詩篇 34

34 ¹我要時時刻刻稱頌我哋嘅父; 讚美佢嘅說話會常常喺我口唇邊。

²我嘅心靈要因我哋嘅父而誇耀;願謙卑嘅人聽見就歡喜。 ³你哋同我一齊尊我哋嘅父為大;等我哋一齊高舉佢嘅名。

⁴我尋求我哋嘅父,佢就應允 我;佢救我脫離我一切嘅恐懼。 ⁵仰望佢嘅人就有光彩;佢哋嘅臉永遠唔會蒙羞。 ⁶呢個困苦嘅人呼求,我哋嘅父就聽見 佢;救佢脫離一切嘅患難。 ⁷我哋嘅父嘅使者喺敬畏佢嘅人四周安營, 並且拯救佢哋。

⁸你哋要嚐吓、睇吓,就知道我哋嘅父係良善嘅; 投靠佢嘅人有福喇。 ⁹你哋做佢聖民嘅,要敬畏我哋嘅父,因為敬畏佢嘅人一無所缺。 ¹⁰少壯嘅獅子都會捱餓 缺乏,但係尋求我哋嘅父嘅人,乜嘢好嘅都唔會缺。

¹¹細路仔,你哋嚟啦,聽 我講;我要教你哋敬畏我哋嘅父。 ¹²邊個係渴慕生命、 又愛慕享受多多好日子嘅人呢? ¹³就要禁止你嘅舌頭唔好講惡毒嘅話, 禁止你嘅嘴唇唔好講詭詐嘅話。 ¹⁴要離開惡事、去行善; 要尋求和平、努力追求。

¹⁵我哋嘅父嘅眼目看顧義人, 佢嘅耳朵側耳聽佢哋嘅呼求。 ¹⁶我哋嘅父嘅臉向住行惡嘅人, 要將佢哋喺世上嘅記念都除滅。 ¹⁷義人呼求,我哋嘅父就聽見; 救佢哋脫離一切嘅患難。 ¹⁸我哋嘅父親近心靈破碎嘅人; 拯救靈裏被壓傷嘅人。

¹⁹義人面對好多苦難, 但係我哋嘅父救佢哋每一個脫離所有苦難。 ²⁰我哋嘅父保守義人一身嘅骨頭; 連一條都唔會折斷。

²¹惡事必害死惡人; 憎恨義人嘅必被定罪。 ²²我哋嘅父救贖佢僕人嘅性命; 凡投靠佢嘅,一個都唔會被定罪。