መክብብ 6 FHB Father's Heart Bible™

6 ¹ከፀሐይ በታች ያየሁት ክፉ ነገር አለ፤ በሰው ልጆችም ላይ እጅግ ይከብዳል፦ ²እግዚአብሔር ሀብትን፣ ብልጽግናንና ክብርን የሚሰጠው፣ ነፍሱ ከምትመኘውም ነገር ሁሉ ምንም የማይጐድልበት ሰው አለ፤ ነገር ግን እግዚአብሔር ከዚህ እንዲበላ አይፈቅድለትም፤ በእርሱ ፈንታ መጻተኛ ይበላዋል። ይህ ከንቱ፣ የከፋ ደዌ ነው።

³አንድ ሰው መቶ ልጆችን ቢወልድ፣ ብዙ ዓመታትም ቢኖር፣ ዕድሜው ምንም ያህል ረጅም ቢሆን፣ ነፍሱ ግን በመልካም ነገር ካልረካች፣ እርሱም ባይቀበር፣ ጨንግፎ የተወለደ ልጅ ከእርሱ ይሻላል እላለሁ። ⁴በከንቱ ይመጣል፤ ወደ ጨለማም ይሄዳል፤ ስሙንም ጨለማ ይሸፍነዋል። ⁵ፀሐይን ፈጽሞ ባያይ፣ ምንም ባያውቅም እንኳ፣ ከዚያ ሰው ይልቅ ዕረፍት አለው። ⁶ሺህ ዓመት ሁለት እጥፍ ቢኖር እንኳ፣ መልካምን ነገር ፈጽሞ ሳይደሰትበት ቢቀር፣ ሁሉ ወደ አንድ ስፍራ አይሄዱምን? ⁷የሰው ድካም ሁሉ ለአፉ ነው፤ ምኞቱ ግን ከቶ አይጠግብም። ⁸ጠቢቡ ከሰነፉ የሚበልጥበት ጥቅም ምንድን ነው? ድኻውስ በሰዎች ፊት እንዴት መመላለስ እንዳለበት በማወቁ ምን ያተርፋል? ⁹ዐይን የሚያየው ከምኞት መንከራተት ይሻላል። ይህም ደግሞ ከንቱ፣ ነፋስንም እንደ መከተል ነው። ¹⁰ያለው ሁሉ አስቀድሞ ስም ተሰጥቶታል፤ ሰውም ምን እንደ ሆነ ይታወቃል፤ ከእርሱ ከሚበረታም ጋር ሊከራከር አይችልም።

¹¹ቃላት በበዙ ቍጥር ከንቱነቱ ይጨምራል፤ ይህስ ለማንም ምን ይጠቅማል? ¹²እንደ ጥላ በሚያልፈው በከንቱ ሕይወቱ ጥቂት ዘመን ውስጥ፣ ለሰው መልካም የሆነውን ማን ያውቃል? ከእርሱ በኋላ ከፀሐይ በታች ምን እንደሚሆን ለሰው ማን ሊነግረው ይችላል?