Nkurɔfo no Anni Agya no Nokware
Mpanyimfo bɔ amanneɛ sɛ Israel ankasa ntuanofo na wodii kan waree aman a atwa wɔn ho ahyia no mu. Esra sunsuan n'ataade, tutu ne tinhwi, na ɔtena ase a ne ho adwiriw no kosi anwummere, na afei ɔbɔ mpae ka bɔne no pefee, na ɛyɛ no nwonwa sɛ yɛn Agya antwe wɔn aso sɛnea ɛfata wɔn.
9 1Bere a wɔyɛɛ eyinom wiei no, mpanyimfo no baa me nkyɛn bɛka kyerɛɛ me se, “Israelfo, asɔfo ne Lewifo no ntetee wɔn ho mfii aman a atwa wɔn ho ahyia no ne wɔn akyiwade ho: Kanaanfo, Hetifo, Perisifo, Yebusifo, Amonfo, Moabfo, Misraimfo ne Amorifo no. 2Wɔafa wɔn mmabea bi aware ama wɔn ho ne wɔn mmabarima, na wɔde nkurɔfo kronkron no ne aman a atwa wɔn ho ahyia no afrafra. Na mpanyimfo ne akannifo no na wodii kan wɔ anokwa a wɔanni yi mu.”
3Bere a metee eyi no, mesunsuanee mʼatade ne mʼatade tenten, metutuu me ti ne mʼabogyesɛ so nwi, na metenaa ase a me ho adwiri me. 4Afei wɔn a wɔn ho popoo wɔ Israel Nyankopɔn, yɛn Agya, nsɛm ho no nyinaa behyiaa me ho, ɛnam anokwa a nnommum no anni no nti; na metenaa hɔ a me ho adwiri me kosii anwummere afɔrebɔ bere. a a v4 Anwummere afɔrebɔ no yɛ daa afɔrebɔ a wɔbɔ no bɛyɛ awia nnɔnabiɛsa.
5Anwummere afɔrebɔ bere no, mesɔre fii me ahobrɛase mu, a mʼatade ne mʼatade tenten asunsuan, na mekotow buu nkotodwe, petee me nsa kyerɛɛ mʼAgya, 6na mekae se, “MʼAgya, mʼani awu, na aniwu aka me sɛ mɛma mʼanim so akyerɛ wo, mʼAgya, efisɛ yɛn bɔne aboro yɛn ti so, na yɛn fɔdi adu ɔsoro. 7Efi yɛn agyanom bere so de besi nnɛ, yɛn fɔdi adɔɔso; na yɛn bɔne nti, wɔde yɛn, yɛn ahene ne yɛn asɔfo, ahyɛ nsase so ahene nsa, ama afoa, nnommum, asadefow ne aniwu a ɛda adi wɔ yɛn anim, sɛnea ɛte nnɛ yi. 8Nanso afei, bere tiaa bi mu, adom afi yɛn Agya nkyɛn aba, na wagyaw yɛn nkae bi, ama yɛn atenae a ɛyɛ den wɔ ne kronkronbea, sɛ ɔde bɛhyerɛn yɛn ani, na wama yɛn ahoɔden foforo kakra wɔ yɛn nkoasom mu. 9Yɛyɛ nkoa; nanso yɛn Agya nnyaw yɛn wɔ yɛn nkoasom mu. Ɔmaa nʼapam adɔe duruu yɛn so wɔ Persia ahene anim, ma yenyaa ahoɔden foforo sɛ yɛbɛsi yɛn Agya fie, asiesie ne mmubuiɛ, na wama yɛn ɔfasu a ɛbɔ yɛn ho ban wɔ Yuda ne Yerusalem.
10Na afei, yɛn Agya, dɛn na yɛbɛtumi aka wɔ eyi akyi? Efisɛ yɛagyaw wo mmaransɛm no,
11a wonam wo nkoa adiyifo no so hyɛɛ no se, ‘Asase a mokɔ so sɛ morekɔfa no agu fi, ne so aman no ho fi nti; wɔn akyiwade nneyɛe de wɔn fi ahyɛ no ma fi ano kosi ano. 12Enti afei mommfa mo mmabea mma wɔn mmabarima, na mommfa wɔn mmabea mma mo mmabarima, na mommpɛ wɔn asomdwoe anaa wɔn yiyedi da, na moayɛ den, na moadi asase no so nnepa, na moagyaw no ama mo mma sɛ agyapade daa.’
13Nneɛma a aba yɛn so wɔ yɛn nneyɛe bɔne ne yɛn fɔdi kɛse nti nyinaa akyi, mpo saa bere no wo, yɛn Agya, wusiw wo ho ano, na wotwee yɛn aso kakra sen sɛnea yɛn bɔne fata, na wode nkae a ɛte sɛɛ yi maa yɛn, 14so yɛbɛsan abu wo mmaransɛm so, na yɛne aman a wɔyɛ saa akyiwade yi ayɛ aware? So wo bo renfuw yɛn kosi sɛ wobɛsɛe yɛn koraa, a nkae anaa obi a ɔbɛdi nkwa renka? 15Yɛn Agya, Israel Nyankopɔn, woyɛ ɔtreneeni, efisɛ wɔagyaw yɛn sɛ nkae a wɔadi nkwa, sɛnea ɛte nnɛ yi. Yɛn ni wɔ wʼanim wɔ yɛn fɔdi mu, ɛwom sɛ ɛno nti obiara ntumi nnyina wʼanim de.”
