹⁶Buna wuna wazakala hana tuti wátula mbedi yandi hana tsi, amana tsi yáhelama.

¹⁷Amana nzyo wa hika wálubuka mu nzu ya Nzambi yina yenina ku zilu, yandi phi wukala yi mbedi ya kuloma. ¹⁸Nzyo wa hika, wukala yi lulendu hana mbawu, wátuka ku mesa ma kimenga, amana wákalunga mu ndinga ya ngolu kwena wuna wusimbi mbedi ya kuloma: «Tuma mbedi yaku ya kuloma amana wukutikisa bibundu bya vinu dya tsi, mukuma bibundu bya vinu byábenga.» ¹⁹Nzyo wátula mbedi yandi mu tsi, wáhela vinu dya tsi, amana wádilosa mu kinyongi kya vinu kya mbuta kya nganzi ya Tata wetu. ²⁰Kinyongi kya vinu kyádyatikilwa ku mbasa ya mbanza, amana menga mákuluka mu kinyongi kya vinu, tii mákanana ha kiti kya kasa dya phunda, mu kitesu kya mile 180.