አስቴር ስለ ሕዝቧ ተማጸነች

በሁለተኛው ግብዣ አስቴር በመጨረሻ ለራሷና ለሕዝቧ ሕይወት ትለምናለች፤ የሸጣቸውንም ሰው በስም ትጠራለች፦ ሐማ። ንጉሡ በቁጣ ተነሥቶ ይወጣል፤ ሐማ እየለመነ በአልጋዋ ላይ ይወድቃል፤ ይህም እንደ ጥቃት ይቆጠራል። በገዛ ግንዱ ላይ ይሰቀላል።

ምዕራፍ 7።

ንጉሡና ሃማም ከንግሥት አስቴር ጋራ ሊጠጡ መጡ። በሁለተኛውም ቀን ንጉሡ የወይን ጠጅ ሲጠጡ እንደ ገና፣ “ንግሥት አስቴር ሆይ፤ ልመናሽ ምንድን ነው? ይፈጸምልሻል። ጥያቄሽስ? እስከ መንግሥቴ እኵሌታ ድረስ ቢሆን እንኳ ይደረግልሻል” ሲል ጠየቀ።

ንግሥት አስቴርም መልሳ እንዲህ አለች፤ “ንጉሥ ሆይ፤ በፊትህ ሞገስ አግኝቼ እንደ ሆነ፣ ንጉሡንም ደስ የሚያሰኘው ከሆነ፣ በልመናዬ ሕይወቴ፣ በጥያቄዬም ሕዝቤ ይሰጠኝ። እኔና ሕዝቤ እንድንጠፋ፣ እንድንገደል፣ እንድንደመሰስ ተሽጠናልና። ለወንድና ለሴት ባሪያነት ብቻ ተሽጠን ቢሆን ኖሮ ዝም ባልኩ ነበር፤ እንዲህ ያለው መከራ ንጉሡን ለማስቸገር የሚያበቃ አይደለምና።”

ንጉሥ አርጤክስስም ንግሥት አስቴርን፣ “ይህን ለማድረግ የሚደፍር ማን ነው? የትስ አለ?” አላት።

አስቴርም፣ “ባላጋራውና ጠላቱ ይህ ክፉ ሃማ ነው!” አለች። ሃማም በንጉሡና በንግሥቲቱ ፊት ደነገጠ።

ንጉሡም በቍጣ ተነሥቶ ከወይን ጠጁ ወደ ቤተ መንግሥቱ አትክልት ስፍራ ወጣ፤ ሃማ ግን ንጉሡ ጥፋቱን እንደ ቈረጠበት ስላየ ስለ ሕይወቱ ንግሥት አስቴርን ለመለመን ቀረ። ንጉሡም ከቤተ መንግሥቱ አትክልት ስፍራ ወደ ግብዣው አዳራሽ ተመለሰ። ሃማም አስቴር ባለችበት አልጋ ላይ ወድቆ ነበር። ንጉሡም፣ “እኔ በዚሁ ሳለሁ ንግሥቲቱን እስከ መድፈር ይደርሳል?” አለ። ይህም ቃል ከአፉ ሳይወጣ አገልጋዮቹ የሃማን ፊት ሸፈኑ። ^a

ከንጉሡ ጃንደረቦች አንዱ ሐርቦና፣ “ሃማ ለንጉሡ መልካም ለተናገረው ለመርዶክዮስ ያሠራው ሰባ አምስት ጫማ የሚረዝም መስቀያ በሃማ ቤት ቆሞአል” አለ። ንጉሡም፣ “በእርሱ ላይ ስቀሉት” አለ።

ስለዚህ ለመርዶክዮስ ባዘጋጀው መስቀያ ላይ ሃማን ሰቀሉት፤ የንጉሡም ቍጣ በረደ።