አባታችን ድምፁን ይልካል

ዮሐንስ በምድረ በዳ ይሰብካል፤ ሰዎችም በእውነት ምን ማድረግ እንዳለባቸው ደጋግመው ይጠይቁታል፦ ልብስን አካፍሉ፣ ከተወሰነው በላይ አትውሰዱ፣ አትቀሙ። የሄሮድስን ኃጢአት በስሙ ይጠራል፤ በዚህም ይታሰራል። ኢየሱስ ከሌሎቹ ሁሉ ጋር ይጠመቃል፤ አብም የሚወደው ልጁ ብሎ ይጠራዋል።

ምዕራፍ 3።

በጢባርዮስ ቄሳር በዐሥራ አምስተኛው ዓመት፣ ጶንጥዮስ ጲላጦስ የይሁዳ ገዥ በነበረ ጊዜ፣ ሄሮድስ የገሊላ አራተኛ ክፍል ገዥ፣ ወንድሙ ፊልጶስ የኢጡርያና የጥራኮኒዶስ አገር ገዥ፣ ልሳንዮስም የሳብለኔ ገዥ በነበሩ ጊዜ፣ ሐናና ቀያፋ ሊቀ ካህናት በነበሩበት ዘመን፣ የአባታችን ቃል በምድረ በዳ ወደ ዘካርያስ ልጅ ወደ ዮሐንስ መጣ። ለኀጢአትም ይቅርታ የንስሐን ጥምቀት እየሰበከ፣ በዮርዳኖስ ዙሪያ ያለውን አገር ሁሉ ተዘዋወረ፤ በነቢዩ በኢሳይያስ የቃላት መጽሐፍ ተጽፎ እንዳለ፦ “በምድረ በዳ የሚጮኽ ሰው ድምፅ፦ የጌታን መንገድ አዘጋጁ፤ ጎዳናውንም አቅኑ። ሸለቆ ሁሉ ይሞላል፤ ተራራና ኮረብታም ሁሉ ዝቅ ይላል፤ ጠማማው መንገድ ይቀናል፤ ሻካራውም መንገድ ይስተካከላል፤ ሥጋ ለባሽም ሁሉ የአባታችንን ማዳን ያያል።”

ዮሐንስም በእርሱ ሊጠመቁ ወደ እርሱ ለሚመጣው ሕዝብ እንዲህ አለ፦ “እናንተ የእፉኝት ልጆች፣ ከሚመጣው ቍጣ እንድትሸሹ ማን አስጠነቀቃችሁ? እንግዲህ ለንስሐ የሚገባ ፍሬ አፍሩ፤ ‘አብርሃም አባታችን ነው’ ማለትን በልባችሁ አትጀምሩ፤ አባታችን ከእነዚህ ድንጋዮች ለአብርሃም ልጆች ሊያስነሣ እንደሚችል እነግራችኋለሁና። አሁንም ምሳር በዛፎች ሥር ተቀምጧል፤ መልካም ፍሬ የማያፈራ ዛፍ ሁሉ ተቈርጦ ወደ እሳት ይጣላል።”

ሕዝቡም፣ “እንግዲህ ምን እናድርግ?” ብለው ጠየቁት።

እርሱም መልሶ፣ “ሁለት ሸሚዝ ያለው ለሌለው ያካፍል፤ ምግብ ያለውም እንደዚሁ ያድርግ” አላቸው።

ቀረጥ ሰብሳቢዎችም ሊጠመቁ መጥተው፣ “መምህር ሆይ፣ ምን እናድርግ?” አሉት።

እርሱም፣ “ከታዘዛችሁት በላይ አትሰብስቡ” አላቸው።

ወታደሮችም፣ “እኛስ ምን እናድርግ?” ብለው ጠየቁት። እርሱም፣ “ማንንም በኀይል አትበዝብዙ፤ በሐሰትም አትክሰሱ፤ በደመወዛችሁ ረኩ” አላቸው።

ሕዝቡም በመጠባበቅ ላይ ነበሩ፤ ሁሉም ምናልባት ዮሐንስ ራሱ ክርስቶስ ይሆንን በልባቸው ያስቡ ነበር። ዮሐንስ ለሁሉም መልሶ እንዲህ አለ፦ “እኔ በውሃ አጠምቃችኋለሁ፤ ነገር ግን ከእኔ የሚበረታ ይመጣል፤ የጫማውን ማሰሪያ ልፈታ አይገባኝም፤ እርሱ በመንፈስ ቅዱስና በእሳት ያጠምቃችኋል። መንሹ በእጁ ነው፤ አውድማውን ፈጽሞ ያጠራል፤ ስንዴውንም በጎተራው ይከታል፤ ገለባውን ግን በማይጠፋ እሳት ያቃጥላል።”

ዮሐንስም በሌሎች በብዙ የምክር ቃላት ለሕዝቡ ወንጌልን ሰበከ። አራተኛው ክፍል ገዥ የነበረው ሄሮድስ ግን ስለ ወንድሙ ሚስት ስለ ሄሮድያዳ፣ ስላደረገውም ክፋት ሁሉ ዮሐንስ ገሠጸው፤ ሄሮድስም ከሁሉ በላይ ይህን ጨመረ፤ ዮሐንስን በወኅኒ አስሮ ዘጋው።

አባታችን ልጁን የተወደደ ይለዋል

ሕዝቡ ሁሉ በተጠመቁ ጊዜ፣ ኢየሱስም ደግሞ ተጠመቀ። ሲጸልይም ሰማይ ተከፈተ፤

መንፈስ ቅዱስም እንደ ርግብ በአካል መልክ በእርሱ ላይ ወረደ፤ ከሰማይም ድምፅ መጥቶ፦ “አንተ የተወደድህ ልጄ ነህ፤ በአንተ ደስ ይለኛል” አለ።

ኢየሱስም አገልግሎቱን ሲጀምር ዕድሜው ሠላሳ ዓመት ያህል ነበር፤ እንደሚመስለውም የዮሴፍ ልጅ ነበር፤ ዮሴፍም የኤሊ ልጅ፣ የማጣት ልጅ፣ የሌዊ ልጅ፣ የሜልኪ ልጅ፣ የያናይ ልጅ፣ የዮሴፍ ልጅ፣ የማታትዮስ ልጅ፣ የአሞጽ ልጅ፣ የናሆም ልጅ፣ የኤስሊ ልጅ፣ የናጌ ልጅ፣ የማአት ልጅ፣ የማታትዮስ ልጅ፣ የሰሜይን ልጅ፣ የዮሴክ ልጅ፣ የዮዳ ልጅ፣ የዮሐና ልጅ፣ የሬሳ ልጅ፣ የዘሩባቤል ልጅ፣ የሰላትያል ልጅ፣ የኔሪ ልጅ፣ የሜልኪ ልጅ፣ የአዲ ልጅ፣ የቆሳም ልጅ፣ የኤልማዳም ልጅ፣ የዔር ልጅ፣ የኢያሱ ልጅ፣ የኤሊዔዘር ልጅ፣ የዮሪም ልጅ፣ የማጣት ልጅ፣ የሌዊ ልጅ፣ የስምዖን ልጅ፣ የይሁዳ ልጅ፣ የዮሴፍ ልጅ፣ የዮናም ልጅ፣ የኤልያቄም ልጅ፣ የሜልያ ልጅ፣ የሜና ልጅ፣ የማታታ ልጅ፣ የናታን ልጅ፣ የዳዊት ልጅ፣ የእሴይ ልጅ፣ የእዮቤድ ልጅ፣ የቦዔዝ ልጅ፣ የሰልሞን ልጅ፣ የነአሶን ልጅ፣ የአሚናዳብ ልጅ፣ የአድሚን ልጅ፣ የአርኒ ልጅ፣ የኤስሮን ልጅ፣ የፋሬስ ልጅ፣ የይሁዳ ልጅ፣ የያዕቆብ ልጅ፣ የይስሐቅ ልጅ፣ የአብርሃም ልጅ፣ የታራ ልጅ፣ የናኮር ልጅ፣ የሴሮሕ ልጅ፣ የራግው ልጅ፣ የፋሌቅ ልጅ፣ የዔቦር ልጅ፣ የሳላ ልጅ፣ የቃይናን ልጅ፣ የአርፋክስድ ልጅ፣ የሴም ልጅ፣ የኖኅ ልጅ፣ የላሜሕ ልጅ፣ የማቱሳላ ልጅ፣ የሄኖክ ልጅ፣ የያሬድ ልጅ፣ የመላልኤል ልጅ፣ የቃይናን ልጅ፣ የሄኖስ ልጅ፣ የሴት ልጅ፣ የአዳም ልጅ፣ የአባታችን ልጅ።