Esdras 9 FHB Father's Heart Bible™

9 ¹Sang natapus na ini, nagpalapit sa akon ang mga pangulo, nga nagasiling, “Ang katawohan sang Israel, ang mga saserdote, kag ang mga Levihanon wala nagpain sa mga katawohan nga nagalibut sa ila upud ang ila makangilil-ad nga mga buhat—ang mga Canaanhon, mga Hethanon, mga Perezhanon, mga Jebusehanon, mga Ammonhon, mga Moabhon, mga Egiptohanon, kag mga Amorhanon. ²Nagkuha sila sang pila sa ila mga anak nga babayi nga mangin asawa nila kag sang ila mga anak nga lalaki, kag ginsimbog nila ang balaan nga kaliwatan sa mga katawohan nga nagalibut sa ila. Kag ang mga pangulo kag mga tagpanguna amo ang nagpanguna sa sini nga pagkadimatutum.”

³Sang mabatian ko ini, gingisi ko ang akon panapton kag kunup, gin-gabot ko ang buhok sa akon ulo kag bungot, kag naglingkod ako nga tuman ang kakugmat. ⁴Niyan nagtipon sa akon ang tanan nga nagakurug sa mga pulong sang Dios sang Israel, ang aton Amay, tungud sa pagkadimatutum sang mga bihag, kag naglingkod ako nga nakugmat tubtub sa halad sa hapon. ^a a v4 Ang halad sa hapon amo ang kinabatasan nga inadlaw-adlaw nga halad nga ginhimo sa mga alas tres sa hapon.

⁵Sa tion sang halad sa hapon nagtindug ako gikan sa akon pagpaubus, nga gingisi ang akon panapton kag kunup, kag nagluhod ako, nga gin-untay ang akon mga kamut sa akon Amay, ⁶kag nagsiling ako, “Amay ko, nahuya ako kag ginakahuy-an nga magbayaw sang akon nawung sa imo, Amay ko, kay ang amon mga sala naglabaw na sang sa amon mga ulo, kag ang amon kasal-anan nagtubo tubtub sa kalangitan. ⁷Kutub sa mga adlaw sang amon mga katigulangan tubtub karon yara kami sa daku nga kasal-anan, kag tungud sa amon mga sala kami—ang amon mga hari kag mga saserdote—gintugyan sa mga hari sang mga kadutaan, sa espada, sa pagkabihag, sa pagpangagaw, kag sa dayag nga kahuya sa amon mga nawung, subong sang karon nga adlaw. ⁸Apang karon, sa malip-ot nga tion, nag-abut ang bugay gikan sa amon Amay, nga nagbilin sa amon sang nagkalabilin kag naghatag sa amon sang malig-on nga tindugan sa iya balaan nga duug, agud pasilakon ang amon mga mata kag hatagan kami sang diutay nga kabuhi sa amon pagkaulipon. ⁹Mga ulipon kami; apang wala kami ginpabay-an sang amon Amay sa amon pagkaulipon. Gin-untay niya ang iya mahigugmaon nga katipan sa amon sa atubangan sang mga hari sang Persia, nga nagbuhi sa amon agud patindugon ang balay sang amon Amay, kayuhon ang mga guba sini, kag hatagan kami sang pader nga manugpanalipud sa Juda kag sa Jerusalem.

¹⁰Kag karon, Amay namon, ano pa ang masiling namon sa tapus sini? Kay gintalikdan namon ang imo mga sugo,

¹¹nga imo ginsugo paagi sa imo mga alagad nga mga manalagna, nga nagasiling, “Ang duta nga inyo ginasulud agud panag-iyahan nahigkoan sang kahigko sang mga katawohan sini, nga ang ila makangilil-ad nga mga buhat nagpuno sini gikan sa isa ka ukbong tubtub sa isa pa ka ukbong sang ila pagkahigko. ¹²Gani karon dili ninyo ihatag ang inyo mga anak nga babayi sa ila mga anak nga lalaki ukon kuhaon ang ila mga anak nga babayi para sa inyo mga anak nga lalaki, kag dili gid ninyo pangitaa ang ila paghidait ukon ang ila kabuganaan, agud mangin makusug kamo, magkaon sang maayo nga bunga sang duta, kag ibilin ini nga palanublion sa inyo mga anak sa walay katapusan.”

¹³Sa tapus sang tanan nga nag-abut sa amon tungud sa amon malaut nga mga binuhatan kag daku nga kasal-anan—bisan sadto ikaw, Amay namon, nagpugung, nga nagsilot sa amon sang kubus sang sa nagakaigo sa amon mga sala, kag naghatag sa amon sang nagkalabilin nga subong sini, ¹⁴lapason pa bala namon liwat ang imo mga sugo kag magminyo kami sa mga katawohan nga nagahimo sining makangilil-ad nga mga buhat? Indi ka bala maakig sa amon tubtub nga laglagon mo kami, nga wala sang mabilin ukon makaluwas? ¹⁵Amay namon, Dios sang Israel, matarung ikaw, kay ginbilin kami nga nagkalabilin nga nakaluwas, subong sang karon nga adlaw. Yari kami sa imo atubangan sa amon kasal-anan, bisan wala sing makatindug sa imo atubangan tungud sini.”