ቃሉን ስበክ

በአብ ፊት የተሰጠ የጳውሎስ የመጨረሻ ዐደራ፤ ሰዎች የሚፈልጉትን የሚነግሯቸውን አስተማሪዎች ስለሚሰበስቡ፣ ቢመችም ባይመችም ቃሉን ስበክ። የራሱን ፍጻሜ ያውቃል — እንደ መሥዋዕት ፈስሷል፣ ሩጫውን ጨርሷል — ማን እንደ ተወው፣ ማን እንደ ቀረ፣ ማንም ከእርሱ ጋር እንደ ቆመ በስም ይጠራል።

ምዕራፍ 4።

በአባታችንና በሕያዋንና በሙታን ላይ በሚፈርደው በክርስቶስ ኢየሱስ ፊት፣ በመገለጡና በመንግሥቱም አጥብቄ አደራ እሰጥሃለሁ፤ ቃሉን ስበክ፤ በጊዜውም ያለ ጊዜውም ተዘጋጅተህ ቁም፤ በሙሉ ትዕግሥትና በትምህርት ዝለፍ፣ ገሥጽ፣ አበረታታም። ሰዎች ጤናማውን ትምህርት የማይታገሡበት ዘመን ይመጣልና፤ ነገር ግን ጆሮአቸው ስለሚያሳክክ እንደ ገዛ ምኞታቸው የሚስማሙ አስተማሪዎችን ለራሳቸው ያከማቻሉ፤ ጆሮአቸውንም ከእውነት መልሰው ወደ ተረት ይሳባሉ። አንተ ግን በነገር ሁሉ ልብህን ጠብቅ፣ መከራን ታገሥ፣ የወንጌላዊን ሥራ ሥራ፣ አገልግሎትህንም ፈጽም። እኔ አስቀድሞ እንደ መጠጥ መሥዋዕት እየፈሰስሁ ነውና፤ የምሄድበትም ጊዜ ደርሷል። ^a መልካሙን ገድል ተጋድያለሁ፣ ሩጫውን ፈጽሜአለሁ፣ ሃይማኖትን ጠብቄአለሁ። አሁንም የጽድቅ አክሊል ይጠብቀኛል፤ ይህንም ጻድቅ ፈራጅ የሆነው ጌታ በዚያ ቀን ይሰጠኛል፤ ለእኔ ብቻ ሳይሆን መገለጡን ለወደዱ ሁሉ ደግሞ ይሰጣቸዋል።

የጳውሎስ የመጨረሻ ሐሳቦች

ፈጥነህ ወደ እኔ ልትመጣ ትጋ። ዴማስ ይህን የአሁኑን ዓለም ወዶ ትቶኝ ወደ ተሰሎንቄ ሄደ፤ ቄርቂስ ወደ ገላትያ፣ ቲቶም ወደ ዳልማጥያ ሄደ። ሉቃስ ብቻ ከእኔ ጋራ ነው። ማርቆስን ይዘህ ከአንተ ጋራ አምጣው፤ ለአገልግሎት ይጠቅመኛልና። ቲኪቆስን ወደ ኤፌሶን ላክሁት። ስትመጣ በጢሮአዳ በቀርጶስ ዘንድ የተውሁትን ካፖርት፣ መጻሕፍቱንም፣ ይልቁንም ብራናዎቹን አምጣ። አንጥረኛው እስክንድር ብዙ ክፉ አደረገብኝ፤ ጌታ እንደ ሥራው ይከፍለዋል። አንተም ከእርሱ ተጠበቅ፤ ቃላችንን እጅግ ተቃውሞአልና።

በመጀመሪያው መልሴ ጊዜ ማንም ከእኔ ጋራ አልቆመም፤ ሁሉም ተዉኝ፤ ይህ አይቆጠርባቸው። ጌታ ግን ከእኔ ጋራ ቆመ፤ አበረታኝም፤ ይኸውም በእኔ በኩል ቃሉ ፍጹም እንዲሰበክና አሕዛብ ሁሉ እንዲሰሙ ነበር። ከአንበሳውም አፍ ዳንሁ። ጌታ ከክፉ ሥራ ሁሉ ያድነኛል፤ ወደ ሰማያዊ መንግሥቱም በደኅና ያደርሰኛል። ለእርሱ ከዘላለም እስከ ዘላለም ክብር ይሁን። አሜን።

የመጨረሻ ሰላምታ

ጵርስቅላንና አቂላን፣ የአናሲፎሩንም ቤተ ሰዎች ሰላምታ አቅርብልኝ። ኤርስጦስ በቆሮንቶስ ቀረ፤ ጥሮፊሞስንም ታሞ ስለ ነበር በሚሊጢስ ተውሁት። ከክረምት በፊት ልትመጣ ትጋ። አውብሉስ፣ ጱዴስ፣ ሊኖስ፣ ቀላውዲያና ወንድሞችና እኅቶች ሁሉ ሰላምታ ያቀርቡልሃል።

ጌታ ከመንፈስህ ጋራ ይሁን። ጸጋ ከሁላችሁ ጋራ ይሁን።