ለኖኅ አዲስ ጅማሬ

ከአብ ዘንድ ከሥርዓት ጋር አዲስ ጅማሬ፦ ተባዙ፤ ሕይወቱ የሆነውን ደም አትብሉ፤ ሰዎች መልኩን ስለሚሸከሙ የሰው ሕይወትም ይፈለጋል። ቀስተ ደመናን የኪዳን ምልክት አድርጎ ያኖራል። ከዚያም ኖኅ ይሰክራል፤ ካም ኀፍረቱን ይገልጣል፤ ከነዓንም ይረገማል።

ምዕራፍ 9።

አባታችንም ኖኅንና ልጆቹን ባረካቸው፤ እንዲህም አላቸው፤ “ብዙ ተባዙ፤ ምድርንም ሙሉ። የምድር አራዊት ሁሉ፣ የሰማይ ወፎች ሁሉ፣ በመሬት ላይ የሚሳብ ሁሉ፣ የባሕርም ዓሦች ሁሉ ይፈሩአችኋል፤ ይደነግጡባችኋል፤ በእጃችሁም ተሰጥተዋል። ሕያው ሆኖ የሚንቀሳቀስ ሁሉ ምግባችሁ ይሆናል። አረንጓዴውን ተክል እንደ ሰጠኋችሁ፣ አሁን ሁሉን እሰጣችኋለሁ። ነገር ግን ሕይወቱ ማለትም ደሙ በውስጡ ያለውን ሥጋ አትብሉ። ስለ ሕይወታችሁም ደም በርግጥ ተጠያቂ አደርጋለሁ፤ ከእያንዳንዱ እንስሳ እሻዋለሁ፤ ከሰውም ቢሆን፣ ከእያንዳንዱ ሰው ስለ ወንድሙ ሕይወት የሰውን ሕይወት እሻለሁ። የሰውን ደም የሚያፈስስ ሁሉ፣ ደሙ በሰው ይፈስሳል፤ ሰው የተፈጠረው በእግዚአብሔር መልክ ነውና። ^a እናንተ ግን፣ ብዙ ተባዙ፤ በምድር ላይ ተራቡ፤ በእርስዋም ላይ ተባዙ።”

አባታችንም ኖኅንና ከእርሱ ጋር የነበሩትን ልጆቹን እንዲህ አላቸው፤

“እነሆ፣ እኔ ከእናንተ ጋር፣ ከእናንተም በኋላ ከሚመጣው ዘራችሁ ጋር ኪዳኔን አሁን አቆማለሁ፤ ከእናንተም ጋር ካለው ሕያው ፍጥረት ሁሉ ጋር፤ ከወፎች፣ ከቤት እንስሳት፣ ከምድር አራዊት ሁሉ ጋር፤ ከእናንተ ጋር ከመርከብ ከወጣው ሁሉ ጋር፣ ከምድር ሕያዋን ፍጥረታት ሁሉ ጋር። ኪዳኔን ከእናንተ ጋር አቆማለሁ፤ ሥጋ ለባሽ ሁሉ ዳግመኛ በጥፋት ውሃ አይጠፋም፤ ምድርንም የሚያጠፋ የጥፋት ውሃ ዳግመኛ አይሆንም።” አባታችንም እንዲህ አለ፤ “በእኔና በእናንተ መካከል፣ ከእናንተም ጋር ካለው ሕያው ፍጥረት ሁሉ መካከል ለሚመጡት ትውልዶች ሁሉ የማደርገው የኪዳን ምልክት ይህ ነው፤ በእኔና በምድር መካከል ላለው ኪዳን ምልክት እንዲሆን፣ ቀስተ ደመናዬን በደመና ውስጥ አኖርሁ። በምድር ላይ ደመና ባመጣሁ ጊዜ፣ ቀስተ ደመናውም በደመና ውስጥ በታየ ጊዜ፣ በእኔና በእናንተ መካከል፣ በየዓይነቱም ሕያው ፍጥረት ሁሉ መካከል ያለውን ኪዳኔን አስባለሁ፤ የጥፋት ውሃም ሕይወት ያለውን ሁሉ ዳግመኛ አያጠፋም። ቀስተ ደመናው በደመና ውስጥ በሚሆንበት ጊዜ፣ አየዋለሁ፤ በእኔና በምድር ላይ ባለው በየዓይነቱ ሕያው ፍጥረት ሁሉ መካከል ያለውን የዘላለም ኪዳን አስባለሁ።” አባታችንም ኖኅን እንዲህ አለው፤ “በእኔና በምድር ላይ ባለው ሕይወት ሁሉ መካከል ያቆምሁት የኪዳን ምልክት ይህ ነው።”

ሴምና ያፌት አባታቸውን ሸፈኑ

ከመርከብ የወጡት የኖኅ ልጆች ሴም፣ ካምና ያፌት ነበሩ። (ካም የከነዓን አባት ነበር።) እነዚህ ሦስቱ የኖኅ ልጆች ነበሩ፤ ምድርም ሁሉ ከእነርሱ ተሞላች።

ኖኅም ገበሬ ሆኖ፣ የወይን ተክል የተከለ የመጀመሪያው ሰው ሆነ። ከወይኑም ጠጥቶ ሰከረ፤ በድንኳኑም ውስጥ ተራቁቶ ተኛ። የከነዓን አባት ካም የአባቱን ዕርቃን አየ፤ በውጭም ላሉት ለሁለቱ ወንድሞቹ ነገረ። ሴምና ያፌት ልብስ ወስደው በሁለቱ ትከሻቸው ላይ ጣሉ፤ የኋሊትም እየሄዱ ገብተው የአባታቸውን ዕርቃን ሸፈኑ፤ ፊታቸው ወደ ኋላ ዞሮ ስለ ነበር የአባታቸውን ዕርቃን አላዩም። ኖኅም ከወይኑ ስካር ነቅቶ ታናሽ ልጁ ያደረገበትን ባወቀ ጊዜ፣ እንዲህም አለ፤ “ከነዓን የተረገመ ይሁን! ለወንድሞቹ የባሪያዎች ባሪያ ይሆናል።”

ደግሞም እንዲህ አለ፤ “የሴም አባት የተባረከ ይሁን፤ ከነዓንም የሴም ባሪያ ይሁን። አባታችን የያፌትን ድንበር ያስፋፋ፤ ያፌትም በሴም ድንኳኖች ይኑር፤ ከነዓንም የሴም ባሪያ ይሁን።”

ከጥፋት ውሃው በኋላ ኖኅ ሦስት መቶ አምሳ ዓመት ኖረ። ኖኅ በአጠቃላይ ዘጠኝ መቶ አምሳ ዓመት ኖረ፤ ከዚያም ሞተ።